कोरोना व्यवस्थापनय् क्यंगु अकर्मण्यता

स्वनिगलय् कोरोना भाइरसया प्रकोप अप्वया वनाच्वंगु दु। न्हिथं संक्रमितया ल्याः अप्वया वनेवं सरकारं उकियात व्यवस्थापन याये मफइगु खँ धायेधुंकूगु दु। मोहनि नखः न्ह्यःने वयाच्वंगु थ्व इलय् कोरोना भाइरसया संक्रमण नं अझ अप्वये फइगु अनुमान सरकारं हे यानाच्वंगु दु। तर सरकार संक्रमित जूपिंत व्यवस्थापन यायेगु ज्या याये मफयाच्वंगु जक मखु उकिया निंतिं माक्व पूर्व तयारी तकं मयाःगुलिं स्वनिगः कोरोना भाइरसया इपिसेन्टर जूवंगु खः ।

नेपालय् दकलय् न्हापां कोरोना भाइरस संक्रमित लूगु इलय् तक उलि ग्याना पुइगु अवस्था मदुगु खः । तर चैत ११ गते सरकारं देय्न्यंकं लकडाउन यायेधुंकाः भारतं वइपिं नेपाःमियात उचित व्यवस्थापन यायेगु ज्या मयात। लिसें स्वंगूगु देशं वइपिनिगु नं उचित व्यवस्थापन यायेगु ज्या जुइ मफयेवं थौं थ्व अवस्था वःगु खः । अले थुकिया मुक्कं जिम्मेवारी सरकारया हे खः । कोरोना संक्रमणया प्रभाव नेपालय् लायेवं सरकारं छखे माक्व आइसोलेसन वा संक्रमणलिसे ल्वायेत माःगु अत्यावश्यक सामान आपूर्ति यायेगु स्वयां नं कमिसनयात अप्वः प्राथमिकता बीगु, सामान हयेगु ज्याय् ढिलासुस्ती यातसा मेखे हःगु स्वास्थ्य सामग्री नं कमिसनया काण्डय् लानाः गुणस्तरहीन सामान हयेगु ज्या जुल । उकिया हे लिच्वःकथं माक्व स्वास्थ्य सामग्री मदयाः चिकित्सकपिंसं स्वास्थ्य सामग्री मदयेक हे ज्या यायेमाःगु अवस्था ब्वलन। खः, सरकारं न्हापाया स्वलाया ई लकडाउनया इलय् गफ मुइकेगु स्वयां ज्या अप्वः याःगु खःसा शायद थौं कोरोना संक्रमितत स्वनिगलय् थुकथ अप्वइगु मखु जुइ । तर सरकारं ज्या मखु गफ अप्वः मुइकूगु कारणं हे थौं स्वनिगः भयावह अवस्थाय् थ्यंगु खः । थुकिया मू जिम्मेवारी वर्तमान सरकार हे खः ।

गुगु इलय् सरकारयाके संक्रमण नियन्त्रण यायेत माक्व ई दुगु खः । उगु इलय् सरकारं हलू लः दायेकाः त्वनेगुनिसें नेपाःमिया इम्युनिटी पावर बल्लाःगु धइगु फय्गं खँ ल्हायेगु यात । उलिं जक मगानाः नेपालय् कोरोना भाइरस दुहां हे वये मफइगु फय्गं खँ तकं ल्हात । प्रधानमन्त्री ओलीया धापू खः ‘नेपाः पहाड व हिमालया देय् खः, कोरोना भाइरस नेपाः तक थ्यनी बलय् थनया फसं लँय् हे मदइ ।’ खः, प्रम ओलीया थज्याःगु हे बेतुक खँय् नेकपाया सांसदपिंसं लापा थायेगु यात । गुकिया लिच्वः थौं स्वनिगःलिसे नेपालं फये मालाच्वंगु दु। थौं वयाः लापा थाःपिं सांसदतय्त स्वयाः धायेगु खःसा थुपिं राजनीतिक जीव मखु नेताया मलद्वारयात नं हरिद्वार खनिपिं चातुकार जक खः ।

विपक्षी सांसदतय्सं न्यंगु न्ह्यसःया लिसः प्रम ओलीं थुलि हचुवा ढंगं बिलं नं उकियात मौन समर्थन यानाः लापा थायेगु विवेकहीन ज्या सुनानं याःगु दुसा व ज्या नेकपाया सांसद धाःपिंसं याःगु दु। अले थःपिनिगु थज्याःगु कमजोरीयात कयाः सांसदतय्त भ्याः भचा नं लज्जा मचाः धइगु खःसा आः थुपिंपाखें झीसं छुं हे आशा यायेगु अवस्था मदु। थौं वयाः स्वनिगःलिसें देय्न्यंकं कोरोना भाइरसया संक्रमितत न्हियान्हिथं अप्वया वनाच्वंगु दुसा आः नं सरकारं माःगु ज्या छुं यानाच्वंगु मदु। सरकारं ला छुं ज्या मयात धाये तर राजनीतिक जीवन हनाच्वना धकाः गर्व याइपिं सांसदतय्गु नालायकीपनया कारणं नेपाःया राजनीति गनथाय् लाः धकाः विचाः यायेमाःगु अवस्था वयाच्वंगु दु। छु सत्तारुढ नेकपा धाथें राजनीतिक रुपं भ्रष्ट हे जुइधुंकूगु खः ला? अले उगु पार्टीया कार्यकर्तायाके राजनीतिक चेत मदयेधुंकूगु हे खत ला? वर्तमान सरकार कोरोना भाइरस संक्रमण नियन्त्रण यायेगुलिइ शुरुनिसें असफल जूगु खःसा राज्य सत्ताय् च्वंपिं नं थःपिनिगु असफलता त्वपुइत छुं नं छुं कथंया हथकण्डा नालेगु यानाच्वंगु संसारया इतिहासं क्यनाच्वंगु दु। नेपालय् लकडाउन जुइधुंकाः थःपिंसं ज्या यायेमफुगु खँयात त्वपुइगु निंतिं पार्टी दुनेया ल्वापुयात पिने हयेगु ज्या यात । पार्टी दुनेया ल्वापुइ नं सरकार व पार्टी थुलि अलमल जुल कि, लकडाउन वा निषेधाज्ञा स्वयां अप्वः समाचार पार्टी दुने ब्वलंगु गुट उपगुटया हे अप्वः पिहां वल ।

