पाकिस्तान आकास खुल्ला

पाकिस्तानं मंगलवाः निसें फुक्क कथंया नागरिक उडानया निंतिं पाकिस्तानी हवाइ क्षेत्रयात चायेकूगु दु । थ्वयां न्ह्यव पाकिस्तान व भारत दथुइ तनाव अप्वयेवं पाकिस्तानं फुक्कं देय्या गैरसैनिक विमानयात पाकिस्तानी आकाश जुयाः ब्वयेत प्रतिबन्ध तःगु खः ।

पाकिस्तानी नागरिक उड्डयन प्राधिकरणं आः फुक्क कथंया गैरसैनिक उडानया निंतिं पाकिस्तानी आकाश खुल्ला दुगु खँ धाःगु दु । थुकी भारतीय विमान नं ब्वयेफइ । वंगु फेब्रुअरीइ भारत व पाकिस्तानया हवाइ सेना दथुइ आक्रमण प्रत्याक्रमण जुइवं पाकिस्तानं थःगु हवाइ क्षेत्र विदेशी विमानयात प्रतिबन्ध तःगु खः ।

पाकिस्तानं वंगु मार्चय् छुं थासय् प्रतिबन्ध लित काःगु खःसां भारतलिसेया तनाव म्हो मजूगुलिं पूर्वी क्षेत्रया प्रतिबन्ध धाःसा फुकुवा मयासे तयातःगु खः । थुकिं यानाः भारतं पश्चिमी देय्पाखे जुइगु उडान प्रभावित जूगु खः । आः पाकिस्तानं पूर्वपाखे नं हवाइ उडान खुल्ला याःगु खः ।