अल्पमतया सरकारय् वज्राचार्य छाय् मन्त्री जुल ?
सहरी विकास मन्त्रीया सपथ, राप्रपां एमाले दुने म्हिताच्वन
येँ (नेपालभाषा टाइम्स) – बागमति प्रदेशय् सरकार दयेकेगु निंतिं एमाले व नेपाली कम्युनिष्ट पार्टी दथुइ सहमति जूसां थन सुनां सरकार दयेकी धयागु अन्योल हे जुयाच्वंगु दु । म्हिगः जक हाम्रो नेपाल पार्टीया शैलेन्द्र वज्राचार्ययात कांग्रेसया मुख्यमन्त्री इन्द्र बानियाँ मन्त्री दयेकेवं बागमतीइ सरकार दयेकेगु निंतिं तःधंगु धेंधेंबल्लाः खनेदःवःगु दु । थथे जूगु मू कारण धयागु सरकार दयेकेत माःगु बहुमत एमाले व नेकपाया सांसद जक दयां मगाःगुलिं खः ।
बागमतिइ सरकार दयेकेगु निंतिं थ्व इलय् राप्रपाया मू भूमिका दयाच्वंगु दु । राप्रपां एमाले व नेकपाया गठबन्धनयात समर्थन यात धाःसा याउँक थ्व गठबन्धनं सरकार दयेकेफइ । यदि राप्रपां समर्थन मयात धाःसा थ्व गठबन्धनयात हाम्रो नेपाल पार्टी व नेमकिपाया समर्थन आवश्यक जुइ ।
बागमतिइ सरकार दयेकेगु निंतिं बहुमत खाकेत ५३ म्ह सांसद आवश्यक दु । थन कांग्रेसया ३६ म्ह, नेकपाया २६ म्ह, एमालेया २५ म्ह, राप्रपाया १२ म्ह, नेमकिपाया ३ म्ह व हानेपाया २ म्ह सांसद दु । नेकपा व एमाले जक जुल धाःसा ५१ म्ह जुइ, उकी हानेपां समर्थन यात धाःसा बहुमत खाइगु अवस्था दुगु खः, तर थौंकन्हय् एमालेया अप्सरा चापागाईं उपसभामुखया हैसियत सभाध्यक्षता यानाच्वंगुलिं सरकार दयेकेत मत बीबलय् कानुनी समस्या वइगु जुइ । उकिं हानेपाया जक समर्थनं सरकार दयेकेमफइगु जुइवं नेकपा-एमाले गठबन्धन राप्रपाय् निर्भर जुयाच्वंगु दु । थ्वहे कारणं एमालेपाखें मुख्यमन्त्रीया दावेदार यानाच्वंम्ह जगन्नाथ थपलियां हानेपायात स्वापू तकं तयाच्वंगु मदु ।
थ्वहे दथुइ कांग्रेसपाखें मुख्यमन्त्री जुयाच्वंम्ह बानिया म्हिगः हानेपाया वज्राचार्ययात भौतिक पूर्वाधारविकास मन्त्रीइ नियुक्त यानाः शपथ ग्रहण याकूगु दु । थौंकन्हय् अल्पमतय् लानाच्वंम्ह बानियाया सरकारय् वज्राचार्य मन्त्री जूवंगु कारण धाःसा राप्रपां कांग्रेसयात समर्थन यानाः सरकारय् वइगु सम्भावना दुगुलिं खः धाःगु दु । राप्रपा-कांग्रेस-हानेपा मिले जुल धाःसा ५० म्ह सांसद जक दइ, अझ नं बहुमत खाइमखु । थ्व अवस्थाय् नेमकिपायात समर्थन जक यायेत जूसां ह्ययेकेगु ज्या जुयाच्वंगु खँ धाःगु दु । नेमकिपा गुबलें सरकारय् मवनीम्ह जूगुलिं आः नं सरकारय् मवनेफु, तर सरकार पिने च्वनाः समर्थन जक यात धाःसा नं बहुमत बानियां बहुमत खाकेफइगु अवस्था दु ।
थ्व इलय् राप्रपां एमाले दुने म्हितेगु ज्या यानाच्वंगु दु । राप्रपां छुं सांसदतय्सं एमालें किरण थापायात मुख्यमन्त्री दयेकल धाःसा थःपिंसं समर्थन यायेगु जुइ धयाच्वंगु दु । थ्व हे कारणं एमाले दुने थपलिया व थापा दथुइ मुख्यमन्त्री जुइगु निंतिं तच्वःगु रस्साकस्सी जुयाच्वंगु दु । मेखे एमाले अध्यक्ष ओलीं नं सुनां राप्रपाया समर्थन हल व हे मुख्यमन्त्री जुइ धाःगु दु ।
एमाले दुने थथे म्हिताः राप्रपा सरकार दयेकेत धाःसा कांग्रेसलिसे जायेफुगु खँ सूत्रं धाःगु दु । नेमकिपां सरकार पिने च्वनाः समर्थन याइगु जुल धाःसा राप्रपा कांग्रेसलिसे हे वनीगु खँ नं धाःगु दु ।
LEAVE YOUR COMMENTS