सम्पदा संरक्षण व पर्यटन प्रवद्र्धनय् ख्वप नपाया सक्रियता
ख्वप (नेपालभाषा टाइम्स) – ख्वप नगरपालिकां नगर दुनेया सांस्कृतिक सम्पदा संरक्षण, संवद्र्धनलिसें पर्यटन प्रवद्र्धनय् नं सक्रियता अप्वयेका हःगु दु । ख्वप नगरपालिकां विश्व सम्पदाया धलखय् दुथ्यानाच्वंगु ऐतिहासिक व सांस्कृतिक सम्पदां जाःगु ख्वप देय्या सांस्कृतिक सम्पदा संरक्षण व पर्यटन प्रवद्र्धनयात उच्च प्राथमिकताय् तयाः थीथी योजना व ज्याझ्वः संचालन याना वयाच्वंगु दु ।
नगरपालिकां थःगु क्षेत्राधिकार दुने लाःगु मूर्त व अमूर्त सांस्कृतिक सम्पदायात पर्यटन उद्योगयात पर्यटन उद्योगया प्रमुख आधारया रुपय् विकास याना यंकाः उकिया दिगो संरक्षणया निंतिं आवश्यक नीति तथा कार्यक्रम कार्यान्वयन यानाच्वनागु न्ह्यथंगु दु ।
अप्वया वनाच्वंगु आन्तरिक व बह्य पर्यटकया चापलिसें नगर दुनेया ऐतिहासिक मठ, देगः, फल्चा, सतः, बहाः बही, ख्यः, दबू, स्मारक, मूर्ति, काष्ठकला, हस्तकलाया संरक्षणय् हाथ्या खने दयाच्वंगु नगरपालिकां न्ह्यगथंगु दु । थुकियात हे ध्यानय् तयाः सम्पदाय् लाइगु व लायेफुगु नकारात्मक प्रभाव बारे विस्तृत अध्ययन व अनुसन्धान यानाः संरक्षणया निंतिं आवश्यक उपाय नाला वयाच्वनागु नं नगरपालिकां न्ह्यथंगु दु ।
धार्मिक व सांस्कृतिक गतिविधि यायेगु झ्वलय् जुइगु अव्यवस्थित पुजा, बलि, आरति, धुं, धुपाँय्, इताः च्याकेगु नापं सिन्हः तिकेगु, रंग पायेगु लगायतया मेमेगु गतिविधिं सम्पदा संरक्षणय् जुइ फुगु क्षति नियन्त्रण्या निंतिं नं आवश्यक व्यवस्थापन व सचेतना ज्याझ्वः नं नगरपालिकां न्ह्याका वयाच्वंगु दु ।
थुकथं हे मठ, देगः परिसरय् जुइगु अवाञ्छित गतिविधि, ततःसः व कम्पन जुइगु कथंया बाजं व मेमेगु जोखिमपूर्ण गतिविधिपाखें सम्पदा संरक्षणय् लिच्वः मलायेमा धइगु ल्याखं आवश्यक मापदण्ड व व्यवस्थापनया उपायत नं नाला वयाच्वंगु दु ।
ख्वप नगर दुनेया मठ, देगः बहाः, बहीत मात्र धार्मिक आस्थाया केन्द्र जक मखसे थुपिं ऐतिहासिक, पुरातात्विक व सांस्कृतिक महत्वं जाःगु व पर्यटन उद्योगया निंतिं नं महत्वपूर्ण आधार जूगुलिं उकिया संरक्षण व संवद्र्धन यायेगु सकसिगुं मंकाः जिम्मेवारी जूगु नगरपालिकां स्पष्ट याःगु दु । थुकिया निंतिं नगरपालिकां इलय् व्यलय् सरोकारवाला निकाय, संरक्षणविद् संस्कृतिविद्, स्थानीयलिसे नं सहलह व मुँज्या यानाः सल्लाह, सुझाव कयाः संरक्षणया ज्याझ्वःयात प्रभावकारी याना वयाच्वनागु नगरपालिकां न्ह्यथंगु दु ।
छुं दिं न्ह्यः जक नं ख्वप नगर पालिकां नगरया सांस्कृतिक पर्यटन उद्योगया विकासया निंतिं सरकारी निकाय, निजी ख्यःया संघसंस्था, सरोकारवाला निकाय, संस्कृति, इतिहास व संरक्षणवद्, पुजारी लिसे सहलह यानाः राय सुझाव काःगु खः ।
LEAVE YOUR COMMENTS