थ्व जनताया माग खः !

मोहनि नखः नं क्वचाल । थुगुसी राष्ट्रपति भवनय् जूगु टिका समारोहं देशय् छगू गम्भिर बहस हयाबी । मोहनि औपचारिककथं अन्त्य जुइ । फुइ । तर गम्भिर बहसया तरंग जनमानसय् तरंगित जुइ । मोहनिया नखः धार्मिक पर्व जक मखु । थुकियात सांस्कृतिक पर्वकथं नं हनी । उखेंथुखें चिचाः दनाच्वंपिं परिवारया दुजःपिं मोहनिबलय् छथाय् हे दइ ।

नाप लाइ । न्ह्यइपुकी । विशेष यानाः चालं अर्थात दशमि कुन्हु । परिवारया थकालिम्हपाखें सिन्हः ती । आशीर्वाद फइ । मोहनि पारिवारिक नखःकथं महत्वपूर्ण जुइ । देशय् मोहनि राजनीतिक पर्वया रुपय् नं विकास जुइ । राजतन्त्रया इलय् । मोहनिबलय् जुजुं देय्या सरकारी कर्मचारीवर्ग व इच्छुक प्रजापिंत नं सिन्हः तिका बी ।

सरकारया उच्चपदस्थ व्यक्तित दरवारय् वनी । जुजुया ल्हातिं सिन्हः फइ । थ्व अनिवार्य जुइ । अथे हे न्ह्याःपिं प्रजापिं नं दरवारय् वनी । टिका ग्रहण याइ । मोहनि नखः थुकथं सामान्य जनताया पुचलय् पारिवारिक नखः जक मजुसे राजतन्त्रया इलय् सामन्ति पर्वया रुपय् नं विकास जुइ । शासक व शासितलिसेया स्वापूया सांस्कृतिक उत्सव जुयाबी ।

राजतन्त्रकालय् जनता प्रजा जुइ । स्वतन्त्र नागरिक जुइ फइमखु । जुजु । विशेष दैवीय अधिकार सम्पन्न शाषक जुइ । परम शक्तिया प्रतीक । शासक श्रेष्ठ । प्रजाहीन । थज्याःगु हे सामन्ति राजनीतिक मनोविज्ञानय् जुजु प्रजाया स्वापूतिइ आधारित जुइ । जुजु परमाधिपति । जुजुया ल्हातिं सिन्हः फयेमाः । मोहनिया सिन्हः राष्ट्रिय संस्कृतिया रुप काइ ।

मोहनिया सिन्हः पारिवारिक घेरां पिहां वइ । राजनीतिक संस्कृतिया स्वरुप काइ । दरवारी संस्कृतिया अभिन्न अंग जुयाबी ।देशय् । जनक्रान्ति जुइ । राजनीतिक उथलपुथल जुइ । धाइ भचा भचा हिउपाः जक मखु । तःधंगु हिउपाः वःगु खनेदइ । राजतन्त्रया अन्त्य जुइ । गणतन्त्र वइ ।

राजतन्त्रया अन्त्य जुयाः गणतन्त्र वइया अर्थ राजनीतिक हिउपाः जक मखु सामाजिक, सांस्कृतिक हिउपाः नं जुइ । जुइमाः । जनताया अपेक्षा जुइ । गणतन्त्रय् जनता सार्वभौम जुइ । जनता शासित प्रजा जुइमखु । स्वयम शासनया आधार जुइ । जनताय् आत्म सम्मान, गौरवया अनुभूति जुइ ।

गणतन्त्रय् जनता सार्वभौम जुइ । जनता शासित प्रजा जुइमखु । स्वयम शासनया आधार जुइ । जनताय् आत्म सम्मान, गौरवया अनुभूति जुइ । राजनीतिक परिवर्तनलिसें देय्या सामाजिक, सांस्कृतिक संस्कारय् हिउपाः वइ । म्हिगःया सामन्ति दास संस्कारं जनता मुक्त जुइ ।

