ने. सं. ११४६ दिल्लाथ्व एकादशी - हरिशयनी एकादशि, तुलसी पिइगु

स्वकीय सचिवविरुद्ध सर्वोच्चय् रिट दर्ता

येँ (नेपालभाषा टाइम्स) – संघीय सांसदतय्त निजी स्वकीय सचिव बीगु सरकारया निर्णय विरुद्ध सर्वोच्च अदालतय् रिट निवेदन दर्ता जूगु दु । अधिवक्ता प्रेमराज सिलवालं म्हिगः रिट दर्ता याःगु खः । रिटया न्हापांगु पेशी वइगु साउन ११ गते क्वःछिउगु दु । रिटय् प्रधानमन्त्री, प्रधानमन्त्री तथा मन्त्रिपरिषदया ज्याकू, कानुन, न्याय तथा संसदीय मामिला मन्त्रालय व सभामुखयात विपक्षी दयेकातःगु दु ।

वंगु साउन ४ गते जारी याःगु नेपाल राजपत्रया कथं संघीय संसदया पदाधिकारी लिसें दुजःतय्गु पारिश्रमिक व सुविधा सम्बन्धी ऐन, २०७३ या दफा २५ स बिउगु अधिकार छ्यलाः उगु हे ऐनया अनुसूचीइ हिलाबुलाः यानाः संघीय हरेक सांसद छम्ह निजी स्वकीय सचिव तयेदइ कथं सरकारं सुचं सार्वजनिक याःगु खः ।

सिलवालं तःगु रिटय् धयातःगु दु, ‘संसदया दुजः थःम्हं हे ल्ययाः वा पत्या याःगु बाहेक मेगु गुगुं नं प्रष्ट व परिभाषित योग्यता, क्षमता, अनुभव व परीक्षा म्वाःगु कथं स्वकीय सचिव तयेगु राज्यशक्तिया दुरुपयोग खः ।’

निजी स्वकीय सचिवयात नेपाःया गुगुं नं कानुनं प्रष्ट रुपं ज्या, कर्तव्य व अधिकार क्वःछिनातःगु अवस्था नं मदु । कानुन प्रतिकूल व कानुन मदयेकं राज्यकोषया दुरुपयोग यायेगु भ्रष्टाचार जूगु दाबी रिटय् यानातःगु दु । वंगु ईया सरकारया पालय् तकं ‘सांसदया निजी स्वकीय सचिव व सांसद विकास क्षेत्र सम्बन्धी बजेटया बारे सार्वजनिक न्ह्यसः ब्वलंगु लिसे पारदर्शीता व सुशासनया एजेन्डा जूगुलिं सरकारं याइगु निर्णय अन्तरिम आदेशपाखे पनेमाःगु माग नं रिटय् यानातःगु दु ।

वंगु इलय् निजी सहायक जूपिनि संलग्नता व भूमिकाय् सांसदया ह्याउँगु पासपोर्ट मीगु काण्ड जूगु, भुटानी शरणाथी काण्डय् निजी सहायक स्वाःगु, त्रिभुवन अन्तर्राष्ट्रिय विमानस्थलं जुइगु अवैध लँु तस्करी आदि गैरकानुनी धन्दाय् स्वकीय सचिवया नां स्वाःगु दावी नं रिटय् यानातःगु दु ।

वंगु इलय् गुलिखें सांसदतय्सं निजी सहायक हे मतसें छेँजःया नागरिकता व नां जक क्यनाः तलब, सेवा लिसें सुविधा थम्हं हे काःगु घटना सार्वजनिक जूगुलिं अदालतं हस्तक्षेप यायेमाःगु माग रिटय् यानातःगु दु । आर्थिक मितब्ययिताया निंतिं तत्कालीन प्रधानमन्त्री सुशीला कार्की नेतृत्वया सरकारं २०८२ असोज ५ गते सांसदया निजी स्वकीय सचिव सम्बन्धी व्यवस्था खारेज याःगु खः ।