थाइल्याण्डया हुलाप्याखं कासाय् एनडीएया उत्कृष्ट प्रदर्शन
येँ (नेपालभाषा टाइम्स) – थाइल्याण्डय् जूगु हुलाप्याखं कासाय् नेपाः डान्स एकेदेमि (एनडीएं) उत्कुष्ट प्रदर्शन यायेत ताःलाःगु दु । थाइल्याण्डया राजधानी बैंककय् जूगु ‘ग्लोबल लिग एक्स जीएलएक्स डान्स च्याम्पियनसिप २०२६’ य् नेपाःया प्रतिनिधित्व यासें नेपाः डान्स एकेदेमि जुनियर क्रुं उत्कृष्ट प्रदर्शन याःगु खः ।
विश्वया ५० गू देशं ब्वति काःगु च्याम्पियनसिपय् एनडीए जुनियर क्रुं थीथी विधाय् उत्कृष्ट प्रदर्शन यासें पदक नं त्याकूगु खः । झिंखुम्हेसिया एनडीए जुनियर क्रुं ‘टिन्स डिभिजन’ य् न्हाप, ‘मेगा त्र्mयु डिभिजन’य् न्हाप व ‘जुनियर टिम डिभिजन’य् लिउ सिरपाः त्याकेत ताःलाःगु खः ।
थुकिया लिसें नेपाः पुचलं ‘बेस्ट आउटफिट’ व ‘बेस्ट कोरियोग्राफी’ उपाधि नं त्याकेत ताःलाःगु एनडीएं जानकारी बिउगु दु ।
थ्व स्वयां न्ह्यः सन् २०२५ य् दुबईलय् जूगु ‘वर्ल्ड सुपरमेसी ब्याटलग्राउण्ड’ य् नं शीर्ष न्यागू थाय् हासिल याःगु खःसा ‘वर्ल्ड अफ डान्स नेपाल सिजन २’ लय् नं एनडीए जुनियर क्रु लिउ लायेत ताःलाःगु खः ।
रोहिया महर्जन व श्रीष्टि महर्जनं नेतृत्वय् वंगु पुचलय् श्रीष्टि महर्जन, स्वस्तिक अर्याल व सरोज मोक्तानं कोरियोग्राफी यानादीगु खः ।
LEAVE YOUR COMMENTS