फुक्क कथंया प्रतिबन्ध चिकेमाः- इरान

एजेन्सी- इरानया विदेश मन्त्रालयया प्रवक्ता सईद खतीबजादेहं अमेरिकां इरानयात तयातःगु फुक्क कथंया प्रतिबन्ध चिकेमाःगु खँ धाःगु दु । थुकिया लिसें वय्कलं अमेरिकां न्हापा थें परमाणु सम्झौता पाखें लिचिले मखु धकाः ग्यारेन्टी बीमाःगु खँ नं धाःगु दु ।

अमेरिका व इरान दथुइ छुं ई लिपा जुइत्यंगु परमाणु वार्ताया सन्दर्भय् प्रवक्ता खतीबजादेहं थ्व खँ धाःगु खः । थ्वयां छुं ई न्ह्यव इरानया मेपिं वरिष्ठ अधिकारीतय्सं नं आः जुइगु न्हूगु सम्झौतायात कयाः अमेरिकां ग्यारेन्टी बीमाःगु खँ धाःगु दु ।

अमेरिका व युरोपेली देय्तय्सं सन् २०१५ य् इरानलिसे छगू परमाण सम्झौता याःगु खः । थ्व सम्झौता कथं इरानं थःपिनिगु परमाणु हतियार दयेकेगु कार्यक्रम दिकेमाःगु खः । तर अमेरिकाय् डोनाल्ड ट्रम्प राष्ट्रपति जुइधुंकाः अमेरिका एकपक्षीय रुपं थ्व सम्झौतां पिहां वःगु खः ।

सोमवाः इरानया प्रवक्तां यदि हाकनं सम्झौता यायेगु खःसा अमेरिकां सम्झौतां पिहां मवनेगु ग्यारेन्टी बीगु क्षमता व इच्छाशक्ति क्यनेमाः धाःगु खः ।

सम्बन्धित बुखँ

LEAVE YOUR COMMENTS