ने. सं. ११४६ दिल्लाथ्व द्वादशी -

एनाकोन्डां थें हित्तुहिनीम्ह स्पेन

एनाकोन्डा दूगु फिल्मत गुलि स्वयादिया ? स्वःगु ला पक्कां दयेमाः । अले थ्व एनाकोन्डां मनूतय्त हित्तुहिनाः गुकथं स्यायेयः, व खनाः भचा ग्याःगु नं दयेमाः । थन खँ ल्हाये त्यनागु दु- विश्वकप २०२६ या । तर न्हापालाक्क खँ वल, एनाकोन्डया । खास खँ छु धाःसा थ्व विश्वकपय् स्पेनं सेमिफाइनलय् फ्रान्स व फाइनलय् अर्जेन्टिनाविरुद्ध गुकथं म्हितल, वयात एनाकोन्डां विपक्षी टिमयात हित्तुहिनाः म्हितूगु कथं धायेगु सुरु जूगु दु ।

छुं मिडियां स्पेनया कासाया बयान यायेत थथेहे एनाकोन्डाया नं काःगु खः । धाथें खँ छु धाःसा विश्वकप न्ह्यानाच्वंगु इलय् उपाधिया प्रवल दावेदार कथं फ्रान्स खनेदत । अनंलि स्पेन । छुं हदतक इंग्ल्यान्ड नं । विशेषतः फ्रान्सया कासायात कयाः ला छुं बांमलाः धायेगु थाय्तकं मदु, बांलाक म्हिताः क्यंगु नं खः । मेखे अर्जेन्टिनां लियोनल मेसीया नेतृत्वय् छगू लिपा मेगु ‘कमब्याक’ यानाः कासा त्याकाच्वंगु ।

स्पेनया कासा धाःसा थ्यंमथ्यं गुपचुप हे जुयाच्वन । तर गुबलय् फ्रान्सयात वं सेमिफाइनलय् बुकल, उबलय् धायेगु सुरु जुल, स्पेनं विपक्षी टिमयात बांलाक म्हिते तकं मबिउ । उगु कासाय् किलियन एमबापें छुं हे याये मफुत धाःसां जिउ । फाइनलया बाखं नं थथे हे जुल । अर्जेन्टिनायात इकिधिकि तकं संकेमबिसे स्पेनं बुकूगु खः । अझ धाये विपक्षी टिमयात दिक्क हे जुइक हायल कायल हे यात ।

अले थ्वहे ला खः, एनाकोन्डां थें हित्तुहिंगु धयागु । मू न्ह्यसः स्पेनं गुकथं थ्व पालय्या विश्वकप त्याकल ले ? थुकिया छता हे लिसः खः, स्पेनया म्हितेगु पहः । स्पेनया म्हितूगु पहः धयागु बलय् अत्याधिक नियन्त्रण खः, अथे धयागु विपक्षी टिमयात बल हे मबीगु, अले थःथवय् पास म्हितेगु । विशेषतः फ्रान्स व अर्जेन्टिनाविरुद्धया कासाय् थथे हे जूगु खः । सन् २०१० य् स्पेनं विश्वकप त्याकूबलय् छगू म्हिते गु पहः तसकं चर्चाय् वःगु खः, टिकिटाका ।

आःया स्पेनया म्हिते गु शैली नं अथेहे तिनि, छुं भचा जक उखे थुखे जूगु दु । नत्र उबलय् नं छगू लिपा मेगु पास म्हिताः स्पेनं विश्वकप त्याकूगु खः, आः नं अथे हे म्हिताः विश्वकप त्याकल । उकिं हे खः, स्पेनी प्रशिक्षक लुइस डेला फुन्टें धाःगु, ‘जिमित थःगु म्हिते गु पहलय् गर्व दु ।’

लिपांगु इलय् विश्व फुटबलय् स्पेनया दबदबा हे दु धाःसां जिउ । थ्व मिजंतय् फुटबलय् नं खः, मिस्तय् फुटबलय् नं । स्पेन आः विश्वकप जक मखु, युरो च्याम्पियन नं खः । नापं मिस्तय्पाखे नं स्पेन हे विश्व च्याम्पियन खः, खालि युरोय् जक फाइनलय् बूगु । स्पेनं न्ह्याःगु कथंया फुटबल जूसां म्हितूगु धाःसा छगू हे पहलं खः, व धयागु थ्व हे बलयात यक्व नियन्त्रणय् तयाः छगू लिपा मेगु पास म्हितेगु ।

विश्वकप सुरु जुइ न्ह्यः सकसिनं सिउ, स्पेन तसकं बल्लाः धकाः । तर स्पेनी टिमय् लियोनल मेसी व एमबापे थेंज्याःपिं कासामि मदु । उकिं चर्चा धाःसा थुपिं हे टिमया जुल, तर कासा त्याके गु ज्या धाःसा स्पेनं यात । आः लिफः स्वयाः धाये बलय् स्पेनं विश्वकप त्याकी धकाः धाये मफुगु जक खः, तर थ्व टिमं विश्वकप त्याकेत सक्षम जू धकाः सुनां नं अस्विकार याःगु मदु ।

