
पराशर ऋषि व मत्स्यगन्धापाखें बूम्ह वेदव्यासया जन्म यमुना खुसि सिथय् जूगु धइगु बाखं आपालं थासय् प्रचलित जू । तर नेपालय् छथ्वः नेपालवादी हिन्दूविद्तसें वेदव्यासया जन्मस्थल दमौली सतिकच्वंगु छाब्दी बाराही देगः जःखःया थाय्यात धायेगु यानाच्वंगु दु। दमौलीयात हे दमौली मधासें व्यासं थ्व हे थासय् च्वनाः तपस्या याःगु धकाः नगरपालिकाया नां हे व्यास नगरपालिका धकाः नं छुनातःगु दु। अन लुयावःगु गुफायात न्हापा व्यास गुफा धाइगु खः, लिपा वनाः पराशर गुफा धकाः धाःगु नं न्यनेदत । मेखे भारतं त्यलाः कयातःगु कालापानी लागायात भारतीय व नेपाली निथ्वःसिनं हे व्यास उपत्यका धया वयाच्वंगु दुसा थ्व हे थासय् व्यासं तपस्या याःगु धकाः अनया मनूतसें धया वयाच्वंगु दु। दार्चुला जिल्लाया उगु जःखःया लागायात नं व्यास गाउँपालिका धकाः नां छुनातःगु दु ।
वेदव्यासयात त्वःताः वाल्मीकि आश्रमया खँ ल्हायेगु खःसा भारतीय विश्वकोश भारतकोशय् उत्तरप्रदेशया बाँडा जिल्लाय् लाःगु खँ तुलसीदासया हवाला बियाः धयातःगु दु। तर नेपालवादी कथित हिन्दूविद्तय्सं धाःसा नेपाःया हे चितवन जिल्लाया चितवन राष्ट्रिय निकुञ्ज व पर्सा वन्यजन्तु आरक्षया दथुइ वाल्मीकि आश्रम दुगु खँ प्रचारप्रसार यानावयाच्वंगु दु ।
आः वयाः रामजन्मभूमि अयोध्या नं नेपाःया ठोरीया अयोध्यापुरी खः धकाः धायेगु खँ थ्व हे सिलसिलाया छगू मेगु काण्ड खः । खतुं विक्रम संवत् या संस्थापक विक्रमादित्य नेपाःया हे जुजु खः धकाः राणाकालया हे वंशावलीइ च्वयातःगु स्वयेबलय् थुकथंया नेपालवादीत राणाकालनिसें हे दुगु खनेदु। विक्रम संवत्यात अःपुक हे नेपाली संवत् व क्यालेन्डर धायेगु जक मखु, आः इमिसं हिन्दू धर्म हे नेपालय् व्युत्पत्ति जूगु खः धकाः क्यनेगु चेष्टा नं यानाच्वंगु दु धइगु खँ बुलुहुं बुलुहुं खने दया वयाच्वंगु दु ।
गंय्रा म्येय् (गैँडा) धइगु नेपालय् जक दु, थुकिया अंग्रेजी नां ‘राइनोसोरस’ खः धइगु गथे यानाः दइ धकाः धुवांधू हे धयादीम्ह प्रधानमन्त्री केपी शर्मा ओली थ्व हे गंय्रा म्येय्या खँनिसें हे नेपालवादीतय्गु चंगुलय् लानाच्वंगु खनेदु। थुलि जक मखु, आयुर्वेद नं झी पुर्खां हे सयेकातःगु खः, ज्योतिषीत नं झी पुर्खा हे खः धकाः नं इलय्ब्यलय् न्ववायेगु यानादीगु दु। अयोध्या नेपालय् हे दु, भारतया अयोध्या धाथेंगु मखु धकाः धइगु खँ ला थुकिया सिलसिलाय् मेता खँ खः ।
जातीय वा राष्ट्रिय स्वाभिमान व गर्व धइगु न्ह्यागु नं जाति व राष्ट्रया मनूतय्के दयाच्वनी । अझ मेपिं क्वह्यं थःपिं च्वन्ह्याः धइकथं नं थुकिया प्रकटीकरण जू । झी नेवाःतय्सं नं थुकथंया गर्व तया वयाच्वनागु दु। पुर्खाया गौरवगान नं याना वयाच्वनागु दु। तर थ्व वास्तविकताय् आधारित खः । झीगु भाषाय् महाकाव्य मदुसा महाकाव्य दयेकेमाल, स्यल्लाःगु खँग्वःधुकू मदुसा दयेकेमाल, पत्रिका पिहां मवःसा पत्रिका पिकायेमाल धकाः झी अग्रजपिं थःत पानाः लगे जुयादिल । थ्व मनोविज्ञान स्वाभाविक खः, तर थ्व हे मनोविज्ञानया मात्रा न्ह्यपुइ अप्वल धाःसा थुकिं अन्धराष्ट्रवादया रूप काइ । हाकनं थ्व हे मनोविज्ञानया चक्करय् लानाः न्ह्यागु नं थः पुर्खाया देन धकाः खनीगु अले समुदायया नायःत जुयाः प्रचार यायेगु ला हीनताबोधया कारण नं जुइफु ।
मनोविज्ञानया मात्रा न्ह्यपुइ अप्वल धाःसा थुकिं अन्धराष्ट्रवादया रूप काइ । हाकनं थ्व हे मनोविज्ञानया चक्करय् लानाः न्ह्यागु नं थः पुर्खाया देन धकाः खनीगु अले समुदायया नायःत जुयाः प्रचार यायेगु ला हीनताबोधया कारण नं जुइफु।
