बेलायतय् एक तिहाइ संक्रमित अल्पसंख्यक समुदाययापिं

बीबीसी – छु दिं न्ह्यः जक छगू तथ्यांकं अमेरिकाय् कोरोना भाइरसया कारणं अल्पसंख्यक समुदाययापिं अप्व सीफूगु बुखँ सार्वजनिक जूगु खः । थ्व लिपा बेलायतय् याःगु छगू अनुसन्धानं अन नं अज्याःगु हे स्थिति दुगु खँ पुष्टि जूगु दु ।

अनुसन्धानया तथ्यांक कथं कोरोनाया संक्रमणपाखें अस्पतालय् तसकं गम्भीर जूपिं एक तिहाइ मनूत अल्पसंख्यक समुदाययापिं दु । सन् २०११या तथ्यांक कथं बेलायत व वेल्सय् अल्पसंख्यक समुदायपिं मुक्कं १४ प्रतिशत जक दु । तर बेलायतया गहन चिकित्सा लेखा परीक्षण व अनुसन्धान केन्द्रया कथं कोरोनाया कारणं गम्भीर बिरामी जूगु ३४ प्रतिशत संक्रमित अश्वेत, एशियाली व अल्पसंख्यक समुदाययापिं खः ।

अनया लेबर पार्टीं थज्याःगु समुदाय छाय् तसकं संवेदनशील अवस्थाय् दुगु धकाः छानबिन यायेत माग याःगु छुं लिपा थज्याःगु तथ्यांक सार्वजनिक जूगु खः । सरकारं धाःसा स्वास्थ्य क्षेत्रय् जुयाच्वंगु असमानतायात चीकेगु निंतिं थःपिं प्रतिबद्ध दुगु खँ धाःगु दु ।