गृहमन्त्री ‘हिन्दू राष्ट्र’ या पक्षय् खः ला ?
येँ (नेपालभाषा टाइम्स) – गृहमन्त्री सुधन गुरुङ संविधानया बर्खिलाप वनाः नेपाःयात हिन्दू राष्ट्र दयेकेत तयार जूगु खः ला धयागु चर्चा जूगु दु । हिन्दू सम्राट सेनालिसेया न्हय्गू हिन्दूवादी संगठनलिसे शनिवाः गृहमन्त्रीं याःगु झिंस्वंगू बुँदाया सहमति लिपा सञ्चार माध्यमलिसें सामाजिक सञ्जालय् थ्व खँ चर्चा जुयाच्वंगु दु ।
जिल्ला प्रशासन ज्याकू धनुषाय् शनिबाः बहनि क्वचाःगु वार्ता लिपा जूगु झिंस्वंगू बुँदाया सहमतिया छगू बुँदाय् नेपाःयात हिन्दू राष्ट्र घोषणा यायेगु विषयय् स्वलाया दुने सर्वदलीय सहलह प्रक्रिया न्ह्याकेगु धयागु खँ न्ह्यथनातःगु दु । धनुषाया प्रमुख जिल्ला अधिकारी प्रेमप्रसाद लुइँटेलं वार्ताय् आन्दोलनरत् हिन्दूवादी संगठनतय्सं हःगु झिंस्वंगू बुँदाया मागपत्रया लिधंसाय् सहमति जूगु खँ धयादीगु दु ।
संविधानय् देय्यात धर्मनिरपेक्ष राष्ट्र धयातःगु दु । हिन्दूवादी संगठन लिसें छुं राजनीतिक दलतय्सं नेपाःयात हिन्दू राष्ट्र हे घोषणा यायेमाःगु माग याना वयाच्वंगु दु । सुनसरीइ जूगु साम्प्रदायिक ल्वापु लिपा ब्वलंगु तनाव दिकेत गृहमन्त्री थीथी जिल्लाय् ल्वापुइ मदुपिनि छेँजःपिं लिसें हिन्दूवादी संगठनतलिसे सहमति याःवंगु खः । थ्व झ्वलय् शनिवाः देय्यात हिन्दू राष्ट्र दयेकेगु निंतिं स्वलाया दुने पहल यायेगु धयागु बुँदाय् सहमति याःगु खः ।
बौद्ध धर्मगुरु दलाइ लामाया पक्षय् नेपालय् तकं गतिविधि यानाच्वंगु द्वपं लानाच्वंम्ह गृहमन्त्री गुरुङ धाथें देय्यात हिन्दू राष्ट्र यायेगु पाखे वंगु जुइ धयागु खँय् यक्वसिया विश्वास धाःसा मदु । गृहमन्त्री हिन्दू राष्ट्र दयेकेगु पाखे वन धयागु चर्चा जुइवं वय्कःया समर्थकतय्सं गृहमन्त्रीं हिन्दू राष्ट्र दयेकेत सहमति याःगु मखु, वार्ताय् वःगु मागय् ‘कुतः यायेगु जुइ’ जक धयादीगु धासें स्पष्टीकरण बियाहःगु दु । गृहमन्त्री गुरुङ्गं संविधानय् दुगु खँ थः याकःचां जक हिलेफइमखु धासें थुकिया निंतिं कुतः याये जक धाःगु, तर युट्युबरतय्सं थुकियात गलतढंगं प्रचार याःगु स्पष्टीकरण बियाहःगु दु ।
वार्ताय् गृहमन्त्री गुरुङया लिसें मधेस प्रदेशया मुख्यमन्त्री कृष्णप्रसाद यादव, मधेस प्रदेशया अर्थमन्त्री युवराज भट्टराई, गृह, सञ्चार लिसें कानुनमन्त्री फकिरा महतो, प्रतिनिधिसभा सदस्य मनिष झा, जनकपुरधाम उपमहानगरपालिकाया प्रमुख मनोजकुमार साह लिसें हिन्दू सम्राट सेनालिसेंया हिन्दूवादी सङ्गठनतय् प्रतिनिधितय्सं ब्वति काःगु खः ।
LEAVE YOUR COMMENTS