प्रशिक्षक अलमुताइरीपाखें राजीनामा घोषणा

एजेन्सी- नेपाः राष्ट्रिय फुटबल टिमया मुख्य प्रशिक्षक मोहम्मद अलमुताइरीं राजीनामा बिइगु घोषणा याःगु दु । अलमुताइरीं सामाजिक सञ्जाल फेसबुक मार्फत थुकिया घोषणा याःगु खः । अलमुताइरीं एन्फाया वरिष्ठ उपाध्यक्ष पंकज विक्रम नेम्वाङं यानाः राजीनामा बिइत्यनागु धाःगु दु । अलमुताइरीं फेसबुकय् पोष्ट यानाः नेपाली फुटबल समर्थकतय्त सम्बोधन यासें एन्फाया वरिष्ठ उपाध्यक्ष पंकज विक्रम नेम्वाङं वंगु स्ववाःनिसें थःलिसें न्हिंन्हिं नाटक याना वयाच्वंगुलिं राजीनामा बिइमाःगु धाःगु दु ।

एन्फाया उपाध्यक्ष पंकज विक्रम नेम्वाङं अलमुताइरीया घोषणां थः अजू चाया धाःगु दु । उपाध्यक्ष नेम्वाङं थः विरुद्ध षङयन्त्र जूगु व एन्फां थुकियात कयाः छानबिन यायेमाः धाःगु दु । उपाध्यक्ष नेम्वाङं थः दोषी खनेदत धाःसा राजीनामा बिइत तयार दु धकाः नं धाःगु दु । एन्फा याकनं छानबिन समिति गठन यानाः थुकिया समाधान यायेत नं नेम्वाङ धाःगु दु ।

अलमुताइरीं म्हीगः पत्रकारतय्त दुव्र्यवहार यात धकाः नं पत्रकार महासंघं विरोध यानाः वक्तव्य पितबिउगु दु । सार्वजनिक थासय् चुरोट छाय् त्वनागु धकाः पत्रकारतय्सं न्ह्यसः तःबलय् निम्ह पत्रकारतय्त दुव्र्यवहार याःगु खः ।

फिफां विश्वकप छनोटया कासा म्हितेत प्रो लाइसेन्स दुम्ह प्रशिक्षक दयेमाःगु नियम दयेकूगुलिं अलमुताइरीयात वंगु चैतय् नेपाःया मुख्य प्रशिक्षक घोषणा याःगु खः । अलमुताइरीया प्रशिक्षणय् नेपालं स्वंगू विश्वकप छनोट कासा व छगू मैत्रीपूर्ण कासा म्हितूगु दु ।