कोप–२६ य् जलवायु परिवर्तन पनेगु निंतिं न्हूगु सम्झौता

एजेन्सी- स्कटल्याण्डया ग्लास्गोय् सम्पन्न जूगु कोप–२६ सम्मेलनय् जलवायु परिवर्तनयात पनेगु निंतिं न्हूगु सम्झौता जूगु दु ।

‘ग्लास्गो क्लाइमेट प्याक्ट’ नांयागु सम्झौताकथं हरितगृह ग्यासया उत्सर्जन यानाच्वंगु कोइला छ्यलेगु बुलुहुं म्हो यानायंकेगु धयातःगु दु । सहमतिइ न्हापां कोइलायात छसीकथं चिइका छ्वयेगु धाःगु खःसा भारत, चीन, अस्ट्रेलिया व मेमेगु थीथी देसं विरोध यायेवं कोइला छ्यलेगु म्हो यायेगु खँय् सहमति जूगु खः ।

सहमतिइ उत्सर्जन गतियात म्हो यानायंकेगु व विकासशील देसय् जलवायु परिवर्तनया असर म्हो यानाः थप ग्वाहालि यायेगु सहमति दु । सहमतिइ पृथ्वीया तापक्रम १.५ डिग्रीइ सीमित यायेगु धकाः धाःसां बांलाक ज्या जूगु खनेमदु । थुकियात कयाः मेगु दँय् जक छलफल जुइसा आःयात पृथ्वीया तापक्रम वृद्धि २.४ डिग्रीइ सीमित यायेगु धकाः धयातःगु दु ।

वैज्ञानिकतय्सं धाःकथं पृथ्वीया तापक्रम १.५ डिग्रीसिबें अप्वः थहां वन धाःसा लखंलख मनूत तांन्वयेक च्वनेमाली ।

कोइलाया विषयय् शब्दावली कमजोर जूसां थ्व सहमतियात छगू विजय कथं काःगु दु । ग्रीनपीसया अन्तर्राष्ट्रिय कार्यकारी निर्देशक जेनीफर मोर्गनया कथं सहमतिइ शब्द परिवर्तन जूसां कोपं वःगु संकेत परिवर्तन जुइमखुगु व कोइला युगया अन्त्य जुइगु धाःगु दु ।

थुखें एक्सन एडया नीति निर्देशक लार्च कोचं सहमतिइ कोइला जक उल्लेख जूगु, तर पेट्रोलियम पदार्थ व ग्यासया विषयय् प्रतिबद्धता मवःगुलिं दुःख प्वंकूगु दु । नीति निर्देशक लार्च कोचं पेट्रोलियम पदार्थ व ग्यासं पृथ्वीयात प्रदू्रषित यानाच्वंगु धाःगु दु ।