अन्ततः ट्रम्पं नं मास्क तल

एजेन्सी – अन्ततः अमेरिकी राष्ट्रपति डोनाल्ड ट्रम्पं नं मास्क तःगु दु । अमेरिकाय् कोरोनाया महामारी सुरु जुयधुंकाः न्हापांखुसी राष्ट्रपति ट्रम्पं सार्वजनिक ज्याझ्वलय् मास्क तःगु खः । थ्वयां न्ह्यः राष्ट्रपति ट्रम्पं मास्क तये आवश्यक मदु धकाः धया वयाच्वंगु खः ।

म्हिगः घाःपाः जूपिं सिपाही व स्वास्थ्यकर्मीतय्त नापलायेत वाशिंगटनं पिने छगू सैनिक अस्पतालय् वंबलय् ट्रम्पं मास्क तःगु खः । म्हिगः मास्क तयेधुंकाः ट्रम्पं धाःगु दु, ‘जि गुबलें नं मास्क तयेगु विपक्षय् मदु, तर ई व थाय् स्वयां थुकिया छ्यलाबुला यायेमाः धयागु जक जिगु विश्वास खः ।’

थ्वयां न्ह्यः ट्रम्पं राष्ट्रपतीय चुनाव अभियानया निंतिं जूगु सार्वजनिक ज्याझ्वलय् तकं मास्क मतसे वंगु खः । उलि जक मखु, वय्कःया प्रतिस्पधीृ डेमोक्रेटिकया जो बाइडनं मास्क तल धकाः तकं वय्कःया खिस्सि यानादीगु खः ।

वंगु अप्रिलय् अमेरिकाया सेन्टर्स फर डिजीज कन्ट्रोल एण्ड प्रेभेन्सन (सीडीसं) भाइरस न्यंके मबीगु निंतिं मनूतय्सं मास्क वा कापतं म्हुतु त्वपुइत सिफासिर याःबलय् ट्रम्पं थःम्हं थुकिया अनुसरण यायेमखु धकाः धयादीगु खः ।