राजनीतिक परिवर्तनलिसें देय्या सामाजिक, सांस्कृतिक संस्कारय् हिउपाः वइ । म्हिगःया सामन्ति दास संस्कारं जनता मुक्त जुइ । न्हूगु क्रान्तिं जनताया नुगलय् विश्वास थनी । तर । अफसोच ! थौं देशय् वःगु क्रान्तिप्रति जनताय् वितृष्णा लुयाबी । जनतां अझ नं म्हिगःया सामन्ति अवशेषं मुक्त जूगु अनुभव याये मफुनि ।

अझ नं शासित तिनि धइगु हीनताबोधं जनता पीडित तिनि । देशय् आमूल परिवर्तन वल । गुगु उमंग उल्लासं जनता क्रान्तिया इलय् प्रफुल्ल जूगु खः । व शिथिल जुयाबी !थुगुसी मोहनिया चालंया इलय् राष्ट्रपति भवनय् खने दुगु दृश्य स्वस्वं खँखं सर्वसाधारण जनतायात नुगः क्वतुंका बिउगु दु ।

जनताया राष्ट्रपतिपाखें गुकथं पुलिं चुयाः, घ्वंस्यानाः टिका ग्रहण यात, उकिं राजतन्त्रकालयात लुमंकाबिल । अज्याःगु अप्रिय दृश्यतसें हाकनं सामन्ति शासन पुनरावृत्ति जूगु अनुभव याकल । आम जनताया प्रतिष्ठानय् आघात जुइगु परिदृश्यत जनतां खनी । नुगलय् चित्कार थ्वया वइ, ‘देशय् क्रान्ति जुल धाः । आखिर व हे मुलु, व हे सुका तिनि ।’

सरकारी पक्षं प्रतिवाद यायेफु । ‘राष्ट्रपति भवनय् सिन्हः तिउ वंगु ईया दृश्यतय् राजनीतिकरणं यानाः प्रतिपक्षतय्सं सरकारयात बाम्हय् काकेत स्वयाच्वंगु दु । थ्व छुं तःधंगु खँ मखु । प्रतिपक्षया दुर्नियतपाखें जनता होसियार जुइमाः ।’ खइ । दलीय व्यवस्थाय् दलतय् दथुइ राजनीतिक हानथाप जुयाच्वनी । व स्वाभाविक खः ।

तर अथें धायेवं सकलें जनताया प्रतिक्रियायात प्रतिपक्षीय खंके मजिउ । देशय् विवेकशील जनता नं दु । जनआवाजया प्रतिनिधित्व याइपिं नं दु । राष्ट्रपति भवनय् पुलिं चुयाः, घ्वंस्यानाः सिन्हः तिउगु दृश्यतसें सामन्ति शासन व्यवस्थाया झलक बी । व ‘बडी ल्यांग्वेज’ अर्थात शरीरया भासं नं देशय् राजनीतिक, सांस्कृतिक व सामन्ति अवस्थाया संकेत याइ ।

वर्गीय संस्कारया आभास बी । थौंया कम्युनिष्ट सरकार ला अझ झन् संवेदनशील जुइमाः । जनताया आलोचना यात ‘अस्थिरता हयेगु तत्वतय् षडयन्त्र । देशी विदेशीतत्वतय् सरकारयात विफल यायेगु चलखेल’ धकाः सरकार पक्षं थःगु प्रतिरक्षा यायेफु । तर थन आक्रमण प्रत्याक्रमणया खँ मखु । घ्वंस्याःगु, पुलिं चुयाः जनताया राष्ट्रपतिपाखें सिन्हः तिनाः आशीर्वाद फःगु दृश्यत जनतां स्वये म्वाःलेमा । जनताया माग खः थ्व !

 

सम्बन्धित बुखँ

LEAVE YOUR COMMENTS