ट्रम्प उत्तर कोरियालिसे वार्ता यायेत तयार
अमेरिकी राष्ट्रपति डोनाल्ड ट्रम्पं उत्तर कोरियाया नेता किम जोंग उन लिसे प्रस्तावित वार्ता या त असफल जुइ, या त विश्वया निंतिं दकलय् तःधंगु सम्झौता जुइगु खँ धयादीगु दु ।पेन्सिल्वेनियाय् छगू चुनावी ¥यालीं न्वानादिसें वय्कलं उत्तर कोरिया शान्ति स्थापना यायेत चाहे जुयाच्वंगु खँय् थःत विश्वास दुगु खँ धयादीगु दु ।थ्व लिसें वय्कलं यदि परमाणु परीक्षण बन्द यायेगु बारे छुं प्रगति मजुल धाःसा थःम्हं वार्ता दथुइ हे त्वःताबीगु खँ नं धयादीगु दु ।¥यालीयात संवोधन यासें ट्रम्पं धयादीगु दु, ‘सुनां सिउ छु जुइ त्यंगु दु धकाः । जिं याकनं हे वार्ता त्वाःथले नं फु, मखुसा थ्व वार्तां विश्वया निंतिं दकलय् तःधंगु सम्झौता नं जुइफु ।’थःगु ताःहाकःगु भाषणया झ्वलय् वय्कलं थ्व वार्तां परमाणु सम्बन्धी चिन्ता म्हो जुइगु आशा नं प्वंकादीगु दु । वय्कलं उत्तर कोरियां मिसाइल परीक्षणयात कयाः गुगु बचं बिउगु खः वयात थम्हं सम्मान यायेगु खँ नं धयादीगु दु । अमेरिका व उत्तर कोरियाया निम्ह नेतातय् दथुइ वार्ता जुइ धकाः गुबलय् गन जुइ धयागु छुं क्वःछिउगु मदुनि ।
तर गुलिगुलिसिनं थ्व वार्ता मे महिनाया अन्त पाखे जुइफु धाःगु दु । दक्षिण कोरियाया राष्ट्रिय समाचार समितिं उत्तर कोरियाया सीमाय् लाःगु सैन्य मुक्त गां ‘पममुंजम’ बांलाःगु विकल्प जूगु खँ धाःगु दु । अथेहे स्वीडेन, स्विट्जरल्यान्ड वा चीनय् नं थ्व वार्ता जुइफु धयाच्वंगु दु ।उत्तर कोरिायाय सुं नेतालिसे आःतक अमेरिकाया सुं नेतां वार्ता याःगु मदुनि । थज्याःगु अवस्थाय् राष्ट्रपति ट्रम्पं वार्ता यायेत स्वीकृति बिउगु खँय् अमेरिकाया उच्च अधिकारीत हे अजू चायाच्वंगु दु । वंगु बिहिवाः जक दक्षिण कोरियाया विशेष दूतं उत्तर कोरियालिसे वार्ताया निंतिं अमेरिकी राष्ट्रपतियात निमन्त्रणा बिउगु खः ।
उत्तर कोरिया पाखें छुं प्रतिक्रिया मवःनि
उत्तर कोरियाया नेता किम जोंग उन लिसे वार्ता यायेगु निंतिं अमेरिकी राष्ट्रपति डोनाल्ड ट्रम्पं सहमति प्वंकूसां उत्तर कोरिया पाखें धाःसा छुं प्रतिक्रिया मवःनि । ट्रम्पं शुक्रवाः उत्तर कोरियालिसे तप्यंक वार्ता यायेत सहमति प्वंकूगु खः । दक्षिण कोरियाया विशेष दूतं उत्तर कोरियाली नेता किम जोंग उन थःगु परमाण परीक्षण बन्द यायेत तयार दुगु सन्देश बीधुंकाः ट्रम्पं वार्ताया सहमति प्वंकूगु खः ।तर थ्व वार्ता जुइगु खँय् धाःसा थीथी शंका धाःसा ब्वलनाच्वंगु दु । दक्षिण कोरियाया एकीकरण मन्त्रालयया प्रवक्तां उत्तर कोरियाली सरकारपाखें छुं प्रतिक्रिया मवःनिगु खँ धाःगु दु । मन्त्रालयया प्रवक्तां धाःगु दु, ‘जिमित उत्तर कोरियाली सरकारपाखें अमेरिका–उत्तर कोरिया शिखर सम्मेलनयात कयाः छुं आधिकारिक प्रतिक्रिया मवःनि । न त जिमित थ्व बारे छुं जानकारी हे दु ।’ थ्व मामिलाय् उत्तर कोरिया सावधानीपूर्वक स्वयेत वः थःगु पक्ष ठीक ढंगं तयेगु निंतिं ई कयाच्वंगु बिचाः मन्त्रालयया प्रवक्तां प्वंकूगु दु ।
LEAVE YOUR COMMENTS