न्हापांगु न्हिकुन्हु नेपाःयात १५गू स्वर्ण

झिंस्वक्वःगु दक्षिण एशियाली कासा

न्हापांगु स्वर्ण मण्डेकाजीयात
ट्रायथोलनय् ऐतिहासिक स्वर्ण

येँ – नेपालय् जुयाच्वंगु झिंस्वक्वःगु दक्षिण एशियाली कासा (साग)य् न्हापांगु न्हि कुन्हु नेपालं झिंन्यागू स्वर्ण त्याकूगु दु । नेपाःया निंतिं मन्डेकाजी श्रेष्ठं न्हापांगु स्वर्ण त्याकूगु खः । श्रेष्ठं व्यक्तिगत मिजंतय् एकल काताय् स्वर्ण त्याकूगु खः । पाकिस्तानी कासामि निएमातुल्हायात बुकाः स्वर्ण ल्हातय् लाकूगु खः ।

न्हापांगु न्हि कुन्हु नेपालं कराते व तेक्वान्डोय् न्हय्गू न्हय्गू व ट्रायथोलनय् छगू स्वर्ण त्याकूगु खः । दक्षिण एशियाली कासाय् ट्रायथोलनपाखे नेपालं स्वर्ण त्याकूगु थ्व हे न्हापांखुसी खः । मण्डेकाजीं करातेया काताय् निगू दशक लिपा न्हापांखुसी नेपाःयात स्वर्ण त्याकाबिउगु खः ।

च्याक्वःगु सागय् गंगाराम महर्जनं काताय् स्वर्ण त्याकेधुंकूसां निसें नेपाःया सुं नं कासामिं काताय् स्वर्ण त्याकेफुगु मदुनि । न्हापांगु स्वर्ण त्याकेवं श्रेष्ठं थःगु म्हगस पूवंगु खँ धयादीगु दु । स्वक्वः तकया राष्ट्रिय च्याम्पियन ३४ दँया श्रेष्ठया सागय् थ्व न्हापांगु स्वर्ण खः ।

मण्डेकाजीं काताया टिम इभेन्टपाखें नं स्वर्ण त्याकूगु दु । टिम इभेन्टय् महसुस तामाङ व प्रवीण महर्जनलिसे जानाः स्वर्ण त्याकूगु खः । मिस्तय्पाखे धाःसा काताय् चञ्चला दनुवारं रजत त्याकूगु दु । फाइनलय् पाकिस्तानया साहिदालिसे पराजित जुइवं चञ्चला रजतय् सीमित जूगु खः ।

ट्रायथोलनय् एतिहासिक स्वर्ण
पोखराय् जुयाच्वंगु ट्रायथोलनय् मिस्तय् पाखें नेपाःया सोनी गुरुङं ऐतिहासिक स्वर्ण त्याकूगु खः । फेवातालया सिथय् गौरीघाटय् जूगु ट्रायथोलनय् फेवातालय् ७५० मिटर स्वीमिङ्ग, २० किलोमिटर साइकलिङ्ग व ५ किलोमिटर दौड १ घन्टा १३ मिनेट ४५ सेकेन्डं पूवंकुसें गुरुङं थ्व ऐतिहासिक स्वर्ण ल्हातय् लाकूगु खः ।

नेपाः, भारत व श्रीलंकाया निम्ह निम्ह कासामितय्सं ब्वति काःगु थुगु धेंधेंबल्लाखय् भारतया सरोजिनीदेवी व प्रज्ञना मुन्नां छसिकथं रजत व काश्य त्याकूगु खः । मिजंतय् पाखे धाःसा नेपाःया वसन्त थारु कास्य जक त्याकेत ताःलात ।

मिजंतय् धेंधेंबल्लाखय् भारतया आदर्श एमएन सिनिमलं १ घन्टा २ मिनेट ३१ सेकेन्ड निर्धारित दूरी पूवंकाः स्वर्ण त्याकूगु खःसा भारतया हे विश्वरिज्टी साइकमं १ घन्टा २ मिनेट ५९ सेकेन्डं दूरी पूवंकाः रजत त्याकल । नेपाःया थारुं १ घन्टा ३ मिनेट ६ सेकेन्डं दूरी पूवंकूगु खः ।

तेक्वान्डोय् प्यंगू स्वर्ण
नेपालं न्हापांगु न्हिु कुन्हु तेक्वान्डोय् न्हय्गू स्वर्ण त्याकल । नेपाःया निंतिं आयशा शाक्य, पार्वती गुरुङ, सीना मादेन व कमल श्रेष्ठ, निशा दर्नाल, स्वस्तिका तामाङ, सन्जिला तिमिल्सिना, निता गुरुङ व सुशीला राईं स्वर्ण त्याकूगु खः ।

तेक्वान्डोया एकल पुम्सें मिस्तय् पाखे आयशा शाक्यं २९ दँ स्वयां च्वय्या विधाय्, पार्वती गुरुङं २३ निसें २९ दँ तकया विधाय् व सीना मोदनं २३ दँ स्वयां क्वय्या विधाय् स्वर्ण त्याकूगु खःसा मिजंतय्पाखे कमल श्रेष्ठं २३ निसें २९ दँया समूहय् स्वर्ण त्याकूगु खः ।

करातेय् न्हय्गू स्वर्ण
करातेया काताय् मन्डेकाजीं एकल व टिमय् यानाः निगू स्वर्ण त्याकूगु खःसा मिस्तय् पाखे टिम काताय् नं स्वर्ण त्याकूगु दु । मिस्तय्पाखेया टिम काताय् निर्माला तामाङ, संगीता मगर व सरु कार्कीं म्हितूगु खः । करातेय् मेगु छगू छगू स्वर्ण लक्ष्मण तामाङ, विप्लवमान प्रधान व कुसुम खड्कां त्याकूगु खः ।

विप्लवमानं ८४ केजी स्वयां च्वय्या समूहय् पाकिस्तानी कासामितयात बुकुसें स्वर्ण त्याकूगु खःसा तामाङ्गं ५५ केजी तौल समूहय् बंगलादेशी कासामियात बुकाः स्वर्ण त्याकूगु खः । अथेहे खड्कां मिस्तय् ४५ केजी स्वयां क्वय्या समूहय् बंगलादेशी कासामियात बुकाः स्वर्ण ल्हातय् लाकूगु खः ।

सम्बन्धित बुखँ

LEAVE YOUR COMMENTS