
ख्वप- धार्मिक व सांस्कृतिक महत्व दुगु कमलपुखू बचे यायेत मध्यपुर थिमिया बासिन्दातय्सं बिहिवाः ख्वप जिल्ला अदालतय् हे धर्ना बिउगु दु ।
मध्यपुर थिमि नगरपालिका ८ वडा, बोडेय् च्वंगु सलंसः दँ न्ह्यवनिसें पुखूया रुपय् दुगु उगु पुखू भूमाफियातय्सं व्यक्तिया नामय् नामसारी यानाः मिइगु सुरु याना हयेगु आः उगु थाय्यात सार्वजनिक पुखूया रुपय् हे लित हयेत स्थानीय बासिन्दातय्सं प्ले कार्ड सहित अदालतय् धर्ना बिउगु खः ।
ख्वप जिल्ला अदालतय् पुखूया विषयय् बहस जुयाच्वंगु इलय् स्थानीय वासिन्दातय्सं परापूर्व कालं निसें धार्मिक रुपं छ्यला वयाच्वंगु उगु पुखू अवैध रुपं दर्ता यानाः न्यायेमीगु सुरु याःगु धासें उगु जग्गा सार्वजनिक जुइमाःगु माग याःगु खः ।
तत्कालिन बोडे गाउँ पञ्चायत ६ वडाय् लाःगु कित्ता नं. १ या १५ रोपनी ९ आना जग्गा २०४२ सालय् व्यक्तिया नामय् दर्ता जुयाः न्यायेमीगु सुरु जूगु धासें उगु जग्गाय् पुखू हे दयेकेमाःगु माग स्थानीय बासिन्दातय्सं याःगु खः ।
थिमि नगरपालिकाया मेयर मदनसुन्दर श्रेष्ठ नं धर्नाया इलय् अदालत परिसरय् हे झायाः थःपिं मचाबलय् निसें लखय् म्हिता वयाच्वंगु कमलया स्वां ह्वइगु उगु थाय्यात आः सार्वजनिक पुखूया रुपय् हे दयेकेमाःगु खँ धयादीगु दु ।
पुखू न्यायेमी जुइधुंकाः प्यदँ न्ह्यव छुं मनूत पुखू ल्हायेत चा ज्वनाः वःबलय् स्थानीय वासिन्दातय्सं लिनाछ्वःगु खः । २०४२ साल असार ३१ गते उगु पुखू कान्छी पोडेनीया नामय् दर्ता यानाः २०५१ साल माघ २२ गते अधिकृत वारेशनामा बकसपत्र यानाः मनांग छेँ जुयाः येँ ठमेलय् च्वनीम्ह ग्ल्याल्पो गुरुंगया नामय् पास जूगु खः । गुकी १३ रोपनी ९ आनाः ग्ल्याल्पोया नामय्, १ रोपनी तेन्जी शेर्पिनीया नामय्, १ रोपनी कर्सी जद्योना गुरुंगया नामय् पास यानाः आः ग्ल्याल्पों मेमेपिं मनूतय्त जग्गा पास यानाः मियाच्वंगु खँ धाःगु दु ।
बिहीवा जूगु बहस लिपा न्यायाधीश मातृकाप्रसाद मरासिनीया इजलासं कान्छी पोडेनीयात अदालतय् झिके यायेत आदेश बिउगु दु । अथेहे पुू जःखःया जग्गा छु लगत भिडे यानाः दर्ता याःगु उकिया लगत, ठैक रसिदया सक्कल अदालतय् पेश यायेत आदेश बिउगु दु ।
LEAVE YOUR COMMENTS