एनपिएलय् न्हापांगु शतक, पोखरा व कर्णाली त्यात

नेपालभाषा टाइम्स

किपू (नेपालभाषा टाइम्स)- नेपाल प्रिमियर लिगय् कर्णाली याक्सं थःगु न्हापांगु कासा त्याकूगु न्हि कुन्हु मेगु कासाय् पोखरा एभेन्जर्सं लुम्बिनी लायन्सयात बुकूगु दु । झ्वलाक निगू कासाय् बुइधुंकूगु कर्णालीं शुक्रवाः सुथय् जूगु कासाय् चितवन राइनोजयात खूगु विकेटं बुकूगु खः । अथेहे न्हिनय् जूगु कासाय् पोखरां लुम्बिनीयात झिगू विकेटं बुकूगु दु ।

लुम्बिनीयात बुकेगु झ्वलय् पोखराया आन्द्रेस गौसं एनपिएलया हे न्हापांगु शतक थ्वात । गौसं ५४ बलय् १२ चौका व न्यागू छक्काया ग्वाहालिं न्हापांगु शतक दयेकेगु कीर्तिमान तःगु खः । गौसं एनपिएलय् दकलय् म्हो बलय् अर्धसतक पूवंकेगु कीर्तिमान नं तःगु दु । गौसं २० बलय् न्यागू चौका व स्वंगू छक्का थ्वानाः थ्व कीर्तिमान तःगु खः ।

न्हापां ब्याटिङ याःगु लुम्बिनीं कुशल मल्लया ९५ रनया ग्वाहालिं पोखरायात १७१ रनया लक्ष्य बिउगु खः । पोखरां थ्व लक्ष्य १६.५ ओभरय् छगू हे विकेट मवंकुसे पूवंकूगु । पोखरां एनपिएलय् न्हापांगु विजय चूलाकेगु झ्वलय् १७६ रन दयेकूगु खः गुकी दिनेश खरेलं अविजित ६१ रनया योगदान बिउगु खः । गौस व खरेलं न्हापांगु विकेटया निंतिं दकलय् अप्वः रनया साझेदारी यानाः कीर्तिमान नं तःगु दु ।

लुम्बिनीं निर्धारित २० ओभरय् ७ विकेटया क्षतिइ १७० रन दयेकूगु खः । थुकिया निंतिं टम मुर्सं ४५, सन्दीप जोरां १८ रन दयेकूगु खःसा उन्मुक्त चन्द व आशुतोष घिरैया शून्यय् हे आउट जूगु खः । पोखराया निंतिं विपिन खत्रीं निगू व म्याट क्रिट्लें छगू विकेट काःगु खः ।

मेखे चितवनं धाःसा एनपिएलय् न्हापांगु पराजय फयेमाल । थ्वयां न्ह्यः चितवनं म्हितूगु निगुलिं कासा त्याकूगु खः । चितवन राइनोजं न्हापां ब्याटिङ यासें कर्णालीयात १३१ रनया लक्ष्य बिउगु खः, गुगु लक्ष्य कर्णालीं १९.५ ओभरय् पुवंकल ।

कर्णालीया निंतिं शिखर धवनं दकलय् अप्वः ४५ रन दयेकूगु खः । अथेहे देव खनालं २५ व चाडविक वाल्टनं ३० रन दयेकूगु खः । थुकी जिसन मकसुदं १२ व अर्जुन घर्तीं ११ रनया योगदान बिल । कर्णालीयात कासा त्याकेत धाःसा अःपु मजुल । १९ आंै ओभरय् चितवनया बलर सोहेल तनवीर मुक्कं निगू रन जक बीवं कर्णाली दबाबय् लाःगु खः ।

अन्तिम ओभरय् कर्णालीयात ९ रन माःगु खः । न्हापांगु स्वंगू बलय् कर्णालीं ६ रन दयेकल तर प्यंगूगु बलय् अर्जुन आउट जुल । अन्तिम निगू बलय् कर्णालीयात स्वंगू रन माःगु खः । तर छगू बल न्ह्य मकसुदं चौका प्रहार यासें कर्णालीयात त्याकाबिल । कासाय् चितवनया निंतिं कुशल मल्ल, लोफ्टी इटन व रवि बोपरां छगू छगू विकेट काःगु खः ।

न्हापां ब्याटिङ याःगु चितवनं निर्धारित २० ओभरय् ७ विकेटया क्षतिइ १३० रन दयेकूगु खः । चितवनया निंतिं रवि बोपरां दकलय् अप्वः नटआउट ५९ रन दयेकलसा कप्तान कुशल मल्लं २३ रन व विपिन रावल ११ रन दयेकल । मेपिं कासामितय्सं निगू अंकया रन तकं दयकेमफुत । कर्णालीया निंतिं विपिन शर्मां स्वंगू व जिशन मसुद निगू विकेट काःगु खः । अथेहे कप्तान सोमपाल कामी व नन्दन यादवं छगू छगू विकेट काःगु खः ।