डुबान समस्या ज्यंकेत प्रकृतिइ आधारित उपाय नालेत सुझाव
येँ (नेपालभाषा टाइम्स) – स्वनिगलय् दँय्दसं वाः वइगु मौसमय् डुबानय् लाइगु समस्या ज्यंकेगु निंतिं प्रकृतिइ आधारित उपायत नालेमाःगु खँ धाःगु दु । एकीकृत शहरी विकास केन्द्र व हेलभेटास नेपाःया ग्वसाः व येँ महानगरपालिकाया संयोजनय् वंगु शनिवाः जूगु ‘अर्बान डबली’ ज्याझ्वलय् न्ववादीपिं विज्ञपिंसं थ्व बिचाः प्वंकूगु खः ।
ज्याझ्वलय् न्ववानादिसें मू वक्ता शहरी विकास विज्ञ पद्मसुन्दर जोशीं स्वनिगलय् बाः वनीगु खुसियात थुकिया प्राकृतिक लँपुं प्वाःतिनाः नियन्त्रण यायेत स्वःगुलिं खुसिबाःया जोखिम अप्वःगु खँ धयादिल । जर्मनीया राइन खुसिया दसु बियादिसें वय्कलं स्वनिगः प्राकृतिक जलमार्गयात प्यंकेत स्वःगु, खुसि सिथय् ततःजाःगु रिटेनिङ्ग वाल दयेकूगु, खुसि व पुखू अतिक्रमण यायेगु ज्यां यानाः डुबान अप्वया वनाच्वंगु खँ धयादीगु खः ।
थ्व झ्वलय् वय्कलं आः भूमिगत लः पुनर्भरण व वा वइगु लः मुंकेगु ज्या व्यापक रुपं न्ह्याकेमाःगु बिचाः तयादीगु खः । अथेहे वय्कलं स्वनिगःया सहरी विकास योजना व कार्यान्वयनया ज्या छथाय् हे तयाः न्ह्याकेगु निंतिं छगू बल्लाःगु समन्वय निकाय गठन यायेमाःगु व खुसि अतिक्रमण बारे अनुसन्धान यायेमाःगु खँ धयादिल ।
अथेहे प्यानल डिस्कसन ज्याझ्वलय् न्ववानादिसें बागमति सभ्यता एकीकृत विकासया निंतिं उच्च अधिकार सम्पन्न समितिया परियोजना निर्देशक मचाकाजी महर्जनं खुसिइ ओभरफ्लो पनेगु निंतिं कानुनी व भौतिक रुपं हस्तक्षेप यायेगु प्रतिबद्धता प्वंकादिल । थ्व झ्वलय् वय्कलं युएन पार्कयात पूवंक सार्वजनिक पार्कया रुपय् रुपान्तरण यायेगु, रिटेनिङ्ग वालया उचाइ म्हो यायेगु थेंज्याःगु सुधारात्मक ज्या न्ह्याकेगु खँ धयादिल ।
अथेहे पुल्चोक क्याम्पसया सह प्राध्यापक डा. पवन भट्टराईनं प्राज्ञिक अनुसन्धान व सरकारी नीति निर्माण दथुइ सहकार्यया अभाव जूगु खँ न्ह्यथँसें इन्जिनियरिङ्ग शिक्षाय् हे शहरी खुसिबाः विषय थप यानाः ब्वंकेमाःगु बिचाः तयादिल । अथेहे सहरी विकास तथा भवन निर्माण विभागया उपमहानिर्देशक एकराज अधिकारं खुसिबाः नियन्त्रणया निंतिं स्वंगुलिं तहया सरकार, प्राविधिक संस्था व स्थानीय समुदाय दथुइ क्वातूगु सहकार्य आवश्यक दुगु खँ धयादिल ।
LEAVE YOUR COMMENTS