नेपालभाषा कविताय् बिम्ब

यल – नेपालभाषा एकेडेमिया काव्य कवःया ग्वसालय् नेपालभाषा कविताय् बिम्बया प्रयोग बारे सहलह ज्याझ्वः जुल । एकेडेमिं थीथी प्राज्ञिक ज्याझ्वः न्ह्याका यंकेगु आज्जु कयाः भाइस चान्सलर यज्ञरत्न धाख्वाःया सभापतित्वय् जूगु उगु ज्याझ्वलय् शताब्दी पुरुष सत्यमोहन जोशी मूपाहां कथं झाःगु खः ।

ज्याझ्वलय् साहित्यकार इश्वरी मैंया श्रेष्ठं बिम्ब, बिम्बया ताजि व नेपालभाषाया कविता नांयागु मू ज्यापौ न्ह्यब्वयादीगु खः । ज्यापती काव्यय् छ्यलाच्वंगु बिम्बयात साहित्यकारतय्सं गुकथं न्ह्यब्वयातःगु दु धइगु खँ दसु बियाः न्ह्यथनातःगु दु ।

ज्यापौयात कयाः एकेडेमिया सदस्य सचिव मल्ल के. सुन्दर लिसें साहित्यकारपिं नारद बज्राचार्य, शाक्य सुरेन, राजेन मानन्धर, रजनी मिला, धर्मराज राजकर्णिकार, तुलसी साय्मि, भगतदास श्रेष्ठ व प्रेमशान्ति तुलाधरपिंसं नं बिचाः तयादीगु खः । ज्याझ्वःया कजि डा. पुष्पराज राजकर्णिकारं ज्याझ्वःया आज्जु बारे कनादीगु खः ।