भक्तपुर काण्डयात दुवालेबलय्

थौं भाद्र ९ गते, कालो दिवस । भक्तपुर काण्ड । थौं स्वयां स्वीछदँ न्ह्यः ख्वपय् जूगु छगू पंचायती षडयन्त्र खः थ्व काण्ड । २०३८ सालया बैशाख २७ गते राष्ट्रिय पंचायतया निर्वाचन जूगु खः । गाउँफर्क राष्ट्रिय अभियान अन्तर्गत थीथी वर्गीय संगठनपाखें जक नियुक्ति यानाः सरकारं मनोनित रुपं सदनय् मनूत कयाच्वंगु इलय् न्हापांखुसी थथे जनताया प्रत्यक्ष निर्वाचनपाखें अबले राष्ट्रिय पंचायतया सदस्य ल्ययेगु ज्या जूगु खः । २०३६ सालं विद्यार्थी आन्दोलन व वयां लिपा चर्के जूगु वामपन्थी व प्रजातान्त्रिक शक्तिया आन्दोलन लिपा जुजु बीरेन्द्रं जनमत संग्रह घोषणा यायेधुंकाः सुधारिएको पंचायती व्यवस्था कायम जुइवं उगु सुधार कथं थथे न्हापांखुसी २०३८ सालया बैशाख २७ गते निर्वाचन जूगु खः । अबले ख्वप जिल्लापाखें झिंस्वद्वः मत कयाः कर्णप्रसाद ह्योजू नं राष्ट्रिय पंचायतय् निर्वाचित जुल । वयात तत्कालीन नेपाल मजदुर किसान संगठनया समर्थन दुगु खः ।

तर त्यानाः झिला हे बांलाक ज्या मयाःनिबलय् वं जनप्रतितिधि स्वयां दरवारया चाकरी यानाः व्यक्तिगत धन आर्जन यायेगु ज्याय् संलग्न जूवन । जनतायात धोखा बियाः पंचायती व्यवस्थालिसें जानाः भक्तपुर डेरी सुरु यात। थाय्थासय् जग्गा जमीन न्यानाः व्यक्तिगत सम्पत्ति अप्वयेकेगुपाखे जक अप्वः ध्यान तल । पार्टीं वयात सचेत यात, तर वं उकियात भ्याःभचा नं वास्ता मयाः । वयागु अवधि २०४३ सालया सुरुं समाप्त जुल । हाकनं २०४३ सालय् गोविन्द दुवाल राष्ट्रिय पंचायतया सदस्य निर्वाचित जुल । ख्वपं त्याकावंम्ह गोविन्द दुवाल निम्हम्ह राष्ट्रिय पंचायतया सदस्य खः । वं जनताया पक्षय् ज्या याना वनसा अबले हे चुनावी मैदानय् कर्णप्रसाद ह्योजू पक्षं श्यामकृष्ण खमूयात थनाः प्रचार यानाः न्ह्यःने वयाच्वंगु खः ।

थज्याःगु अन्यौलपूर्ण घडीइ पुलांम्ह राष्ट्रिय पंचायत सदस्य कर्णप्रसाद ह्योजू जनताया मिखाय् धू हे साबित जुल । वयात जनतां ला मयःगु हे खत। नापं पंचायती व्यवस्थां नं  ज्याःपिं विश्वासघाती चरित्रयापिंत यदि पंचायतं लहिना तयेगु खःसा कन्हय् साम्राज्यवादी शक्तिं वा विदेशी शक्तिं थज्याःपिंत हे लोभय् लाकाः देय् हे नयेत नं लिस्वइ मखु धइगु स्पष्ट जुल । छगू इलय् किपुली अनया ढोका पाले जुयाच्वंम्ह मनूयात पृथ्वीनारायण शाह पक्षया फौजं छंत थ्व देय्या जुजु याये, तःधंगु पद बी वा मन्त्री याये धकाः लुखा चायेकेत लोभय् फँसे यानाः लिपा फौजं किपू देय् कब्जा याये धुनेवं उम्ह मनूयात उगु हे लुखाय् यखानाः स्यानाबिउगु खः । थ्वहे काइदा कथं पंचायती व्यवस्थां कर्णप्रसाद ह्योजूयात नं स्याना बिउगु खः । घटनायात छकः दुवालेगु खत धाःसा २०४५ सालया भाद्र ५ गते बिहिवाः कुन्हु सुथय् ५ बजे तःभुखाय् ब्वःगु खः । अबलेया केन्द्रविन्दु ताप्लेजुङ लाःगु खः ।

गथे पृथ्वीनारायण शाहं किपूया हे छम्ह ध्वाखापाल्यायात ल्हातय् कयाः किपू देय् कब्जा यायेधुंका वयात लिपा पुरस्कार स्वरुप उगु हे लुखाय् यखाना स्याना बिउगु खः । कर्णप्रसाद ह्योजू नं उकथं पंचायती व्यवस्थां स्याना छ्वःम्ह खः ।

