ने. सं. ११४६ दिल्लाथ्व द्वादशी -

स्वीकृत परियोजना असोज दुने सिधयेकेत निर्देशन

येँ (नेपालभाषा टाइम्स) – येँ महानगरपालिकाया कार्यवाहक प्रमुख सुनिता डंगोलं चालु आर्थिक दँया निंतिं स्वीकृत जूगु व कार्यान्वयन प्रक्रियाय् यंकेगु योजनाया ज्या असोज दुने सिधयेकेत निर्देशन बियादीगु दु । कार्यवाहक प्रमुख डंगोलं थुगु आर्थिक दँया निंतिं स्वीकृत जूगु व कार्यान्वयन प्रक्रियाय् यंकेत विस्तृत परियोजना प्रतिवेदन (डीपीआर) आवश्यक जुइगु योजनया ज्या असोजया दुने सिधयेकेत निर्देशन बियादीगु खः ।

कार्यवाहक प्रमुख डंगोलया थःगु हे कार्यकक्षय् च्वंगु सहरी योजना आयोगया बैठकय् आतकया प्रगतिया बारे जानकारी कियादिसें वय्कलं थःगु हे क्षमतां याये फइगु ज्यायात प्राथमिकताय् तयाः ज्या यायेत निर्देशन बियादीगु खः ।

क्वचाःगु योजनाया संरक्षण व दिगो उपयोग यायेगु विषय न्हूगु योजना निर्माण यायेथें हे महत्वपूर्ण जू धासें न्हू निर्माणय् जक ध्यान बियाः मगाः, अर्बौं तका खर्च यानाः दयेकूगु सम्पत्तिया नं संरक्षण यायेगु दिगो उपयोगया निंतिं ज्या यायेमाः धयादिल ।

‘आःतक जूगु अध्ययन, प्रतिवेदनपाखें प्राप्त सुझाव व नागरिकया अपेक्षायात मार्गदर्शन तायेकाः पार्किङ संचालन व व्यवस्थापन, सार्वजनिक जग्गा संरक्षण, खुसि सिथया मूल्य स्थापित यायेगु ज्याझ्वः, म्हो आय दुगु परिवारया आवश्यकता, अनौपचारिक क्षेत्र, सिप, रोजगारी व डुवान व्यवस्थापनलिसें विपद् व्यवस्थापन, शिक्षा, स्वास्थ्य लगायतया नागरिकया न्हियान्हिथंलिसे स्वानाच्वंगु लागाया ज्यायात न्हापांगु प्राथमिकताय् तयाः ज्या याइ धइगु विश्वास यानागु दु ।’, वय्कलं धयादिल ।

बैठकय् आयोगया उपाध्यक्ष डा. सुमननरसिंह राजभण्डारीं वंगु स्वंगू आर्थिक दँ २०८०/०८१, २०८१/०८२ व २०८२/०८३या दुने ३२७ गू परियोजनाया विस्तृत परियोजना प्रतिवेदन (डीपीआर) तयार जूगु जानकारी बियादिल । न्हापांगु आर्थिक दँ २०८०/०८१ लय् छगू अर्ब ७५ गू करोड २१ गू लख २५,१११/– तका लागतया १२५ गू योजनाया डीपीआर, आर्थिक दँ २०८१/०८२ लय् स्वंगू अर्ब, १७ गू लख ८३,५२२/– तकाया १६४ गू परियोजनाया डीपीआर व वंगु आर्थिक दँ २०८२/०८३ ३८ गू परियोजनाया डीपीआर तयार यायेगु ज्या जूगु जानकारी बियादिल ।

बैठकय् आयोगया दुजःपिं सरस्वती मानन्धरं, प्रसुनरत्न वज्राचार्य, सुरज डंगोल, पुरुषोत्तम महत, बाबुराम भट्टराई व डा. सुरजराज काफ्लें नं थःथःगु क्षेत्रलिसे सम्बन्धित विषयय् जानकारी बियादीगु खः । आयोगया दुजःपिंमध्ये मानन्धर, वज्राचार्य व महतं वातावरण क्षेत्र, भट्टराईं पूर्वाधार व सम्पदा, काफ्लें सामाजिक व डंगोलं सूचना प्रविधि क्षेत्र स्वयादी ।