नीला लिपा अमेरिकाया सीमा चाल

एजेन्सी- अमेरिकां नीला लिपा सकलें विदेशीतय्गु निंतिं थःपिनिगु सीमा चायेकूगु दु । पुलांम्ह राष्ट्रपति डोनाल्ड ट्रम्पं कोभिड १९या कारणं २०२० या मार्चय् तयातःगु आवागमन प्रतिबन्ध सोमवाः निसें चिइकूगु खः । थ्व प्रतिबन्ध चिइकेवं आः पूर्ण खोप कायेधुंकूपिं अमेरिका दुहां वनेफइगु जूगु दु ।

प्रतिबन्धया कारणं बेलायत व युरोपील संघया छुं छुं देय् लिसें स्वीगू देय्या नागरिक अमेरिकाय् वनेमफयाच्वंगु खः । थुकिं यानाः अमेरिकाया पर्यटन क्षेत्रय् तकं बांमलाक लिच्वः लाकूगु खः ।
अमेरिकी अधिकारीतय्सं अमेरिका दुहां वइपिं विदेशीतय्सं खोप काःगु मकाःगु सजगतापूर्वक स्वइगु खँ धाःगु दु । अमेरिका दुहां वने चाहे जूपिंसं अन वने न्ह्यः हे पूर्ण मात्राया खोप कायेधुंकूगु प्रमाणपत्र, यात्राया स्वन्हु न्ह्यःया कोभिड नेगेटिभ जूगु रिपोर्ट व थःगु सम्पर्क विवरण बीमाली । अमेरिका थ्यनेधुंकाः उपिं क्वारेन्टिनय् धाःसा च्वने माली मखु ।

अमेरिका दुहां वइपिं विदेशीतय् निंतिं न्हय्गू खोपयात मान्यता बिउगु खः । अमेरिकां सीमा चायेकेवं थन वनीपिं यात्रुतय् चाप तसकं अप्वःगु दु । अमेरिकाया डेल्टा एयरलाइन्सया प्रमुखं अमेरिकाय् ब्वयेगु निंतिं यात्रुतय्सं पाः पीमालीगु अवस्था वयेफुगु खँ धाःगु दु ।