अफाप सिद्ध बहुमतया सरकार

नेपालय् बहुमतया सरकार फलिफाप मजू धइगु पुष्टि जूगु दु। देशय् बहुमतया सरकार धइगु हे ‘माकःया ल्हातय् फ्वंसि’ खय् भासं धायेमाल धाःसा ‘बाँदरको हातमा नरिवल’ धाःथें खः । विगतय् दलतय्त बहुमत मदयाः देशय् राजनीतिक अस्थिरता ब्वलनाच्वंगु खः । गुकिं यानाः गुला, दछि, दत्याय् धइथें सरकार परिवर्तन जुयाच्वनीगु। राजनीतिक अस्थिरताया कारणं हे देशय् जुइमाःगु गुलिखे विकास निर्माणया ज्यां गति कायेमफुत । राजनीतिक खिचातानी, दल दथुइ कलह, गुट उपगुटया राजनीति अप्वया वन । गुकिं यानाः संसद थेंज्याःगु थासय् तकं विकृति, विसंगति न्यना वनाः सांसदत न्यायेगु मीगु ज्यातकं जुल ।

थज्याःगु हे अस्थिरता, अराजकताया कारणं २०७४ सालया आम निर्वाचनय् जनतां नेकपायात बहुमत बिउगु खः । गुकिं यानाः नेकपाया नेता केपी ओलीया नेतृत्वय् स्वब्व् निब्व बहुमतया सरकार गठन जूगु खः । नेकपायात जनतां न्यादँ तक धुक्क जुयाः सरकार चले याः धकाः म्यान्डेट बिउगु खः । तर केपी ओली नेतृत्वया सरकारं जनताया भावनायात थुइकेगु व जनमतया कदर मयात । उलि जक मखु नेकपायात हे बहुमतया सरकार ‘माकःयात फ्वंसि’ धाःथें जुल । जनतां न्यादँ तक सरकार चले यायेत बिउगु जनमतया कदर मयासे ओली नेतृत्वया सरकारं स्वदँ हे मदुनिबलय् संघीय संसद (प्रतिनिधिसभा) भंग यानाबिल । खय्तला नेपाःयात बहुमतया सरकार फापे मजू धकाः धायेगु याना वयाच्वंगु दु। छाय्धाः सां थ्व स्वयां न्ह्यः कांग्रेसया गिरिजाप्रसाद कोइराला नेतृत्वया सकारयात नं जनतां बहुमतया सरकार चले यायेत अभिमत बिउगु खः । कोइरालां नं दथुइ हे संसद भगं यानाबिल । आः वयाः केपी ओली नं गिरिजापथय् वन धकाः धायेगु याना हयाच्वंगु दु ।

२०४८ सालय् आम चुनाव जूगु इलय् जनतां नेपाली कांग्रेसयात बहुमत बिउगु खः । अबलय् कांग्रेसया गिरिजाप्रसाद कोइरालाया नेतृत्वय् बहुमतया सरकार गठन जूगु खः । तर व इलय् नं जनतां न्यादँतक सरकार चले यायेत बिउगु म्यान्डेटयात कोइरालां थःगु हे पार्टी दुने ब्वलंगु आन्तरिक कलह व कचवंया कारणं स्वदँ व खुला दुबलय् बहुमतया सरकार भंग यानाः संसद विघटन यानाबिल । आः वयाः ओली नेतृत्वया सरकारं नं अथे हे याःगु खनेदत । ओली सरकारं संसद भंग याःगु घटनायात कयाः थौं प्यखेरं व्यापक विरोध जुयाच्वंगु दु। ओली गुटया नेता व कार्यकर्ता बाहेकं थौं हरेक ख्यलं संसद भंग याःगु घटनायात असंवैधानिक व प्रतिगामी पलाः धासें विरोध याना वयाच्वंगु दु । संसद विघटनया मुद्दा सर्वोच्च अदालतय् विचाराधीन दु। प्रम ओलीं संसद विघटन यानाः वइगु बैशाखं मध्यावधि निर्वाचनया घोषणा याःगु दु। आःया इलय् मध्यावधि निर्वाचन सम्भव दु ला ? व नं स्वलाया दुने ? थ्व न्ह्यसः दनाच्वंगु जक मखसे सर्वत्र चर्चाया विषय नं जुयाच्वंगु दु। लिपांगु इलय् नेपाः जक मखु विश्व हे कोरोनां आक्रान्त जुयाच्वंगु दु। थज्याःगु इलय् मध्यावधि निर्वाचन यायेगु गुलितक सम्भव दु? व नं स्वलाया दुने ! मेखे सर्वोच्चय् लानाच्वंगु मुद्दाया फैसला गबलय् वइ धाये मफयाच्वंगु अवस्थाय् मध्यावधि निर्वाचन गथे यानाः याये फइ धइगु व्यापक चर्चाया विषय जुयाच्वंगु दु। गनं केपी ओली प्रधानमन्त्रीया मेचय् प्यासि थें प्यपुनाच्वनेत जकं थुकथंया पलाः न्ह्याकूगु मखुला धइगु नं चर्चा जुयाच्वंगु दु ।