ताप्लेजुङ केन्द्रविन्दु जुयाः तःभुखाय् ब्वःगु इलय् ख्वपय् नं आपालं छेँ दुनावःगु खः । थथे छेँ दुनाः ख्वपय् जक झिंगुम्ह मनू सीगु खः । अबले नं ख्वप नगर पंचायतं तत्काल निगू लख दां राहत कथं फ्यानाः छगू लख ला अबले हे निकासा नं बिउगु खः । उकिं भुखाचं पीडिततय्त पंचायती व्यवस्थां ग्वाहालि व राहत बिउगु स्वयां न्ह्यः हे ग्वाहालि
जूवन । छगू कथं पंचायती व्यवस्थां सीडीओ मार्फत् हे जक राहत वितरण याये दइ धयाच्वंगु इलय् पंचायती व्यवस्थाया मूख्य मनू पंचायत नीति तथा जाँचबुझ समितिइ दुम्ह कर्णप्रसाद ह्योजूयात अबले प्रधानमन्त्री मरिचमान श्रेष्ठ स्वयमं हे थनया जनतापाखें बदला कायेकेगु हे कुतः कथं परिस्थिति स्यंकेगु ताः तयाः मारवाडी सेवा समितिपाखें बीगु क्वाति, जाकि व थीथी पाल व थलबल सहितया राहतया कुपन इनेगु ज्याय् खटे यानाहल ।

अथे हे स्थानीय किसान जनताया दथुइ मिखाय् दुहांवंम्ह की थें हे बदनाम जुयाच्वंम्ह कर्णप्रसाद ह्योजू । वयात हे पंचायती व्यवस्थां पक्षपात यानाः राहत इनेगु वा रोहित पक्षयापिंत राहतया कुपन मबीगु आदेश बियाः हे ख्वँह्रेया सूर्योदय स्कुलय् राहतया कुपन इनेत खटे याना हल । छगू ल्याखं पंचायती व्यवस्थां जारी याःगु सुचं सिडीओ बाहेक सुनानं हे राहत इने दइ मखु धइगु आदेशया अःखः खः थ्व । वयात च्वय्या इसारां हे थथे पक्षपातपूर्ण रुपं इनेगु कथं राहत बिया छ्वया हःगु खः । अथे जुयाः वं तप्यंक हे थः मनूतय्त हे जक राहत इन । सर्वसाधारणयात व छेँ दुंपिं वा वास्तविक पीडित किसान जनतायात वं रोहितयाके काः हुँ, सुयात भोट बियागु खः वयाके हे काः हुँ धयाहल । उगु खँ ख्वप नगर पंचयतया पदाधिकारीतय् न्हाय्पनय् तकं थ्यन । तुरुन्त हे निम्ह प्यम्ह वडाया अध्यक्ष सहितया पुचः ख्वँहे्रय् थ्यंकाः वयात ज्वन । जाकि खुँ धाधां सूर्यमढी दबुली थने हल । अबले तक पंचायती व्यवस्थां छ्वयाहःपिं कमाण्डो नं अन थ्यने धुंकूगु जुयाच्वन ।थ्व ल्याखं योजनावद्ध रुपं हे वयात स्याःगु खनेदु ।

भक्तपुर शहर अब्ले रोहितया बाहुल्यता दुगु सह हे याये मजिउगु खँ पंचायती व्यवस्थाया मन्त्री प्रधानमन्त्रीतय्सं याना क्यनीगु व्यवहारं नं क्यं । अथे जुयाः रोहित सचेत जुयाः ह्योजूयात कान्छी पतिचां तकं थीमते धकाः थः कार्यकर्तातय्त धया जुइम्ह खः । तर अबले अथे मजुल । थः कार्यकर्तात न्ह्यःने च्वनाः ह्योजूयात चाःहीकेगु वा बदला स्वरुप माफी फ्वंकेगु स्वत धाःसा पंचायती व्यवस्थाया आड भरोसा दुम्ह कर्णप्रसाद ह्योजूं नं थःत यदि जनतां लाकांमाः क्वखायेकल धाःसा पंचायती व्यवस्थां स्वांमाः क्वखायेकीगु वा मन्त्री याइगु खँ पक्का धइगु सिउ । थथे जनतायात धोखा बियावंम्ह छम्ह मनूयात पंचायती व्यवस्थां नं उपयोग हे जक याइगु धइगु धाःसा वं बांलाक मसिउ । गथे पृथ्वीनारायण शाहं किपूया हे छम्ह ध्वाखापाल्यायात ल्हातय् कयाः लुखां खनाः दुहां वनाः किपू देय् कब्जा यायेधुंका वयात लिपा पुरस्कार स्वरुप उगु हे  खाय् यखाना स्याना बिउगु खः । कर्णप्रसाद ह्योजू नं उगु हे कथं पंचायती व्यवस्थाया ल्हातं हे स्याना छ्वम्ह मनू खः । उम्ह मनूयात चाःहिकेगु झ्वलय् प्रत्यक्षदर्शी थ्व च्वमिं सुकुध्वाखाय् तकं नांगां व मिखा छपा छज्याका लुत्तु लुयाः सातु साला यंकाच्वंगु स्वस्वं प्रहरी वयाः लाठीचार्ज यायेवं बिसिउँ वनागु आः नं लुमंकाच्वंगु दु। पंचायती व्यवस्थाया अन्तिम इलय् जूगु थ्व घटना भक्तपुर काण्ड कथं नांजाः ।

सम्बन्धित बुखँ

LEAVE YOUR COMMENTS