बंगलादेशय् वेपत्ता याइपिंत मृत्युदण्डया प्रस्ताव

ढाका – बंगलादेश सरकारं बलपूर्वक वेपत्ता याइपिंत मृत्युदण्डया सजाय बीगु प्रस्ताव हःगु दु । बंगलादेश सरकारं बलपूर्वक वेपत्ता यायेगु घटनाय् संलग्न जूपिं व्यक्तियात मृत्युदण्डया सजाय बीगु कानुनी व्यवस्थाया प्रस्ताव याःगु खः ।

पदच्युत जूम्ह बंगलादेशया प्रधानमन्त्री शेख हसिनाया शासन कालय् झिंन्यासः स्वयां अप्वः मनू जबरजस्ती वेपत्ता याःगु घटना आधारिक अनुसन्धान लिपा सरकारं उकथंया कानुनी व्यवस्थाया विधेयक हयेगु तयारी याःगु खः ।

सन् २०२४ या जनविद्रोह लिपा देय्या सत्ताय् वःगु हिउपाः लिपा गठन याःगु अनुसन्धान आयोगं शेख हसिनाया १७ दँया शासनकालय् म्होतिं नं १,५६९ म्ह मनूयात बलपूर्वक वेपत्ता याःगु घटनाया अभिलेख तयार याःगु खः । आयोगयाकथं उकीमध्ये २५१ म्ह अझं वेपत्ता हे जुयाच्वंगु व इपिं सीधुंकूगु माने याःगु दु ।

सरकारं तयार याःगु बलपूर्वक ‘वेपत्ता यायेगु ज्याया रोकथाम व उपचार ऐन’ सम्बन्धी विधेयक संसदं पारित यायेधाःसा ल्यं दनि । मन्त्रिपरिषदं सोमवाः स्वीकृत याःगु मस्यौदाकथं बलपूर्वक वेपत्ता यायेगु घटनाय् पीडितया मृत्यु जुल धाःसा दोषीयात मृत्युदण्डया बी फइगु कथंया प्रस्ताव यानातःगु दु ।