एमाले-नेकपा सहमतिया झिन्हु : प्रदेश सरकार गठनय् अझं अन्यौल
येँ (नेपालभाषा टाइम्स) – नेकपा एमाले व नेपाली कम्युनिष्ट पार्टी (नेकपा) दथुइ न्यागू प्रदेश न्हूगु सरकार गठन यायेगु निंतिं स्वंगू बुँदाया सहमति जूगु झिन्हु दयेधुंकाः तक प्रदेश सरकार गठन अन्यौलय् लानाच्वंगु दु । राजनीतिक स्थिरता व सुशासनया निंतिं न्हूगु सरकार दयेकेगु धकाः सहमति याःसां पार्टीया केन्द्रीय नेतृत्वया अनावश्यक हस्तक्षेपया कारणं न्यागू मध्ये प्यंगुलि सरकार हे गठन यायेफुगु मदुनिसा छगू थासय् न्हूम्ह मुख्यमन्त्री नियुक्त याःसां मन्त्रिपरिषद् हे विस्तार यायेमफुनि ।
वंगु साउन ९ गते एमाले अध्यक्ष केपी ओली व नेकपा संयोजक पुष्पकमल दाहाल दथुइ न्यागू प्रदेश मध्ये कोशी, बागमति व लुम्बिनीइ एमाले नेतृत्वया सरकार दयेकेगु व कर्णाली व सुदूरपश्चिमय् नेकपाया नेतृत्वय् सरकार दयेकेगु सहमति जूगु खः । अथेहे मधेश व गण्डकी प्रदेशय् मेगु दलतलिसे सहलह यानाः सरकार दयेकेगु खँ जूगु खः । थ्व सहमति कथं कर्णालीइ नेकपाया मंगलबहादुर शाहीयात मुख्यमन्त्री नियुक्त याःगु दु, तर मुख्यमन्त्री नियुक्त जूगु छवाः दयेधुंकूसां मन्त्रालयया भागबण्डा मिले मजूगुलिं मन्त्रिपरिषद विस्तार यायेफुगु मदुनि ।
अथेहे कोशीइ एमाले अध्यक्ष केपी ओली व वर्तमान मुख्यमन्त्री हिक्मत कार्की दथुइया विवादं यानाः सरकार दयेकेफुगु अवस्था मदुनि । थन ओलीं मुख्यमन्त्री कार्कीयात चीकाः तिलकुमार मेन्याङबोयात मुख्यमन्त्री दयेकेगु तयारी यायेवं कार्कीं राजीनामा हे मबिसे च्वनाबिउगु दु ।
कार्कीं ओलीया निर्देशन पालना मयायेगु खँ स्पष्ट रुपं धायेधुंकूगु दु । वय्कलं पार्टीं हे सामुहिक निर्णय यानाहःसा जक राजीनामा बीगु, ओली याकःचियागु निर्णय कथं राजीनामा मबीगु अडान कयाच्वंगु दु । कोशीइ कायम जुयाच्वंपिं सांसदतय् बहुमतया आधारं कार्की मुख्यमन्त्री जुयाच्वंगुलिं अन वय्कःयात संसदीय दलया नेतापाखें चीकाः जक न्हूगु सरकार गठन यायेफइगु अवस्था मदु । आन्तरिक छलफल यायेत एमाले सचिव शेरधन राई कोशी वनाच्वंगु दुसां समस्या धाःसा ज्यंकेफुगु मदुनि ।
मेखे बागमतिइ नं ओलीं वर्तमान संसदीय दलया नेता जगन्नाथ थपलियायात संसदीय दलया नेतां चीकाः किरण थापायात दलया नेता दयेकेत स्वयेवं थन नं विवाद ब्वलंगु खः । आः ओली थपलियायात हे मुख्यमन्त्री जुइत तयार जुइधुंकूसां थन एमाले व नेकपा जक मिले जुयाः बहुमत मखाइगुलिं न्हूगु सरकार दयेकेत अझं अन्यौल कायम हे दनि ।
लुम्बिनीइ धाःसा एमालें वर्तमान मुख्यमन्त्री चेतनारायण आचार्ययात हे निरन्तरता बीगु धाःगु दु, तर आन्तरिक कचवं यानाः थन नं नेकपा सहितया मन्त्रिपरिषद् बिस्तार यायेफुगु मदुनि ।
मेखे सुदूर पश्चिमय् मुख्यमन्त्रीया भाग लाःगु नेकपा दुने हे आन्तरिक कचवं यानाः सरकार गठन यायेफुगु मदुनि । थन नेकपाया संसदीय दलया नेता खगराज भट्ट मुख्यमन्त्री जुइगु पक्का दुसां नेकपा दुने सुयात सुयात मन्त्री दयेकेगु धयागु कचवं नं यानाः सरकार गठन यायेफुगु मदुनि । थन नेकपाय् समाहित जूवंपिं नागरिक उन्मुक्ति पार्टीया सांसदतय्सं थःपिं निगू मन्त्रालय व छगू राज्य मन्त्री मबिल धाःसा सरकार गठनय् हे समस्या जुइगु ख्याच्वः बियाच्वंगु दु । थन एमालेया ११ व नेकपाया २१ म्ह यानाः ३२ म्ह सांसद न्हूगु गठबन्धनय् दु । गुकी नागरिक उन्मुक्तिपाखें नेकपाय् वःपिं न्हय्म्ह सांसद दु । सरकार दयेकेत बहुमतया निंतिं २६ म्ह सांसद माः । यदि नाउपाया सांसदतय्सं समर्थन मयात धाःसा सरकार दयेकेत बहुमत हे खाकेफइमखु, उकिं नं थन सरकार दयेकेत अन्यौल जुयाच्वंगु दु ।
LEAVE YOUR COMMENTS