विपक्षी सांसदतय्सं न्यंगु न्ह्यसःया लिसः प्रम ओलीं थुलि हचुवा ढंगं बिलं नं उकियात मौन समर्थन यानाः लापा थायेगु विवेकहीन ज्या सुनानं याःगु दुसा व ज्या नेकपाया सांसद धाःपिंसं याःगु दु ।

सरकारं थःगु कमजोरी त्वपुइत पार्टी तछ् याये फइगु अध्यादेश हयेगुलिसें म्वाःगु इलय् अध्यादेश हयेगु, संविधान संशोधन यायेगु ज्याय् सरकार लिकुना च्वनसा मेखे नेकपा पार्टी नं देशय् ब्वलंगु समस्यायात गुकथं समाधान यायेगु धइगु खँय् धकाः विचाः यायेगु स्वयां सरकारयात गुकथं नियन्त्रणय् तयेफइ व सरकारय् थःपिनिगु गुटगत उपस्थिति गुकथं बल्लाके फइ धइगु खँय् जक केन्द्रित जुल । आः वयाः स्वनिगलय् न्हियान्हिथं कोरोना भाइरस संक्रमण जुइपिनिगु ल्याः अप्वया वनाच्वंगु इलय् सरकारं थःगु हे स्वब्वय् निब्व बहुमत दुगु कर्णाली प्रदेशय् थः हे मुख्यमन्त्रीया विरोधय् अविश्वासया प्रस्ताव दर्ता याकेगु ज्यायात । मेखे पार्टीया मेम्ह अध्यक्ष पुष्पकमल दाहाल व वरिष्ठ नेता माधवकुमार नेपाल नं पार्टीपाखें सरकारयात अंकुश तयेगु स्वयां नं गुटगत स्वार्थय् तक्यनाः कर्णाली प्रदेशया खँय् जक मखु मेमेगु प्रदेशया मुख्यमन्त्री विरुद्ध नं अविश्वास हयेगु कसरत यानाच्वंगु दु ।

थुकथं नेपालय् कोरोना भाइरस संक्रमण जूम्ह छम्ह जक व्यक्ति लुसां निसें आतक सरकार व पार्टीं संक्रमणयात गुकथं संबोधन यायेगु? उकिया निंतिं गज्याःगु नीति नालेगु धइगु स्वयां नं पार्टी व सरकार दथुइ ब्वलनाच्वंगु विवादयात सतहय् हयाः थःथः ल्वायेगु बाहेक मेता ज्या न सरकारं यात न त पार्टीं हे यात । अझ लकडाउन व निषेधाज्ञाया कारणं द्वलंद्वः जनतां थःगु रोजगारी गुमे यायेमाःगु अवस्था ब्वलन । स्वाभिमानी नेपाःमि जनता ज्या यानाः नये मखनेवं फ्वनाः नयेमाःगु अवस्था वलं नं उकियात उचित संबोधन यायेगु ज्या नं न सरकारं हे यात न नेकपा पार्टी हे उकियात संबोधन यायेमाः धकाः सरकारयात छसः धायेफूगु अवस्था हे वल ।

सरकारया अर्कमण्यताया कारणं ब्वलंगु थ्व महामारीया जिम्मेवारी सरकारं जक मखु पार्टीं नं कायेमाः । अझ विशेष यानाः प्रधानमन्त्रीया फय्गं खँयात कयाः सदनय् टेबुल थाइपिं जनप्रतिनिधि धाःपिं नेकपाया सांसदपिंसं दकलय् अप्वः थौंया अवस्थाया जिम्मेवारी कायेमाः । प्रधानमन्त्रीं कोरोनाया बारे संसदय् थीथीकथं न्ववानाच्वंगु इलय् यदि सत्तारुढ पार्टीया सांसदपिंसं सरकारया ज्यायात कयाः छुं कथंया न्ह्यसः तःगु खःसा थौं थ्व अवस्था मवइगु खइ । तर सांसदपिंसं थःपिनिगु विवेक मछ्यःगुलिं उकिया लिच्वः थौं देय्या सर्वसाधारण जनतां भोगे याये मालाच्वंगु दु। सरकारं धायेधुंकूगु दु। आः सरकारं छुं नं यायेफइगु अवस्था मदु। अथेजुयाः थौं जनता थः हे नं सचेत जुइमाःगु अवस्था वःगु दु। स्वनिगलय् थ्व सरकारं आइसोलेसन दयेकी धकाः बिचाः मयाये । आःया अवस्था धइगु थः हे फक्व सचेत जुइगु बाहेक स्वनिगःया जनतायाके मेगु विकल्प मदु ।

सम्बन्धित बुखँ

LEAVE YOUR COMMENTS