अफगानिस्तानय् स्वन्हुया युद्धविराम

एजेन्सी – ताःई न्ह्यवनिसें लिबानाच्वंगु अफगान सरकार व तालिवान दथुया शान्तिवार्ता वइगु वालय् सुरु जुइगु सम्भावना अप्वःगु दु । अफगान राष्ट्रपति अस्रफ घानीं तालिवानलिसे मध्यस्थता वार्ता जुइत्यंगु मंगलबार संकेत बीगु लिसें निगू पक्ष दथुइ स्वन्हुया युद्धविरामया निंतिं सहमति जूगु खँ धयादीगु दु ।

न्हापांगु चरणया युद्धविराम मुस्मांतय् तःधंगु नखः इद अल-अधाया न्हापांगु न्हि शुक्रवाः निसें सुरु जुयाः थप निन्हु निरन्तर जारी जुइ । तालिवान समूहं थ्व पालय् युद्धविरामया निंतिं प्रस्ताव तःगु खः । राष्ट्रपति घानीं नं तालिवान लिसे मध्यस्थताया कुतलय् यक्व प्रगति जूगु खँ धयादीगु दु ।

थ्वयां न्ह्यः अफगानिस्तानया जेलय् बन्दी तयातःपिं तालिवान समुहया नेता, कार्यकर्ता व लडाकूतय् विनाशर्त रिहाइया विषयय् अफगान सरकार व तालिवान दथुइ खँ मिले मजुयाच्वंगु खः । तर राष्ट्रपति घानी सरकारी अधिकार ीतय्त सम्बोधन यासें धयादीगु दु, ‘शान्तिपाखे सरकारया प्रतिबद्धता क्यँसें इस्लामिक गणतन्त्र अफगानिस्तानं न्याद्वः तालिवानी बन्दीतय्त मुक्त यायेगु ज्या याकनं क्वचायेकेगु जुइ ।’

न्याद्वः तालिवानी युद्धबन्दीयात मुक्त यायेत थ्वयां न्ह्यः फेब्रुअरीइ अमेरिका व तालिवान दथुइ जूगु सम्झौताय् सहमति जूगु खः । राष्ट्रपति घानीं तालिवान समूहलिसे प्रत्यक्ष मध्यस्थता वार्ता मेगु वालं निसें सुरु जुइगु सम्भावना दुगु खँ धयादीगु दु । राष्ट्रपति घानीया प्रवक्ता सेदिक सेदिकीं काबुल सरकारं युद्धविराम पालना जू मजू अनुगमन यायेगु जानकारी बियादीगु दु । तालिवानं वंगु वालय् नं इद पर्व क्वचायेवं अफगान सरकारलिसे प्रत्यक्ष मध्यस्थता वार्ता यायेगु तयारी जुयाच्वंगु संकेत बिउगु खः । तालिवान समूहपाखें पितबिउगु छगू वक्तव्यय् तालिवानया सैन्य प्रवक्ता जबिहुल्लाह मुजाहिदं थः लडाकूतय्त इद अल अधाया अवसरय् स्वन्हु तक छुं नं सैन्य कारवाही मयायेत आदेश बियागु न्ह्यथनातःगु खः ।वय्कलं सरकार वा दुश्मन पक्षं छुं कारवाही जुल धाःसा उकियात स्वीकार यायेमफइगु ख्याच्वं नं बिउगु दु ।

अफगानय् सन् २००१ य् युद्ध सुरु जुइधुंकाः युद्धविराम जूगु थ्व स्वक्वःगुखुसी खः । थ्वयां न्ह्यः सन्२०१८ या जुन व थ्व हे दँया मे महिनाय् मादानया इलय् युद्धविराम जूगु खः । काबुलस्थित अमेरिकी कुटनीतिज्ञ रस विल्सनं युद्धविरामयात लसकुस यानादीगु दु । लिसें निगुलिं पक्षं गुलि फु उलि याकनं मध्यस्थता वार्ता याइगु विश्वास प्वंकादीगु दु ।