चर्चाय् कम वःगु कारण ला वहे स्टार कासामि मदुगु हे जुल । खास धाये गु खःसा स्पेनया विशेषता धयागु हे थ्व हे खः- टिमयात अप्वः महत्व बीगु, छगू हे पहलं म्हितेगु, स्टार कासामि धकाः हाला मच्वनेगु । ‘जिमिगु फुटबल म्हितेगु पहः हे थथे खः,’ प्रशिक्षक फुन्टें लिपा धाःगु खः, ‘थ्व ल्याखं थ्व छगू टिम जक त्याःगु मखु, बरु मुक्कं स् पे नी फुटबल त्याःगु खः ।’

मेसी नं मनू खः
फाइनल स्वये धुंकाः वःगु थीथी प्रतिक्रिया मध्ये छगू खः, लियोनल मेसी नं छम्ह सामान्य मनू हे लाना च्वन । खँ छु धाःसा मेसी विश्व फुटबलया सर्वकालीन महान कासामिमध्ये छम्ह ला जु हे जुल । वया जादुयी कासा स् वयाः कायल मजूपिं सु जक दइ ? मेसी फुटबलय् वःगु निगू दशकसिबें अप्व दये धुंकल । थ्व इलय् वया प्रदर्शन मदिक्क उत्कृष्ट हे जुयाच्वन ।

प्यदँ न्ह्यः कतारय् जूगु विश्वकप त्याकाः मेसीं विश्व फुटबलया दकलय् तःधंगु च्याम्पियनसिप त्याकेगु औपचारिकता नं पूवंकल । थुकिया दथुइ वं
निक्वः दक्षिण अमेरिकी फुटबलया दकलय् तःधंगु कोपा अमेरिका नं त्याकल । थ्वयां न्ह्यः मेसीयात छगू हे खँ धाइगु खः- वं क्लब फुटबलय् ला दक्वं त्याकल, तर थःगु देयया निंतिं धाःसा गुबलें छुं त्याके मफु । तर कोपा अमेरिकानापं विश्वकप त्याके वं मेसीयात थथे नं धाये गु थाय् मंत । कतार विश्वकप धुंकाः मे सीया न्ह्यःने शानदार पूर्वक संन्यास कायेगु अवसर नं दुगु खः । तर वं अथे मयाः, बरु निरन्तर म्हिता हे च्वन । थुकिया हे झ्वलय् मेसीया आःया विश्वकपय् प्रदर्शनं उच्च हे जुल । फाइनल छगू त्वःताः मे सीया प्रदर्शनय् धाये गु थाय् हे मदु, प्रशंसा हे याये माः ।

फाइनलया खँ धाःसा मेता हे जुयाबिल । विश्वास हे याये थाकू कि मेसीं स्पेनविरुद्धया फाइनलय् छगू हे आक्रमण धाये छिंगु प्रहार मयाः । अतिरिक्त ई पाखे छगू प्रहारया अवसर चूलाःगु खः, तर व नं दिशाय् मलात । थुकथं मेसी जक मखु, मुक्कं अर्जेन्टिनी टिमं ९० मिनेटया कासाय् स्पेनविरुद्ध छगूयां छगू आक्रमण नं याये मफुत । उकिं हे खः, मेसीयात नं छम्ह सामान्य मनू हे धायेगु याःगु ।

सामान्य मनू मखुगु खःसा ला वं स्पेनविरुद्ध नं उतिकं सनसनीपूर्ण कासा म्हितेफये माःगु खः । तर फाइनलय् बुइवं मेसीया विश्व फुटबलय् योगदान धाःसा म्हो जुइमखु, अप्वः हे दु । मेसीयात सकसियां ययेके हे माःगु धयागु मदु, गनं थथे च्वयातःगु नं मदु । तर वया उत्कृष्ट कासायात कयाः प्रशंसा धाःसा यायेहे माः । झीगु नितिं ला मेसीया कासा स्वये दुगु हे तःधं ।

थनथाय् छता खँ न्ह्यथने हे माः, अर्जेन्टिनायात कयाः । फाइनलय् बुइवं अर्जेन्टिनी टिमया व्यवहारयात कयाः धाःसा आलोचना जूगु दु, अले थ्व
स्वभाविक नं खः । गुकथं अर्जेन्टिनी कासामितय्सं स्पेन त्याःगु कासायात स्वीकार याये मफुत, उकिं क्यं थ्व टिमया कासा भावना भचा कम जूगु जुयाच्वन । अर्जेन्टिना फाइनलय् बांमलाक बूगु हे खः, थ्व खँ टिमं नं स्विकार याये माःगु हे खः ।

स्पेनया टिमं गुबलय् विश्वकप ट्रफि ल्ह्वना लसता हनाच्वंगु खः उबलय् अर्जेन्टिनी टिमं धाःसा विपरित दिशाय् स्वयाच्वंगु खः । थुकियात सुनानं
मययेकू । उकिं अर्जेन्टिनी टिमयात हे खलनायक धायेगु नं सुरु जूगु दु । उलि जक मखु, अर्जेन्टिनायात फाइनल तक थ्यंकेत फिफां ग्वाहालि यात, रेफ्रीं उमिगु पक्षय् निर्णय यात धयागु खँ नं खः थें तायेफु, टिमया व्यवहार स्वयाः ।

