उत्तर कोरियापाखें क्षेप्यास्त्र परीक्षण स्थगित यानागु घोषणा
उत्तर कोरियाली नेता किम जङ अनं फुक्क कथंया क्षेत्रप्यास्त्र परिक्षण स्थगित यायेगु व तत्काल लागु जुइकथं छगू परमाणु परीक्षण केन्द्र बन्द यायेगु घोषणा याःगु दु । कोरियाली सेन्ट्रल न्यूज एजेन्सीं धाःकथं ‘अप्रिल २१ निसें उत्तर कोरियां पारमाणविक व अन्तरमहादेशीय ब्यालेस्टिक क्षेप्यास्त्र परिक्षण बन्द याइ ।’
सरकारी संचार माध्यमतय्सं थ्व निर्णयया उद्देश्य शानित व आर्थिक वृद्धि हासिल यायेत खः धकाः न्ह्यथँगु दु । कोरियाली द्वीपय् शान्तिया निंतिं जुयाच्वंगु पहलया झ्वलय् वइगु वालय् दक्षिण कोरियाली किमं समकक्षी मून जे इनयात नापलायेत्यंगु दु । अथेहे अमेरिकी राष्ट्रपति डोनाल्ड ट्रम्पयात वइगु जूनपाखे शिखर वार्ता यायेगु तयारी यानाच्वंगु दु ।
क्षेप्यास्त्र परीक्षण बन्द यायेगु किमया घोषणा लिपा ट्विट यासें अमेरिकी राष्ट्रपति ट्रम्पं धाःगु दु, ‘थ्व उत्तर कोरिया व विश्वया निंतिं तसकं हे सुखद खबर खः । तःधंगु प्रगति ।’ ट्रम्पं ‘उत्तर कोरिया निशस्त्रीकरणय् वन धाःसा थुकिं वयात निंतिं बांलाःगु लँपु चूलाइ’ धाःगु दु ।बिहीवार हे दक्षिण कोरियाली राष्ट्रपति मूनं उत्तर कोरिया पूर्ण रुपं निशस्त्रीकरणया निंतिं तयार दुगु खँ धयादीगु दु ।
वय्कलं निगू कोरिया दथुइ जुइगु शिखर वार्तां तःधंगु कल्पना यायेमाःगु व रचनात्मक समाधान मालेमाःगु खँ धयादीगु दु । मूनं ट्रम्प व किम दथुइया शिखर वार्ता सफल जुइगु बिचाः नं प्वंकादीगु दु ।
किमं परीक्षण आः हे छाय् दिकल
बिबिसी – उत्तर कोरियां तत्काल पारमाणविक व क्षेप्यास्त्र परीक्षण दिकेगु किम जङ अनया घोषणा उत्तर कोरियां निगू महत्वपूर्ण कुटनीतिक घटनाया निंतिं तयारी यानाच्वंगु अवस्थाय् वःगु दु । उत्तर कोरियाया घोषणायात पारमाणिविक व ताःहाकःगु दूरीया क्षेप्यास्त्र परीक्षणया अन्त्यया रुपं स्वयाः निश्चय नं उल्लासपूर्ण समाचारत वइ जुइ ।
तर उगु देय्या ऐतिहासिक पृष्ठभूमि व वयागु पारमाणविक व क्षेप्यास्त्र कार्यक्रमया सन्दर्भ स्वयेगु खःसा थ्व अपेक्षा फिक्का जुइफु ।पारमाणविक परीक्षणया प्रसंग स्वये–शनिवाः पितबिउगु वक्तव्यं किम जङ अनं स्वेच्छिक रुपं परीक्षण दिकेत ल्ह्वःगु पलाः धयागु प्रष्ट जू । सन् २००६ लिपा फुक्कं खुगुलिं पारमाणविक परीक्षणस्थल छाय् बन्द यायेत्यन धाःसां वयागु देशं आः पारमाणविक अस्तया प्रारुपय् विज्ञता चूलाकेधुंकूगु महसुस यानाच्वंग्ु दु ।
थुकिया पुष्टि यायेत ला थाकु, तर थ्व दावी पक्का नं बढेचढे यानातःगु व अविश्वसनीय धाःसा मखु ।भारत व पाकिस्तानयात हे स्वये– सन् १९९८ तक निगुलिं देशं खुगू खुगू पारमाणविक परीक्षण यायेधुंकूगु खः । आः थ्व निगुलिं देय् पारमाणविक अस्त्र दुगु देय्या धलखय् लानाच्वंगु दु, थप मेगु परीक्षण विना । पारमाणविक अस्त्रया प्रारुप सम्बन्धी ज्ञानया अतिरिक्त च्यादँ तकया पहुँच व खुगू पारमाणविक परीक्षण धुंकाः उत्तर कोरियां अथेहे महसुस यानाच्वंगु दु ।
क्षेप्यास्त्रया प्रसंगय् किमं आवंलि अन्तरमहादेशीय ब्यालेस्टिक क्षेप्यास्त्र परीक्षण मयायेगु खँ धयादीगु दु । छखें थ्व तसकं अजूचायापु, छाय्धाःसा उत्तर कोरियां परीक्षण याःगु फुक्क कथंया क्षेप्यास्त्र मध्ये स्वंगः जक अमेरिका थ्यंकेफइगु खनेदु । तरथ्व परीक्षणय् छ्यःगु छुं नं क्षेप्यास्त्र पारमाणविक प्रहारया निंतिं आवश्यक मार्ग जुयाः प्रक्षेपित याःगु मखु ।
अमेरिकाय् जूसा पारमाणविक आक्रमण यायेगु क्षमताय् विश्वस्त मजूतले वं थप परीक्षण याना हे च्वने आवश्यक तायेकी । तर उत्तर कोरियाया मेमेगु योजना नं दयेपु्m ।गथेकि, अमेरिकायात प्राविधिक रुपं धम्की बिइगु आवश्यक फुक्कं खँ चूलाके ला धुंकूगु दु ।,
LEAVE YOUR COMMENTS