श्रीलंकां बिसिउँ वंम्ह राष्ट्रपति गोटाबाय राजपक्ष सिंगापुरय्

एजेन्सी- श्रीलंकां बिसिउँ वंम्ह राष्ट्रपति गोटाबाय राजपक्ष सिंगापुरय् वंगु खँ सीदुगु दु । बिबिसीया कथं राजपक्ष माल्दिभ्सं साउदी एयरलाइन्सया विमान गयाः सिंगापुर वंगु धाःगु दु । तर राजपक्ष अन हे शरण कयाः च्वनी वा अनं नं मेथाय् वनी धयागु सीमदुनि ।

श्रीलंकाय् सरकारविरुद्ध तःधंगु प्रदर्शन जुइवं राजपक्ष शनिवाः माल्दिभ्स बिसिउँ वंगु खः । वं बुधवाः हे थःगु पदं राजीनामा बीगु खँ पिहां वःगु खःसां आःतक राजीनामा धाःसा बिउगु मदुनि । राजपक्षं थः सुरक्षित रुपं च्वनेदइगु गन्तव्यय् मथ्यंकं राजीनामा बीमखुनिगु अनुमान जुयाच्वंगु दु । राजपक्ष न्हूगु सरकार वलकि थःत आर्थिक घोटालाया द्वपनय् ज्वनेफुगुलिं बिसिउँ वंगु अनुमान जुयाच्वंगुदु ।

राजपक्षं बुधवाः राजीनामा मबिसें प्रधानमन्त्री रनिल विक्रमसिंघेयात कार्यवाहक राष्ट्रपति दयेकाथकूगु खः । विक्रमसिंघ राजपक्षयाम्ह हे नेता खः । विक्रमसिंघें कार्यवाहक राष्ट्रपति जुइवं देशय् संकटकाल घोषणा याःगु दुसा बिहिवाः नं थीथी थासय् कफ्र्यु घोषणा याःगु दु । अथे खःसां थीथी थासय् प्रदर्शन जारी जुयाच्वंगु दुसा प्रदर्शनकारीतय्सं विक्रमसिंघेया नं राजीनामा फ्वनाच्वंगु दु ।

मेखे देय् त्वःताः बिसिउँ वंम्ह राष्ट्रपति गोटाबययात आः सुनां शरण बी धयागु न्ह्यसः ब्वलनाच्वंगु दु । सिंगापुर थ्यंम्ह गोटाबययात अनया सरकारं ताःई तक शरण मबीफुगु खँ पिहां वयाच्वंगु दु । विशेषतः सिंगापुरय् श्रीलंकाया तमिलतय् बसोबास नं यक्व दु । उमिगु आः नं श्रीलंकालिसे परम्परागत सम्बन्ध दनि । यदि गोटाबययात सिंगापुरय् शरण बिल धाःसा थ्व समुदायय् तंचायेफुगुलिं नं सिंगापुरया सरकारं वयात अन ताःई मतइगु अनुमान जुयाच्वंगु खः । गोटाबय श्रीलंकाय् तमिल विद्रोहयात दमन यानाः सत्ताय् थ्यंम्ह खः । वयाविरुद्ध युद्ध अपराधया मुद्दा नं लानाच्वंगुलिं नं सिंगापुरं ताःई शरण मबीफुगु खँ पिहां वयाच्वंगु खः ।

मेखे कोलम्बोय् बुधवाः जूगु प्रदर्शनय् छम्ह प्रदर्शनकारी सीगु दुसा ८४ म्ह घाःपाः जूगु स्थानीय अस्पतालया अधिकारीतय्सं धाःगु दु । प्रहरीं अश्रुग्यास कयेकूलिं सासः ल्हाये थाकुया २६ दँया छम्ह ल्याय्म्ह सीगु खँ धाःगु दु । कोलम्बो नेशनल अस्पतालया अधिकारीतय् कथं घाःपाः जूपिं मध्ये अप्वः धयाथें प्रधानमन्त्री ज्याकू व संसद भवन पिने प्रदर्शन यानाच्वंपिं खः । प्रधानमन्त्रीया ज्याकुथिइ दुहां वनेत मूलुखा चायेकेत स्वयाच्वंगु इलय् प्रहरीं अश्रग्यास कयेकूगु खः ।

श्रीलंकाय् तच्वःगु आर्थिक संकट वयेवं सरकारविरुद्ध प्रदर्शन तच्वया वःगु खः । राष्ट्रपति गोटाबय व सत्ताय् थ्यंपिं वया थःथितिपिनिगु कारणं हे आर्थिक संकट वःगु धासें श्रीलंकाली जनतां सतकय् कुहां वःगु खः ।

राजनीतिक संकट
राष्ट्रपति गोटाबय राजपक्ष देशं बिसिउँ वनेवं श्रीलंकाय् आः राजनीतिक संकट नं तच्वया वःगु दु । आः अन सत्ता सुनां न्ह्याकेगु धयागु हे समस्या जुयाच्वंगु दु । राष्ट्रपतिं प्रधानमन्त्री विक्रमसिंघेयात कार्यवाहक राष्ट्रपति यानाथकूसां जनतां वयात नं स्वीकार यानाच्वंगु मदु ।
कार्यवाहक राष्ट्रपति जुइधुंकाः विक्रमसिंघें देशय् सुव्यवस्था कायम यायेत छु आवश्यक दु अथे यायेत सेनायात आदेश बिउगु दु । तर सेना प्रदर्शनकारीविरुद्ध कडा जुयाः न्ह्याःवःगु खनेमदुनि ।
श्रीलंकाया आर्थिक संकट ज्यंकेगु निंतिं थौंकन्हय् अन पूर्णरुपं ज्या यायेफइगु सरकारया आवश्यक जुयाच्वंगु दु । तर थज्याःगु सरकार गुकथं गठन यायेगु धयागु हे अन्यौल जुयाच्वंगु दु । प्रतिपक्षी पार्टीत सर्वदलीय सरकार गठन यायेगु निंतिं वार्ताय् दुसां उमि दथुइ छुं सहमति जुइफुगु मदुनि । यदि सर्वदलीय सरकारया निंतिं सहमत हे जूसां जनतां उकियात स्वीकार याइ कि मयाइ धयागु नं अन्यौल दनि ।
थ्वहे दथुइ प्रमुख प्रतिपक्षी दलया नेता सजित प्रेमदासं थः राष्ट्रपति जुइत तयार दु धाःगु खःसां जनतां वयात नं स्वीकार यानाच्वंगु मदुनि ।
बुधवाः कार्यवाहक राष्ट्रपति विक्रमसिंघें संसदया सभामुखयात न्हूम्ह प्रधानमन्त्री ल्ययेत धाःगु खः । प्रधानमन्त्री जुइम्ह सरकार व प्रतिपक्षीयात स्वीकार्य दुम्ह जुइमाः धाःगु दु । तर अज्याःम्ह व्यक्ति धाःसा बिहिवाः तक लुइकेफुगु मदुनि ।