ग्रीसय् निगः हेलिकप्टर ठक्कर नल

एथेन्स – ग्रीसय् निगः हेलिकप्टर थवंथवय् ठक्कर नयाः दुर्घटना जुइवं निम्ह सीगु दु । ग्रीसया जंगलय् नयाच्वंगु मि स्यायेत ब्वयाच्वंगु इलय् सर्गतय् हे निगलं हेलिकप्टर थवंथवय् ठक्कर नःगु खः । हेलिकप्टर ठक्कर नयाः चालक दलया निम्ह सीगु खः ।

दुर्घटनाय् सीपिंमध्ये छम्ह डेनिस पाइटल खःसा मेम्ह ग्रीक अग्नि नियन्त्रक निकायया जनसमस्म्पर्क अधिकृत खः । अथेहे मेगु हेलिकप्टरय् च्वनाः वयाच्वंम्ह बेलायती पाइलट व छम्ह ग्रीक समन्वयकर्ता धाःसा बचे जुइत सफल जूगु दु ।

राजधानी एथेन्सं ६५ गू किलोमिटर पश्चिमपाखे उगु दुर्घटना जूगु खः । दुर्घटनाया भिडियोय् छगः हेलिकप्टर मेगु हेलिकप्टरया पंखाय् ठक्कर नःगु खनेदुगु खः । वयां लिपा हेलिकप्टरय् मिं नयाः लिक्कसं लाःगु पाःलूगु थासय् कुतुं वंगु खःसा मेगु हेलिकप्टरं धाःसा आकस्मिक अवतरण याःगु खः ।