थुज्वःगु हे अतिराष्ट्रवाद व अन्धराष्ट्रवादया चक्करय् लाःपिंसं ला लोकतन्त्र, गणतन्त्र, संघीयता, धर्मनिरपेक्षता धइगु हे विदेशी खः, नेपाःया परम्परा व संस्कार मखु धकाः मनोवैज्ञानिक रूपं राजतन्त्रया समर्थन जुइगु खँ ल्हाना जूगु दु। हाकनं बाबुरामपिंसं नेपाःयात बहुराष्ट्रिय राज्य धाल धकाः राष्ट्र (जातिया विकसित रूप) या आधारय् राज्य माने यायेगु युरोपीयतय्गु खः, नेपाःया हिन्दू व बौद्ध संस्कृतिकथं ला राज्य राष्ट्र माने यायेमाः धकाः प्रचार याना जूपिं नं दु। मल्लकालय् नेवाःतय्गु राज्य जुयाः उगु राज्यय् शासन याइम्ह जुजुनिसें दुहां वःपिं थीथी जनतां थनया भाय् व संस्कृति नालाः नेवाः जुयाः वन धाःथें आः नं छगू भाय्, संस्कृति व भेषभूषा नाला वनेमाः धइगु तर्क तइपिं व उकथं हे मनोविज्ञान नं तयार यायेगु ज्या जुयाच्वंगु दु। जातिया हे विकसित रूप राष्ट्र वा नेसन खः धाःसा राष्ट्रया छगू राज्य वा स्टेट दइ । अन दुने जिमिगु भाय् धायेत छगू भाय् दयेमाल, जिमिगु थाय् धायेत छगू भूगोल दयेमाल, जिमिगु भेषभूषा धायेत छगू भेषभूषा दयेमाल, जिमिगु धर्मसंस्कृति धायेत थःगु हे धर्मसंस्कृति दयेमाल । जनता फुक्क थुकथं थः नालेगु विषयवस्तु कःघानाः छगू हे मनोविज्ञानय् आवद्ध जुल धायेवं तिनि छगू राष्ट्र धकाः धायेफइ ।
आः थुज्वःगु हे आधार दयेकेगु ज्याय् छथ्वः मनूत खटे जुयाच्वंगु दु। थुज्वःगु खँ थःपिंसं प्रचार यायेगु ला द हे दु, तर थःपिंसं जक प्रचार यायेबलय् थःपिनिगु पक्षया मनूत जक तयार जुइ, राज्यं नालाकाल धायेवं व्यापक जुइ, उकी थ्व पक्ष व उगु पक्ष धकाः भेद नं जूवनीमखु। थुज्वःगु खँ सिउपिं चलाखपिंसं नेपाःया प्रधानमन्त्री केपी शर्मा ओलीयात प्रभावित यानाः वयाच्वंगु धइगु खँ न्हापांनिसें ओली भाजुया अभिव्यक्ति स्वयेबलय् सीदु। खतुं येँय् वंपिंसं पाल्पाय् नं येँय् थेंज्याःगु त्वाःया नां तयेगु, देगः दयेकेगु, जात्रा न्यायेकेगु याः । पोखराय् नं लाखेप्याखं पिकाः । कास्कीं वःम्ह धर्मराज थापां तकं स्वयम्भूक्वय् कास्कीकोट धकाः साइनबोर्ड तल ।
विदेशय् नं चिनियातसें चाइनाटाउन धकाः दयेकातःगु दु। भारतीयतसें अमेरिकाय् नं स्वामीनारायण मन्दिर दयेकातःगु दु। थुकथं थीथी इलय्थी थी थासं वःपिंसं थःगु लागाय् थःगु धर्मसंस्कृति संस्कार विश्वासकथं थाय्बाय्या नां छुइगु अझ थःत यःगु नां छुइगु, उकिया चिं तयेगु ज्या याइगु स्वाभाविक खः । झीथाय् नं भिंद्यवं नांचा चले याःगु धकाः भीमढुंगा व सीतां पलाः तःगु धकाः सीतापाइला धकाः नां छुनातःगु नं द हे दु ।
थुकथंया हे नां व चिंया भरय् नेपालवादी हिन्दूविद्तसें थःगु न्ह्यपु नायेका जूगु खनेदु। थुकिं छुं छुं खँ स्पष्ट जूगु दु : नेपाःयात राज्यराष्ट्रया सिद्धान्तय् यंकाः राष्ट्रयात माःगु थीथी विषयवस्तु नेपाःया हे खः धकाः उकिया नायः जुइत व दयेकेत स्वया जूपिं छथ्वः मनूत आल्पसें हे सक्रिय जुयाच्वंगु दु। चायेकं व मचायेकं थुगु नीतिया चक्करय् लानाः नेपाः दुने अनेक चीजवस्तु माला जुइपिं मनूत नं सक्रिय दु। थुमिसं नेपाःया राज्य क्षेत्रय् नं प्रभावित यानाः ज्या कया वयाच्वंगु दु। प्रधानमन्त्री ओली थुज्वःपिनि हे चक्करय् लानाच्वंगु दु। आःयात थुमित नेपालवादी हिन्दूविद् धायेगु पाय्छि जुइ ।
LEAVE YOUR COMMENTS