इबोला संकट, रुवान्डां कंगोलिसेया सीमा बन्द यात

प्राणघातक संक्रामक ल्वय् इबोलाया कारणं अफ्रिकी देय् रुवान्डां थः जःलाखःला देय् कंगोलिसेया सीमा बन्द यानाबिउगु दु । कंगोय् इबोलाया संक्रमण अप्वया वनेवं रुवान्डा सीमा बन्द यानाबिउगु खः । थःगु सीमा लिक्कसं लाःगु कंगोया शहर गोमाय् स्वम्ह मनूतय्के इबोलाया संक्रमण खनेदयेवं रुवान्डां सीमा बन्द यानाबिउगु खः ।

कंगोया राष्ट्रपतिया ज्याकुथिं रुवान्डां एकपक्षीय रुपं सीमा बन्द यानाबीगु खँ धाःगु दु । थन दैनिक जीवनयापतया निंतिं स्थानीय मनूत सीमालिक्क लाःगु सहरय् वये वनेगु चलन दु । रुवान्डां आकाझाकां सीमा बन्द यानाबिउगुलिं कंगोया मनूतय् दैनिक जीवनय् हे लिच्वः लाःगु धासें कंगों आपत्ति प्वंकूगु दु ।

सीमा बन्द यानाबीवं २० लाख जनसंख्या दुगु कंगोया गोमा शहर व ८५ हजार जनसंख्या दुगु रुवान्डाया गिसेन्यी शहर दथुइया आवतजावत हे बन्द जूवंगु दु ।

सन् २०१८ या अगस्ट निसें कंगोय् न्यना वनाच्वंगु इबोलाया कारणं आःतक १ हजार ८०३ म्हेसिया ज्यान वनेधुंकूगु दु । गोमा शहरय् संक्रमित स्वम्ह मध्ये निम्हेसिया मृत्यु जुइधुंकूगु दु । स्वास्थ्य अधिकारीतय्सं शहरी लागाय् थ्व ल्वय् अझ तिव्र गतिं संक्रमण जुइगु खँ धाःगु दु ।