ने. सं. ११४४ कौलाथ्व तृतीया -

चीनया अर्थतन्त्रय् तीव्र सुधार

एजेन्सी – विश्वया हे निगूगु तःधंगु अर्थतन्त्र दयाच्वंगु चीनय् कोरोना भाइरस महामारी नियन्त्रणय् वयेधुंकाः अर्थतन्त्रय् नं तीव्रगतिं सुधार खनेदयावःगु दु । चीनया उपभोक्तात आः सपिब मल वनाः सामान न्यायेगु लिसें गाडी न्यायेगु ज्याय् सक्रिय जुइधुंकूगु दु। तर विश्वया हे दकलय्तः धंगु अर्थतन्त्र जुयाच्वंगु अमेरिका व युरोपेली देय्त धाःसा अर्थतन्त्रय् संकुचनय् न्ह्याः वनेमालाच्वंगु दु ।

चीनं सोमवाः पितबिउगु सरकारी विवरणय् वंगु सेप्टेम्बर महिना क्वचायेवं थ्व दँया लिपांगु स्वलाया अर्थतन्त्र ४.९ प्रतिशतं थहां वंगु दु। खुद्रा उपभोग्य सामानया विक्री तच्वःगु दुसा कारखानापाखें जुइगु उत्पादन नं वृद्धि जूगु दु। मास्क व मेमेगु मेडिकल सामान निर्यातय् नं अप्वःगु कारणं चीनय् रोजगारी व उत्पादन निगुलिं नं सुधार खनेदुगु खः ।

क्यापिटल इकोनोमिक्स जुलियन इमान्स प्रिचर्डं बिउगु रिपोर्टय् चिनियाँ अर्थतन्त्रया पुनरुत्थान जारी दुगु व सरकारी अनुदानया निर्भरता म्हो जुयावंगु दु। वंगु डिसेम्बरय् दकलय् न्हापां चीनय् हे कोरोना भाइरस खनेदुगु खः । थ्व लिपा चिनियाँ कम्युनिष्ट पार्टीं वंगु मार्चय् कोरोना नियन्त्रणय् वःगु घोषणा याःगु खः । थ्व घोषणा लिसें विश्वया निगूगु तःधंगु अर्थतन्त्र दुगु देय् चीन कारखाना, पसः व ज्याकू चायेकूगु न्हापांगु देय्जू गु खः । आः विश्वया प्रमुख अर्थतन्त्र जुयाच्वंगु देय् मध्ये चीनया जक आर्थिक वृद्धि जुइगु अनुमान जुयाच्वंगु दु। थ्व दँय् अमेरिका, युरोप व जापानया आर्थिक कृयाकलाप संकुचित जुइ ।

अन्तर्राष्ट्रिय मुद्रा कोषं थ्व दँय् चीनया आर्थिक वृद्धि १.८ प्रतिशतं जुइगु भविष्यवाणी यानातःगु दुसा अमेरिकाया अर्थव्यवस्था ४.३ प्रतिशत, फ्रान्सया ९.८ प्रतिशतं, जर्मनीया ६ प्रतिशतं व जापानया् ५.३ प्रतिशतं संकुचित जुइगु अनुमान कोषं यानातःगु दु ।