बे्रक्जिटया प्रस्ताव बेलायती संसदपाखें तःधंगु मतं पराजित

बेलायतया संसदं प्रधानमन्त्री टेरिजा मेया सरकारं ब्रेक्जिटया निंतिं युरोपेली संघलिसे याःगु सहमतियात अस्वीकार यानाबिउगु दु । संसदय् जूगु मतदानय् मे सरकारं हःगु थ्व प्रस्तावयात २३० मतं पराजित जूगु खः । प्रधानमन्त्री में हःगु प्रस्तावया पक्षय् २०२ मत व विपक्षय् ४३२ मत कुतुंवंगु खः ।

सांसदतय्सं ब्रेक्जिटया निंतिं याःगु सहमतिइ तःगू विषयय् न्ह्यसः थँसें असहमति प्वंकेवं बेलायतया युरोपेली संघपाखें पिहां वयेगु प्रक्रिया हे अनिश्चित जूवंगु दु । प्रधानमन्त्री में आः संसदय् जूगु पराजयं सन् २०१६ य् बेलायत युरापेली संघपाखें अलग जुइगु पक्षय् बेलायती जनतां बिउगु अभिमतया बारे छुं न्वमवाःगु प्रतिक्रिया बियादीगु दु ।

वय्कलं धयादीगु दु, ‘सरकारं थौं चान्हय् संसदं धाःगु खँ न्यंगु दु, तर सकसितं जिं बेलायतया जनतां धाःगु खँ न्यनेत इनाप याना व ठीक अथेहे ज्या यायेत नं इनाप याना’ वय्कलं धयादीगु दु ।मेखे प्रधानमन्त्री मेया प्रस्ताव तःधंगु मतं अस्वीकृत जुइवं बेलायतया प्रमुख प्रतिपक्षी लेबर पार्टीया ेता जेरेमी कोर्बिनं सरकारविरुद्ध अविश्वासया प्रस्ताव दर्ता याःगु दुसा थ्व बारे बुधवाः हे सहलह जुइगु ज्याझ्वः दु ।

मेखे प्रधानमन्त्री मेया थ्व पराजययात कयाः युरोपेली संघया नेतातय्सं धाःसा दुःख प्वंकूगु दु । थ्वहे दथुइ बेलायतं झिवाः लिपा हे इयु त्वःतीगु जुइवं स्कटल्यान्डया प्रथम मन्त्री निकोला स्टर्जनं प्रधानमन्त्री टेरिजा मेयात बे्रक्जिटया फुक्कं प्रक्रिया दिका बेलायतं संघ त्वःतेगु विषयय् मेगु जनमत संग्रह यायेत इनाप यानादीगु दु ।

बेलायतयात संघपाखें पित हयेगु निंतिं निदँ न्ह्यवनिसें जोडतोडं ज्या यानाच्वंम्ह प्रधानमन्त्री मेयात थ्व पराजयं तःधंगु धक्का लाःगु दु । मेया योजना कथं वइगु मार्च २९ तारिखय् बेलायत संघपाखें औपचारिक रुपं पिहां वयेगु व व धुंकाः स्वतन्त्र व्यापार सहमतिया निंतिं २१ महिनाया संक्रमणकाल लागू यायेगु खः ।