अमेरिकाय् मेगु गोलीकान्ड, खुम्ह घाःपाः

वाशिंगटन – अमेरिकाया फिलाडेल्फिया सहरय् गोलीं कयेकाः जूगु ल्वापुइ खुम्ह प्रहरी घाःपाः जूगु दु । फिलाडेल्फियाय् शंकास्पद लागू वासःया कारोबारीलिसे गोलीं कयेकाः जूगु ल्वापुइ खुम्ह प्रहरी घाःपाः जूगु फिलाडेल्फिया प्रहरी विभागं धाःगु दु । विभागया कथं शंकास्पद लागू वासःया कारोबारयात ज्वनेगु निंतिं घन्टौंया ई काःगु समाचार एजेन्सीं न्ह्यथंगु दु ।

विभागया प्रहरी आयुक्त रिचर्ड रस जुनियरं थःगु प्रहरी जीवनया स्वीदँया कार्यकालय् आतक थुलि ताःहाकःगु ईतक गुगुं नं पुचःलिसे थुकथं संघर्ष मयानागु धाःगु दु । सहरया मेयर जीम केन्नीं प्रहरी विभागया कर्मचारीतय्सं कुशल रुपं सफलतापूर्वक कारवाही सम्पन्न याःगु धासें सुभाय् देछाःगु दु ।

छम्ह मनुखं घन्टौं तक प्रहरीलिसे भिडन्त यायेग गाक्क गोली संकलन याःगु खँय् थः अजू चाःगु धासें मेयर केन्नीं घटना तसकं खेदजनक जूगु प्रतिक्रिया बिउगु दु । अमेरिकाय् लिपांगु बन्दुकलिसे सम्बन्धित हिंसात्मक घटनाय् तीव्रता वयाच्वंगु दु । अथे खःसां उकियात नियन्त्रण व नियमन यायेगु खँय् समाज व राजनीतिक क्षेत्रय् निगू पक्षय् ध्रुवीकृत जुया वनाच्वंगु दु ।

वंगु अगस्टया शुरुपाखे अमेरिकाया हे ओहायो राज्यया डेटन व टेक्सासाया एलपासोय् जूगु गोलीकान्डय् ३२ म्ह सीगु खः । थ्व हे झ्वलय् अमेरिकाय् बन्दुक न्यायेगु विषयय् कडा नियम हयेगु प्रस्तावयात अमेरिकाया हे दकलय् शक्तिशालीकथं कयातःगु नेशनल राइफल एसोसियसनं अस्वीकार याना वयाच्वंगु दु ।