चीनया स्कुलय् जिनपिङया राजनीतिक विचार ब्वंकीगु

एजन्सी- चीनया स्कूलय् राष्ट्रपति सी जिनपिङया राजनीतिक विचार ब्वंकीगु जूूगु दु । चीनया शिक्षा मन्त्रालयं ल्याय्म्ह–ल्यासेतय्त राष्ट्रपति सी जिनपिङया राजनीतिक विचार ब्वंकेबलय् माक्र्सवादी अवधारणा स्थापित यायेत ग्वाहालि जुइ धाःगु दु । प्राथमिक तह निसें विश्वविद्यालय तह तक राष्ट्रपति सीया विचारधारा ब्वंकेगु सरकारी ग्वसाः दु ।

शिक्षा मन्त्रालयं विज्ञप्ति पिकयाः बहुमुखी नैतिक, बौद्धिक, भौतिक व कलात्मक धरातलयुक्त समाजवादया सूत्रधार व उत्तराधिकारीया विकास यायेगु थुकिया मू आज्जू खः धाःगु दु । थुकिं यानाः परिश्रमया भावना विकास जुइ धकाः नं धाःगु दु । सन् २०१८ य् चीनया सर्वोच्च निकायं ‘सी जिनपिङ विचारधारा’यात पार्टीया विधानय् तयेधुंकूगु दु ।
चीनया सरकारी सञ्चार माध्यमयाकथं प्राथमिक तहया शिक्षा राष्ट्र, चिनियाँ कम्युनिष्ट पार्टी व समाजवादय् केन्द्रित जुइ ।

माध्यमिक तहय् आधारभूत राजनीतिक बिचाः व तर्क दयेकेत बोधात्मक अनुभवय् बः बिइगु जुइसा उच्च तहय् सैद्धान्तिक बिचाः ब्वंकी ।

सम्बन्धित बुखँ

LEAVE YOUR COMMENTS