हङकङया प्रदर्शनय् प्रहरीया घुसपैठ दुगु स्वीकार

हङकङ प्रहरीं थः छुं अधिकारीतय्त आइतवाः जूगु सरकारी विरोधी प्रदर्शनय् प्रदर्शनकारीया भेषय् खटे यानागु स्वीकार याःगु दु । तसकं हिंस्रक प्रदर्शनकारीतय्त निसानाय् तयेत थथे यानागु खँ हङकङ प्रहरीं धाःगु दु । प्रहरी प्रवक्ताया कथं छुं अधिकारीतय्सं थीथी भेष हिलाः हिंस्रक प्रदर्शनकारीतय्त निसानाय् तःगु खः ।

आइतवाः जूगु झडपया इलय् संदिग्ध प्रहरी अधिकारीतय्सं प्रदर्शनकारीतय्त ज्वना यंकाच्वंगु भिडियो सार्वजनिक जुइवं प्रहरीया थ्व स्वीकारोक्ति वःगु खः । प्रदर्शनकारीतय्सं प्रहरीया व्यवहार छानविन यायेत माग याःगु दु ।थ्वहे दथुइ धर्नाय् च्वनाच्वंपिं सलंसः प्रजातन्त्र समर्थक प्रदर्शनकारीत पिहां वयेवं हङकङया विमानस्थल हाकनं संचालनय् वःगु दु ।

उड्डयन अधिकारीतय्सं छुं घौ लिपा हे उडान सुरु याःगु खः । सोमवाः धाःसा उडान स्थगित जूगु खः । सरकारविरोधी प्रदर्शनया इलय् प्रहरीं तसकं बल छ्यःगु विरोधय् थ्व प्रदर्शन जूगु खः । मेखे अमेरिकी सिनेटया रिपब्लिकन नेता मिच मक्कनेलं प्रदर्शनकारी विरुद्ध जुइगु हिंस्रक कारवाही पूवंक अस्वीकार्य खः धासें चीनयात ख्याच्वः बिउगु दु । हङकङय् जुयाच्वंगु प्रदर्शनयात कयाः चीन व अमेरिका दथुइ वाक्युद्ध जुयाच्वंगु दु ।