बजारय् मेगु छगू चर्चा न्यने दयाच्वंगु दु । गनं प्रधानमन्त्री ओली जर्मन तानाशाह हिट्लरया लँपुइ जकं न्ह्याः वनेगु कुतः यानाच्वंगु मखुला ? देशय् कोरोनाया ल्वगितय्त वासः यायेत सरकारं बजेट मदु धयाच्वंगु दु अथे खःसा मध्यावधि निर्वाचन यायेत ध्यबा गनं वइ धइगु खँय् नं उतिकं चर्चा जुयाच्वंगु दु ।

थ्व झ्वलय् बजारय् मेगु छगू चर्चा न्यने दयाच्वंगु दु। गनं प्रधानमन्त्री ओली जर्मन तानाशाह हिट्लरया लँपुइ जकं न्ह्याः वनेगु कुतः यानाच्वंगु मखुला ? देशय् कोरोनाया ल्वगितय्त वासः यायेत सरकारं बजेट मदु धयाच्वंगु दु अथे खःसा मध्यावधि निर्वाचन यायेत ध्यबा गनं वइ धइगु खँय् नं उतिकं चर्चा जुयाच्वंगु दु। न्ह्याम्हेसिनं न्ह्यागु हे धा ओली गुटया विवेकहीन नेता व कार्यकर्तातय्सं संसद भग याःगु ज्यायात पाय्छि धाःसां नेकपाया थःगु हे दलया बहुमत दयेक दयेक नं संसद भंग याःगु धइगु बिलकुल हे असंवैधानिक ज्या खः । बहुमत दुगु दलं न्यादँ तक धुक्क जुयाः सरकार चले मयाःसा आः आम नागरिकं वा मतदातातय्सं गज्याःगु दलया सरकारया आश यायेगु। किसि किसि ल्वानाः घाँय् चुं दं धाःथें थःथवय् ल्वानाः देशय् अस्थिरताया ब्वलंकेगु व देय्यात झ्वाकलय् छ्वयेगु ज्या सरासर हे अनैतिक व राजनीतिक बेइमानी बाहेकं मेगु छुं मखु। थ्व ज्याय् प्रधानमन्त्रीयात साथ बिउपिं नं उलि हे दोषी दु ।

वंगु थ्व स्वदँया दुने ओली नेतृत्वया सरकारं छुं बांलाःगु ज्या याःगु दु थें मताः । गुलि नं याःगु दु उकिया मूल्यांकन यायेगु खःसा सन्तुष्टि जुइगु थाय् नं मदु। आम नागरिकया आवश्यकता व इमिगु प्राथमिकतायात ध्यानय् तयाः ज्या याःगु छुं हे खनेमदु। अथे खःसां आम नागरिक आः देशय्रा जनीतिक स्थिरता वइ, स्थायी सरकार वल धकाः धुक्क जुयाच्वंगु खः । तर प्रम ओलीयात थ्व नं सह्य मजुल । ओलीं सह याये मफयाm हे संसद भंग यानाः देशय् हाकनं छक्वः राजनीतिक अस्थिरता ब्वलंकेगु ज्या यात । सत्तारुढ नेकपा दुने पद, शक्ति व सत्ताया चलखेलं यानाः देय्यात हाकनं छक्वः दुर्घटनाय् लाकाबिल । यदि मोटर चले याइम्ह ड्राइभर असक्षम, अयोग्य जुल धाःसा सतक दुर्घटना ला जुइगु हे जुल, नेकपा दुने नं अथे हे खनेदत ।

२०४८ सालया आम निर्वाचनतकया इलय् देशय् निगू हे जक राजनीतिक दल दुगु धाःसां जिउ । छगू नेपाली कांग्रेस, मेगु कम्युनिष्ट पार्टी । अबलय् आम जनतां कांग्रेसयात नं बहुमत बिउगु खः, तर कांग्रेसं जनमतया कदर मयाः । आः वयाः नेकपायात नं स्पष्ट बहुमत बिउगु खःसा वं नं कदर मयात । थज्याःगु अवस्थाय् आः आम चुनाव वा मध्यावधि निर्वाचन जु हे जुल धाःसा आम मतदातातय्सं यायेगु छु? सुयात बहुमत बीगु धइगु खँय् अलमल । देय्या निगू ततःधंगु दलयात जनतां विश्वास यायेगु थाय् मदयेधुंकल । थुमिसं जनमतया कदर याइ मखुत । अथे खःसा आम मतदातातय्सं छु यायेगु ले ? छु हाकनं जनमतया कदर मयाइपिं बेमान नेतातय्त हे मत बीगु खः ला ? कि उकिया विकल्प मालेगु ? राजनीतिक दलया इमान्दार, नैतिकवान व नेतातय् लिउलिउ मजुइपिं, नेताया झोला कुमबीपिं नेता कार्यकर्तातय्सं इलय् हे विकल्प मालाः जनतायात सचेत याःसा बांलाइ । प्रधानमन्त्री, मन्त्री, सांसद, नेता जुइगु धइगु देश चले यायेत खः, थः आसेपासेतय्त पोसे यायेगु, जहान परिवार, प्रेमिका, थःथितियात जक ततःधंगु पदय् थ्यंके व कुस्त ध्यबा कमे यायेत मखु थ्व खँ थुइकेमाः । हाकनं नं व हे प्रवृत्तियापिं नेतात ल्ययेगु ज्या जुल धाःसा झीत ‘हात्ती आयो, हात्ती आयो फुस्सा’ जक जुइ । इलय् होस यानादिसँ ।

सम्बन्धित बुखँ

LEAVE YOUR COMMENTS