धाकुफसं यानाः लुइजिआनाया जनजीवन प्रभावित

एजेन्सी÷ अमेरिकाया लुइजियानाय् आइतवाः सनिलय् वःगु शक्तिशाली आइदा धाकुफसं यानाः जनजीवन बांमलाक प्रभावित जूगु दु । धाकुफसं यानाः लुइजियानाया न्यू अर्लियन्सय् मतया आपूर्ति पूर्ण रुपं बन्द जूगु दु । मतया आपूर्ति बन्द जुयाः थ्यंमथ्यं साढे सात लाख मनूत मत मदयेक च्वनेमाःगु दु । मतया आपूर्ति सहज यायेत हप्तौं ई काइगु अमेरिकी राष्ट्रपति जो बाइडेनं धाःगु दु ।

मौसमविद्तय्सं बिउगु जानकारीकथं २४० किलोमिटर प्रति घौया ल्याखं वःगु आइदा धाकुफय् आइतवाः सनिलय् लुइजियानाया तटीय क्षेत्रय् थ्यंकःवःगु खः । धाकुफय् विनाशकारी जुइफुगु नं मौसमविद्तय्सं धाःगु दु ।

धाकुफय् वयेन्ह्यः द्वलद्वः मनूतय्त प्रशासनं सुरक्षित थासय् यंकूगु खःसां यक्व मनूत थःपिं हे नं सुरक्षित थासय् वंगु खः । अथे खःसां अझ नं यक्व हे मनूत सुरक्षित थासय् वनेफयाच्वंगु मदुनि । प्रशासनं सुरक्षित थासय् थ्यंके मफुनिपिं मनूतय्त याकनं हे सुरक्षित थाय् मालेत निर्देशन बिउगु दु । अधिकारीतय्सं सुरक्षित थासय् वनेमफुनिपिं मनूतय्त ग्वाहालि याये थाकुइगु धाःगु दु । अधिकारीतय्सं मनूतय्त छेँन पिहां मवयेत नं इनाप याःगु दु ।

मेक्सिकोय् तसकं तापक्रम थहां वंगुलिं धाकुफय् अप्वः शक्तिशाली जूगु खः । धाकुफसं यानाः मेक्सिकोया खाडीइ ९० प्रतिशत चिकंया उत्पादन बन्द जूगु दु ।

सम्बन्धित बुखँ

LEAVE YOUR COMMENTS