सुडानय् प्रदर्शनकारीतय्त सैनिकतपाखें बलात्कार

सुडानय् लोकतन्त्रया पक्षय् सेनाया मुख्यालय न्ह्यःने प्रदर्शन याःपिं प्रदर्शनकारी मध्येय् छुं मिस्तय्त छथ्वः सैनिकतय्सं बलात्कार याःगु द्वपं लाःगु दु । बलात्कारया प्रत्यक्षदर्शी छम्ह मिसा बिबिसीलिसे खँ ल्हासें झिंनिन्हु न्ह्यः जून ३ तारिखय् थ्व बलात्कार काण्ड जूगु खँ धाःगु दु ।

सेनां थ्व द्वपंयात अस्वीकार याःगु दु, तर खालिद (हिलातःगु नां) नांया उम्ह मिसां बिबिसीलिसे खँ ल्हासें धाःगु दु – प्रदर्शनकारीतय्त गोली कयेकेगु सुरु जुइवं जि नं मेपिं प्रदर्शनकारी लिसें नापसं च्वंगु छखा छेँय् बिसिउँ वना । जि उगु भवनया तलय् थ्यंबलय् छकू क्वथां चिच्या दनाः हालाच्वंगु सः ताल ।

जिमिसं स्वःवनाबलय् अन खुम्ह सैनिकतय्सं निम्ह मिस्तय् बलात्कार यानाच्वंगु खन । उपिं सैनिक जवानत र्यापिड सपोर्ट फोर्सयापिं खः । थ्व फोर्सयात स्थानीय भासं जांजवेद धाइ ।खालिद व मेपिं हाला क्वथां दुहां वंबलय् सैनिकतय्सं गोली कयेकाहल । अथे जूबलय् सकलें अनं बिसिउँ वनेमाल ।

अन बिसिउँ वयेधुंकाः उमिसं मेपिं निम्ह मिस्त नं नापलाःगु खः, गुपिं तसकं ग्याका च्वनाच्वंगु खः । उपिं मिस्तय्सं छुं कने मफु, ख्वः जक ख्वयाच्वन । अथे जूबलय् उमिसं पीडित मिस्तय्त छगू मस्जिदय् यंकेगु कुतः यात । गोलावारीया दथुइ उमित बचे यानाः मस्जिदय् यंकेत स्वःबलय् लँय् हाकनं जांजवेदया छथ्वः सैनिकत नापलात ।

थ्व सैनिक टुकडीइ छुं ई न्ह्यव मिसतय्त बलात्कार यापिं सैनिक मध्ये छम्ह नं दुगु खः । उमिसं खालिदयात ज्वनाः हाकनं उगु हे भवनय् यंकल । खालिदं धाःगु दु, ‘अन जितः लं त्वकेत स्वल, जिगु नं बलात्कार यायेगु कुतः यात । जि चिल्लाय् दनाः ततसकं हाला । निगू स्वंगू मिनेटय् अन गोली कयेकाहःगु सः तायेदत, अथे जूबलय् उपिं जितः त्वःताः वन ।’

सुडानय् जुयाच्वंगु थज्याःगु अत्याचारयात कयाः सुनां नवाये फयाच्वंगु मदु । हजारौं जांजवेदया सैनिकत प्रदर्शनकारीतय्त ख्यायेत पिहां वयाच्वंगु दु । सेनां इन्टरनेट सेवा नं बन्द यानाबिउगु दु, अथे जूबलय् सुडानय् धाथें छु जुयाच्वन धयागु विश्वं सिइके नं थाकुयाच्वंगु दु । मनूत छुं न्ववायेत ग्यानाच्वंगु दु ।

विपक्षीतय्सं सेनाया कारवाहीलय् लानाः सछिम्हं मल्याक प्रदर्शनकारी सीधुंकूगु खँ धाःगु दु । गुलिखे मनूतय्त नील खुसिइ वांछ्वयाबिउगु द्वपं विपक्षीतय्सं बियाच्वंगु दु ।थ्व हे दथुइ सेनां प्रदर्शनकारीविरुद्ध कारवाही यायेत थःपिंसं आदेश बियागु खँ धाःसा स्वीकार याःगु दुसा यौनहिंसाया द्वपंयात धाःसा अस्वीकार याःगु दु ।