प्यम्ह मस्त सुतुक्क गाडी खुयाः ………….
मांअबुलिसें मस्त नं नापं गनं चाःहिउ वनीगु छुं न्हूगु खँ मखु । मस्तमस्त जक चाः हिउ वनीगु नं छुं न्हूगु खँ मखये धुंकल । तर थ्व हे मस्त व नं विना चालक व अभिभावक सलंसः किलोमिटर तापाक चाःहिउ वन धाःसा व अजू चायापुगु खँ जुइ । १० दँनिसें १४ दँ दुपिं प्यम्ह मस्त अभिभावक व चालक विना हे थः यसें गाडी चले यानाः १००० किलोमिटर यात्रा याःगु खः ।
अस्टे«लियाया क्वीन्सल्याण्ड सहरया १० निसें १४ दँ दुपिं प्यम्ह मस्त देय चाःहिउ वनेगु योजनां सुटुक्क धायेक गाडी ज्वनाः पिहां वन । वँवं इपिं १००० किलोमिटर पार याना वनेधुंकाः बल्ल प्रहरीं इमित नियन्त्रणय् काःगु खः ।प्रहरीया कथं इपिं मस्त क्वीन्सल्याण्ड सहरया रकह्याम्पटन धइगु थासं पिहां वनाः १००० किलोमिटर पार यानाः न्यू साउथ वेल्स थ्यंकः वःगु खः ।
जब न्यू साउथ वेल्स थ्यन इमिसं गाडीइ पेट्रोल तयाच्वंगु इलय् इमित ज्वंगु खः । विना भुक्तानी इमिसं पेट्रोल तयाच्वंगु इलय् वादविवाद जुइवं प्रहरीं इमित नियन्त्रणय् काःगु खः ।खतुं प्रहरी वयेवं इमिसं थःपिंत कार दुने हे बन्द यानाः च्वंगु खः । प्रहरीं कारया खापा चायेकेगु कुतः याःसां नं सफल मजुइवं लिपा मेकानिकयात सःताः वयागु ग्वाहालिं खापा चायेकाः प्यम्हं मस्तय्त नियन्त्रणय् काःगु खः ।
प्रहरीया कथं उगु गाडीइ स्वम्ह मिजं मचा व छम्ह मिसा मचा दुगु खः । मस्तय्सं गुगु कार गयाः थुलि तापाक वन, व कार इमिसं खुया हःगु जुयाच्वन । अथे धकाः मेपिनिगु मखसे प्यम्हमध्ये छम्ह मचां कार थः अबुया जूगु व सुनानं मसीक कार ज्वनाः पिहां वयागु बयान प्रहरीयात बिउगु दु ।
कार खुया बिसिउँ वनेगु मस्तय् योजना धाःसा मखु, प्रहरीयात बिउगु बयानकथं इपिं पिकनिक न्यायेकः वनेगु शैलीं छेँय् पिहां वःगु खःसा वँवं इपिं थुलि तापाक यात्रा याःगु जुयाच्वन ।
अथे खःसां इमिसं कारय् हे थःपिंत माःगु छुं नसाज्वलं ध्यबा व न्याः लायेगु रड तकं ज्वना वःगु जुयाच्वन । गुगु कि दक्वं हे सुनानं मसीक थःथःगु छेँय् नं खुया हःगु जुयाच्वन । इपिं सकलें छेँय्नं पिहां वये न्ह्यः प्यम्हमध्ये छम्ह मचां परिवारया नामय् ‘गुडबाई’ धकाः नोट च्वयाथकूगु खः ।
LEAVE YOUR COMMENTS