छम्ह मनू सीवं क्यानाडाय् अर्बौंया डिजिटल मुद्रा तन

क्यानाडाया छम्ह मनू सीवं अर्बौ तका बराबरया डिजिटल मुद्रा तनीगु खतरा ब्वलंगु दु । थनया छगू तःधंगु क्रिप्टोकरेन्सीया संस्थापक आकाझाकां सीवं पौन १६ अर्ब तका बराबरया क्रिप्टोकरेन्सी (डिजिटल) मुद्रा तनाच्वंगु दु । क्वाडरिगा नांया थ्व भर्चुअल अर्थात भौतिक अस्तित्व मदुगु मुद्रा कारोवार याइपिं दुजःतय्सं थःपिनिगु लगानी सुरक्षा यायेत अदालतय् मुद्दा दायर याःगु दु ।

संस्थापक गेराल्ड कोटेन वंगु डिसेम्बरय् आकाझाकां सीवं थ्व डिजिटल ध्यबा तनाच्वंगु दु । स्वीदँया कोटेन याकःचां हे क्वाडरिगाया कोष व मुद्राया व्यवस्थापन जिम्मा कयातःगु खः । कोटेनया कलाः नं न्यान्हु न्ह्यव क्यानडाया सर्वोच्च अदालतय् पेश याःगु भ्वँतय् थः भाःतं क्वाडरिगा सम्बन्धी ज्या याइगु कम्प्यूटर इन्क्रिप्ट यानातःगु व थःत उकिया पासवार्ड मसिउगु खँ धाःगु खः ।

पासवर्ड मसिउगुलिं डिजिटल मुद्रा तनीगु खतरा ब्वलनाच्वंगु खः । कम्पनीया कथं छगू लाख १५ हजार मनूतय्सं क्वाडरिगाय् खाता चायेकातःगु दु ।छु खः क्रिप्टोकरेन्सी क्रिप्टोकरेन्सी धाःगु डिजिटल वा भर्चुअल मुद्रा खः । थुकिया छुं भौतिक अस्तित्व दइमखु । क्रिप्टोकरेन्सीया केन्द्रीय बैंक दइमखु ।

थुकियात संसारन्यंकं तःगः हे कम्प्यूटरय् तयातःगु रेकर्डया आधारय् संचालन जुइ । थुकिं सामान न्यायेगु निंतिं भुक्तानी बीगु यायेफइ । संसारन्यंकं क्रिप्टोकरेन्सीया प्रचलन व भाः अप्वःगुलिं मनूतय्सं लुँ व भौतिक मुद्रा मियाः नं थुकी लगानी यायेगु चलन अप्वया वःगु खः ।