‘लाइब्रेरी अफ कंग्रेस’या अभिलेखय् नेपाःया स्रष्टाया सः
येँ (नेपालभाषा टाइम्स) – नेपालभाषा, मैथिली व खस नेपाली भाय्या स्रष्टा सः ‘लाइब्रेरी अफ कंग्रेसया’ अभिलेखय् दुथ्याःगु दु । स्वंगुलिं भाय्या करिब छगू दर्जन स्वयां अप्वः नेपाःया स्रष्टाया सः लाइब्रेरी अफ कंग्रेसया स्थायी डिजिटल अभिलेखय् दुथ्याःगु खः । नेपाःया नांजाःपिं स्रष्टापिं थःपिंसं थःगु हे सः बियाः वाचन याःगु रचनाया अंश लाइब्रेरी अफ कंग्रेसया स्थायी डिजिटल अभिलेखय् दुथ्याःगु खः ।
न्हूगु संग्रहय् नेपालभाषाया नांजाःम्ह कवयित्री प्रतिसरासाय्मिलिसें अभि सुवेदी, कालीप्रसाद रिजाल, अशेष मल्ल, कृशु क्षेत्री, ज्ञानुवाकर पौडल, सरुभक्त, श्रवण मुकारुङ, राजेन्द्र विमल, मोमिला, माया ठकुरी, धीरेन्द्र प्रेमर्षि लगायतया स्रष्टा थःपिंसं थःगु हे सलय् वाचन याःगु रचनाया अंश दुथ्याकूगु खः ।
लाइब्रेरी अफ कंग्रेसं थ्व स्वयां न्ह्यः सन् २००४ य् माधव घिमिरे, मोहन कोइराला, मदनमणि दीक्षित, ध्रुवचन्द्र गौतम, डा. बानिरा गिरी, दिनेश अधिकारी लगायतया स्रष्टाया नं थःपिनिगु हे सलय् वाचन यानातःगु रचनात संकलन याःगु खः ।
लिपांगु परियोजनां व हे परम्परायात निरन्तरता बिसे समकालीन नेपालभाषा, मैथिली व खस नेपाली भाय्या स्रष्टाया सःयात नं अन्तर्राष्ट्रिय साहित्यया अभिलेखय् दुथ्याकूगु खः ।
नेपाःलिसें बंगलादेश, पाकिस्तान, भारत, श्रीलंकाया नीगू भासं सिर्जना यानातःगु सछि स्वयां अप्वः प्रतिष्ठित स्रष्टा, च्वमिपिनिगु सहभागिता दुगु साउथ एसियन लिटरेरी रकेर्डिङ्स प्रोजेक्ट (एसएएलआरपी) दक्षिण एसियाली साहित्यिक ध्वनि सम्पदाया थ्व छगू महत्वपूर्ण परियोजना खः । उपन्यास, बाखं, चिनाखँ, च्वखँ लगायत थीथी विधाया रचनायात कःघायेगु उद्देश्यं लाइब्रेरी अफ कंग्रेसं क्षेत्र, भाषा, शैली, विषयवस्तुया विविधतायात छगू हे अभिलेखय् दुथ्याकूगु दु ।
सन् २००२ लय् शुरु जूगु एसएएलआरपी अन्तर्गत ध्वनि (सः) अभिलेखलिसें च्वमिया किपा व बःचाहाकलं म्हसीका नं दुथ्याकातःगु दु ।
LEAVE YOUR COMMENTS