‘भारतय् लकडाउन थप जुइगु सम्भावन कम’

एजेन्सी – अप्रिल १५ तारिख तकया निंतिं देय्न्यंक लकडाउन यानातःगु भारतय् लकडाउनया ई हानं थप जुइगु सम्भावन न्यगू दुगु खँ छम्ह भारतीय अधिकारीं धाःगु दु । देय्न्यंक लकडाउनया कारणं द्वलंद्व गरीव मनूतय्त न्ययेगु त्वनेगु समस्या जूगु व आपलं मनूतय्त न्हिया न्हिथं माःगु अत्यावश्यक सामान तकं मदुगुलिं सरकारं लकडाउनया ई थप यायेगु न्हूगु योजना मदयेकेफूगु खँ धाःगु दु ।

‘लकडाउनया ई नीछन्हु स्वयां अप्व वनी धइगु खँय् छुं सत्यता मदु’, भारतीय मन्त्रिपरिषदया सचिव राजीव गौबां धयादी, ‘नीछन्हु स्वयां अप्व ई थप यायेगु योजना सरकारया मदु ।’

कारोना भाइरसया संक्रमणपाखें बचे यायेगु निंतिं भारतीय सरकारं अप्रिल १५ तक लकडाउनया निर्णय याःगु खः । उगु निर्णय लिपा भारतय् द्वलंद्वः मनूतय्सं थःगु ज्या तंकेमाःगु व न्यये तकं मदयाः समस्या जुयाच्वंगु दु ।

आः तक भारतय् १ हजार ७१म्ह मनूत कोरोनापाखें संक्रमित जूगु दुसा २९म्ह मनूत सीधुंकूगु दु ।

(ने. सं. ११४० चौलाथ्व ६/ वि. सं २०७६ चैत १७, साेमवाः)