अफगानिस्तानया अन्तर्राष्ट्रिय विमानस्थल अमेरिकी सेनाया कब्जाय्

एजेन्सी- अमेरिकी सेनां अफगानिस्तानया राजधानी काबुलय् च्वंगु हामिद कारजाइ अन्तर्राष्ट्रिय विमानस्थल थःपिनि कब्जाय् तःगु दु । अमेरिकी सेनां एयर ट्राफिक कन्ट्रोल नं थःपिनिगु नियन्त्रणय् काःगु दु । अमेरिकी सेनां विमानस्थलय् हवाइफायर नं याःगु दु । विमानस्थलय् जूगु हवाइफायरया गोलीं लानाः स्वम्ह मनू सीगु दु । विमानस्थलय् हवाइफायर लिपा सैन्य उडान त्वःताः दक्व उडान अमेरिकी सेनां रद्द याःगु दु ।

तालिबानतय्सं अफगानिस्तानयात कब्जाय् कायेवं यक्व मनूत अफगानिस्तान त्वःताः वनेत स्वयाच्वंगु खः । थ्व हे कारणं विमानस्थलय् तसकं हे भीड जूगु व भीड नियन्त्रण यायेत अमेरिकी सेनां हवाइफायर याःगु खः । विमानस्थलय् अफगानी नागरिक जक मखु, विदेशी नागरिकत नं थानाच्वंगु दु । सार्वजनिक जुयाच्वंगु थीथी भिडियोय् विमानस्थलय् तःधंगु भीड खनेदु । उडान रद्द यानाः अमेरिकी सेनां मनूतय्त विमानस्थलं पितिना छ्वःगु खः । नेटो विमानस्थल याकनं हे सञ्चालन यायेगु धाःगु दु ।

मनूत विदेशय् बिसिउँ वनेत स्वयाच्वंगु इलय् तालिबानतय्सं धाःसा अफगानिस्तानय् स्थिरता व शान्ति कायम यायेगु प्रतिबद्धता प्वंकूगु दु । तालिबान नेता मुल्लाह बराखर अखुन्दं छगू भिडियो सन्देश जारी यानाः नागरिकया सेवा यायेगु व नागरिकया जीवनस्तरय् सुधार हयेगु धाःगु दु । नेता मुल्लाहं देशय् स्थिरता हयेगु व नागरिकया जीवन सहज व समृद्ध यायेगु नं धाःगु दु । तालिबानया प्रवक्ता सुहेल शाहीनं तालिबान लडाकुतय्त सर्वसाधारणया छेँय् अनुमति मदयेक दुहां मवनेत नं निर्देशन बिउगु दु ।

तालिबानतय्सं सार्वाजनिक याःगु भिडियो व थीथी ट्विट स्वयेबलय् तालिबानत न्हापा सिबें उदार खनेदुसां अफगानी नागरिकतय्सं तालिबानतय्त विश्वास याःगु खनेमदुनि । विमानस्थलय् जूगु भीड थुकिया छगू दसि खः । अफगानिस्तानय् च्वपिं मिस्त नं थःपिंके दयेधुंकूगु स्वतन्त्रता मदइ धकाः ग्यानाच्वंगु दु ।

तालिबानत आः याकनं हे सत्ताय् वइगु जुइ । तालिबानं सत्ताय् वयेवं दकलय् न्हापां इस्लामिक राज्यया स्थापना जूगु घोषणा यायेगु धाःगु दु । तालिबान सरकारया नेतृत्व सुनां याइ धयागु नं स्पष्ट मजूनि ।

थ्व हे झ्वलय् तालिबानं अफगानिस्तान कब्जाय् कायेधुंकाः अमेरिका लिसें ६५ गू देसं थःपिनि नागरिकतय्त देसय् स्वतन्त्र रुपं लिहां वयेके बिइमाःगु माग यानाः मंकाः विज्ञप्ति पिकाःगु दु । थीथी देसं थःपिनि दूतावास बन्द यायेधुंकूगु दु । मेखे चीन व रुसं धाःसा दूतावास बन्द मयायेगु संकेत बिउगु दु । पाकिस्तान व टर्कीं नं दूतावास बन्द जुइ मखु धाःगु दु । भारतं नं दूतावास बन्द याःगु मदुनि ।

थ्वया हे दथुइ अमेरिकाया पूर्व राष्ट्रपति डोनाल्ड ट्रम्पं अमेरिकाया राष्ट्रपति जो बाइडेनया राजीनामा फ्वंगु दु । पूर्व राष्ट्रपति ट्रम्पं अफगानिस्तान सरकारया असफलताया जिम्मेवार जो बाइडेन जूगु व थः राष्ट्रपति जूगु खःसा थथे मजुइगु नं धाःगु दु । तालिबानतय्सं राजधानी काबुलयात कब्जाय् कायेवं अफगानिस्तानया राष्ट्रपति असरफ घानी देय् त्वःताः बिसिउँ वनेधुंकूगु दु । थीथी स्रोतं बिउगु जानकारीकथं घानीं ताजकिस्तान वंगु दु । घानीं फेसबुक मार्फत् देसय् रक्तपात मजुइमाः धकाः थःम्हं देय् त्वःतागु धाःगु दु ।