भाग्यं ल्हाः फःगु विश्वकप
थ्व विश्वकपयात कयाः सकसिनं धाइगु छता हे खँ धायेगु याः, व खः- आः तकया दकलय् तःधंगु विश्वकप । थ्व ल्याखं थ्व विश्वकपय् यक्वं विवाद
जुइगु, व्यवस्थापनय् समस्या जुइगु सम्भावना दयाच्वंगु खः । अझ धाये , छगू कथंया ग्याचिकु दयाच्वंगु खः । तर धायेहे माः, भाग्यं ल्हाः फःगु विश्वकप खः थ्व । यक्व खँ स्यनेमाःगु थें खने दुगु खःसां थुकिया अःखः थ्व विश्वकपय् यक्व खँ अजूचायापुक भिन ।

अमेरिका, क्यानाडा व मेक्सिकोया ग्वसालय् जूगु थ्व विश्वकपयात कयाः दकलय् तःधंगु चिन्ता जुयाच्वंगु खः, भौगोलिक ल्याखं थुलिमछि तःधंगु
थासय् गथे यानाः कासा जुइगु जुइ ? तर जुल । दकलय् तःधंगु समस्या वये वनेत जुइफुगु खः । छगू देसं मेथाय् वनेत नं समस्या जुइमाःगु खः । विवाद व समस्या मवःगु नं मखु, तर उपिं कासा ख्यः दुने या जुल, पिने मखु ।

छुं हे कथंया दुर्घटना मजू, गुकिं विश्वकप हे बदनाम जुइफुगु खः । तर अथे छुं नं मजू । थ्व हे आः या विश्वकपया दकलय् तःधंगु खँ जुल । अले
स्वकुमित गुकथं कासा स्वयेत रंगशालाय् हे थ्यन, थ्व मेगु लसताया खँ जुल । थथे छाय्धाःसा तसकं थिके गु टिकटया कारणं कासा जुइगु रंगशाला खालि खालि जुइ ला धयागु अवस्था दयाच्वंगु खः । थुकिं थ्व विश्वकपं सुं छम्ह दकलय् लय्ताःगु दुसा व फिफा खः, फिफाया नायः जियानी इन्टाफन्टिनो खः ।

विश्वकप क्वचाये वं इन्टाफिन्टिनाें धाये नं धुंकल, आः तकया हे दकलय् सफल विश्वकप । थ्व विश्वकप छु इलय् जूगु खः, उगु इलय् अमेरिका,
क्यानाडा व मेक्सियाया मौसम नं उतिकं दुःख बीगु कथंया खः । दकलय् न्हापां ला थ्व इलय् विशेषतः अमेरिकाय् तसकं तांन्वइ । तान्वइगु नं गथे धाःसा छेँ नं पिहां मवंसां जिउ धायेमाः कथं । तर थ्व मौसमं तकं आःया विश्वकपयात ग्वाहालि यात ।

तसकं तांन्वया समस्या हे थ्यंक मवः । थ्यंमथ्यं कासा न्ह्याके जिउगु मौसम हे जुयाच्वन । थ्व व हे ई खः, गुबलय् अमेरिकाय् तसकं ग्वफय् वइ । छगू निगू कासा थ्व हे सम्भावना दथुइ लिबाक्क सुरु जुल, अथवा दथुइ दिकाः न्ह्याके माल । तर तसकं गम्भीर ल्याखं छुं हे मजू । दकलय् ग्याचिकु ला स्वयं अमेरिकी राष्ट्रपति डोनाल्ड ट्रम्पयात कयाः नं दयाच्वंगु खः ।

ग्याःचिकु छाय् धाःसा ट्रम्पं छुं नं इलय् तसकं अप्रत्यासित निर्णय यानाः विश्वकपयात हे स्यंका बीफु । उकिसनं खाडी युद्ध न्ह्याना च्वंगु ई । थ्व हे इलय् इरानं अमेरिकाय् वयाः नं म्हितल । पूरा विश्कपय् ट्रम्पं धाथें धायेगु खःसा छुं हे कथं दुःख मबिउ, खालि अमेरिकाया छम्ह कासामियात रेड कार्ड मबिउसां जिउ जक धायेगु बाहेक । अले दथुइ दथुइ छुं कासायात कयाः सामान्य प्रतिक्रिया नं बिल ।

ट्रम्पं छुं हे विवाद मयासे सुम्क च्वनाः विश्वकप न्ह्याकेत ग्वाहालि यात । ट्रम्प फाइनल स्वयेत धाःसा वल, नत्र वं थ्व विश्वकप हे मस्वः धाःसां जिउ । स्पेनयात विश्वकपया ट्रफि लःल्हाःम्ह नं व हे खः । उबलय् व तसकं लय्ताःगु खने दत । अले इन्फान्टिनो नापं खँयाखँ स्वाकाः वं धाल- थ्व विश्वकप तसकं सफल जुल, आः तकया हे दकलय् सफल विश्वकप ।