गुन्हुतक न्यासि वनाः खिचां न्यानाबिल

संसारय् मनूलिसे अतिकं सतीम्ह प्राणी खिचायात थः हे छेँजःथें यानाः लहिनातइपिं आपालं दु । अले थ्व खँय् नं छुं दुविधा मदु कि खिचां छेँया सुरक्षा नापं मनूयात नं रक्षा याःगु समाचार झीसं इलय्व्यलय् न्यना वयाच्वनागु हे खः । छेँ, त्वालय् वा लँय् म्हमसिउपिं मनूत वल धाःसा न्यनां न्यने मजीक उयाः खिचां सतर्क यायेगु याइ ।

सुं नं खिचां आतक थः हे मालिकयात होच्याक न्याःगु धइगु न्यने मदु । तर अमेरिकाया न्यू मेक्सिकोया छम्ह खिचा थः हे मालिकयात बांमलाक न्याना बिउगु दु । थुम्ह खिचाया बारे पूवंक खँ सीकादिल धाःसा तसकं अजू चायेमाली । उम्ह खिचां थः मालिकयात वां न्यायेत गुन्हुतक मदिक्क न्यासि वनाच्वंगु खः ।

थ्व झ्वलय् उम्ह खिचां १०० किलोमिटरया दूरी पार यानाः थः मालिकयात नाप लाकाः तसकं बांमलाक न्याना बिल । खिचां थः मालिकयात हे थुकथं न्याना बिउगु घटना गुलि अजू चायापु, उकिया बाखं उलि हे भावुक नं जू ।सेन्टियागो मार्टिनेज नांया खिचा थुवाः विदा माने यायेत अप्वः थें अल्बयुक्रेन धइगु थासय् वनीगु जुयाच्वन ।

थुगुसी नं छुं दिं न्ह्यः मार्टिनेज विदा माने यायेत वंगु इलय् वं थः खिचायात नापं मयंकुसे छेँय् हे त्वःता थकूगु जुयाच्वन । समुद्र सिथय् विदा माने यानाच्वंम्ह मार्टिनेजं गबलें म्हगसय् तकं खंगु खइ मखुकि थम्हं छेँय् त्वःता थकूम्ह खिचा उलिमछिं यात्रा यानाः विदा माने यानाच्वंगु थासय् थ्यंकः वइ धकाः ।

गुन्हु लिपा आकाझाकां थम्हं लहिनातयाम्ह खिचा थःगु न्ह्यःने खनेवं मार्टिनेज छझाःला झसंग वन । खिचायात खनेवं मार्टिनेजं तसकं माया यानाः वयात घय्पू वन तर तम्वयाच्वंम्ह खिचां वयात ल्हातय् वां न्यानाबिल । खिचां न्यायेवं जब मार्टिनेजं मिखां ख्वबि हायेकल, अबलय् धाःसा हाकनं खिचां मार्टिनेजयात ख्वालय्, न्यतालय्, म्हय् फ्यत्तुफ्ययाः माया यात ।