क्रिकेटय् नेपाः भारतलिसे बुत, ब्याडमिन्टनय् त्यात
येँ (नेपालभाषा टाइम्स)÷ चीनय् जुयाच्वंगु झिंगुक्वःगु एशियाली खेलकूदया मिजंतय् क्रिकेट कासाय् क्वार्टरफाइनलय् नेपाः पराजित जूगु दु । मंगलवाः जूगु कासाय् नेपाःयात भारतं २३ रनं बुकूगु खः । चीनया हान्झाउइ च्वंगु युनिर्भसिटी अफ टेक्नोलोजी मैदानय् भारतविरुद्ध नेपालं बांलाःगु कासा म्हितूगु खःसां कासा धाःसा त्याकेमफुत ।
टस त्याकाः न्हापां ब्याटिङ यासें भारतं निर्धारित २० ओभर प्यंगू विकेटया क्षतिइ २०२ रन दयेकूगु खः । भारतया यशस्वी जैशवालं शतक प्रहार याःगु खः । अथेहे कप्तान ऋतुराज गायकवं २५ रन, रिंकु सिंहं ३७ रन व शिवम दुवें २५ रन दयेकूगु खः । तिलक वर्मा निगू रनय् व जितेश वर्मा न्यागू रनय् आउट जूगु खः । नेपाःया निंतिं दिपेन्द्रसिंह ऐरीं निगू विकेट काःगु खःसा सोमपाल कामी व सन्दीप लामिछानें छगू छगू विकेट काःगु खः ।
कासा त्याकेत २०३ रनया लक्ष्य ज्वनाः मैदानय् वःगु नेपालं निर्धारित २० ओभरय् ९ विकेटया क्षतिइ १७९ रन जक दयेकेफत । नेपाःया निंतिं कुशल भुर्तेलं २८ रन, कुशल मल्ल व सन्दीप जोरां समान २९ रन दयेकलसा दकलय् अप्वः दिपेन्द्रसिंह ऐरीं ३२ दयेकूगु खः । अथेहे करण केसीं अविजित १८ रन, सोमपाल कामीं ७ रन, गुल्शन झां ६ रन व सन्दीप लामिछाने ५ रन दयेल । नेपालं समुह चरणया कासा मंगोलिया व माल्दिभ्सयात बुकाः सेमिफाइनलय् दुहां वंगु खः ।
मिस्तय् कबड्डी कासाय् नं नेपाः पराजित जूगु दु । मंगलवाः जूगु धेंधेंबल्लाखय् नेपाःयात इरानं बुकूगु खः । लिपांगु संस्करणया स्वर्ण विजेता इरानं नेपाःयात ४३–१९या ल्याखं बुकूगु खः । कासा त्याका इरान सेमिफाइनलय् थ्यंगु दु । थ्व पुचलय् जूगु कबड्डीया न्हापांगु कासाय् नेपालं बंगालदेशयात ३७–२४ ल्याखं बुकूगु खः । इरानलिसे बूसा नेपालं कबड्डीइ पदक त्याकीगु सम्भावना धाःसा दनि । बुधवाः जुइगु कासाय् इरानं बंगालादेशयात बुकल धाःसा नेपाः सेमिफाइनलय् थ्यनी । सेमिफाइनल थ्यनकी म्होतिं नं कास्य पदक पक्का जुइ ।
मेखे मंगलवाः जूगु ब्याडमिन्टनपाखे मिसा सिंगल्सय् नेपाःया रशिला महर्जन त्याःगु दु । महर्जनं मंगोलियाया कासामियात २१–४ व २१–७ या ल्याखं बुकाः अन्तिम १६ थाय् दयेकूगु खः । मेगु कासाय् धाःसा नेपाःया अनुमाया राइयात थाइल्याण्डया कासामि २१–४ व २१–७ या ल्याखं बुकल ।
मंगलवाः जूगु मिसा ८ सय मिटर दौडय् नेपाःया फुलमती राना हिटचरणं आउट जूगु दु । ७ म्ह कासामिं ब्वति काःगु दौडय् फुलमति खुगूगु थासय् लाःगु खः ।
चीनय् जुयाच्वंगु थुगुसीया एशियाली खेलकूदय् नेपालं छगू नं पदक त्याकूगु मदुनि । मेडल धलखय् मंगलवाः न्हिनय् तक चीन १५३ स्वर्ण, ८१ रजत व ४२ कास्य पदक त्याकाः दकलय् न्ह्यःने दु । जापान निगूगु थासय्, दक्षिण कोरिया स्वंगूगु व भारतं प्यंगूगु थासय् दु ।
LEAVE YOUR COMMENTS