ने. सं. ११४६ दिल्लागा पञ्चमी -

स्वनिगःया अव्यवस्थित तार मन्त्रीया अनुगमन

येँ (रासस) – सूचना व संचारमन्त्री डा. विक्रम तिमिल्सिना व उर्जा, जलस्रोत व सिँचाइमन्त्री विराजभक्त श्रेष्ठं स्वनिगलय् दँदँ न्ह्यःनिसें सतकया मतया लठ्ठाय् गुचमुच्च जुयाः यगानाच्वंगु व छ्यलाबुलाय् मवयाच्वंगु अवस्थाय् दुगु इन्टरनेट, टेलिफोन व टेलिभिजनया तार व्यवस्थापनया प्रगति बारे मंकाःकथं स्थलगत अनुगमन यानादीगु दु ।

मन्त्रीद्वयं गौशाला, पुलांगु बानेश्वर, जडीबुटी लगायतया लागाय् वनाः तार व्यवस्थापनया ज्याया निरीक्षण यायेगुया नापं सम्बन्धित निकायया पदाधिकारीलिसे प्रगति व खने दुगु समस्या बारे जानकारी कयादीगु खः ।
सरकारं न्हापांगु चरणय् त्रिपुरेश्वरनिसें कालिमाति-कलंकी-जडीबुटी पेप्सीकोला, त्रिपुरेश्वर-लाजिम्पात, सामाखुसि-टाउन प्लानिङ-ग्वंगःबुँ, किपू लागालिसें पुलांगु बानेश्वर-बानेश्वर-चाबही यानाः खुगू रुटय् अव्यवस्थित व छ्यलाबुलाय् मवयाच्वंगु तार चिइकेगु अभियान न्ह्याकाच्वंगु दु ।

अनुगमनया झ्वलय् संचारमन्त्री डा. तिमिल्सिनां नेपाल दूरसंचार प्राधिकरणं साउन १५ गते दुने न्हापांगु चरणय् ज्या क्वचायेकेगु प्रतिवद्धता प्वंकूसां अपेक्षा याःकथं प्रगति खने मदुगु धासें असन्तुष्टि प्वंकादिल । वय्कलं नागरिकं प्रत्यक्ष लिच्वः महसुस यायेकथं क्वःछिनातःगु इलय् ज्या क्वचायेकेत निर्देशन बियादिसें ज्याय् ढिलासुस्ती याइगु गुगुं नं निकाय वा व्यक्तियात छुट मजुइगु स्पष्ट यानादिल ।

‘साउन १५ दुने ज्या क्वचायेकेगु प्रतिवद्धता याःगु ख, तर आःया प्रगति लक्ष्यकथं न्ह्याः वंगु खने दयाच्वंगु मदु । थ्व समस्या गुगुं छगू जक निकायया मखु, झी सकसिगुं मंकाः कमजोरीया कारणं ब्वलंगु खः । आः दक्वं निकायया दथुइ प्रभावकारी समन्वय यानाः समाधानय् केन्द्रीत जुइमाः’, संचारमन्त्री तिमिल्सिनां धयादिल, ‘नागरिकं लिच्वःया चाहना यानाच्वंगु दु, उकिं ज्याय् ढिलासुस्ती यायेगु छुट सुयातं मदु । क्वःछिनातःगु ईया दुने ज्या जू वा मर्जू निरन्तर अनुगमन जुइ व जिम्मेवारी पूमवंकीगु निकाय व व्यक्तियात आवश्यक कारवाही जुइ ।’

संचारमन्त्री तिमिल्सिनां छ्यलाबुलाय् मदुगु केबुल तार तत्काल चिइकेत निर्देशन बियादिसें लठ्ठाय् तार खाइगु सेवा प्रदायकं उकियात चिइकेगु जिम्मेवारी नं कायेमाः धयादिल । ज्याया झ्वलय् छुंकथंया कानुनी, प्राविधिक वा प्रशासनिक समस्या वःसा तत्काल मन्त्रालययात जानकारी याकेत इनाप यासें वय्कलं नेपाल दूरसंचार प्राधिकरणयात प्रभावकारी नियामकया भूमिका म्हितेत व दक्वं सेवा प्रदायकया दथुइ समन्वय यानाः स्पष्ट ई क्वःछिनाः एकीकृत कार्ययोजना कार्यान्वयन यायेत निर्देशन बियादिल । वय्कलं बर्खाया ईया बावजुद नं निरन्तर ज्या यानाच्वंपिं प्राविधिक जनशक्तियात च्वछायादिसें ज्याया गति अझ अप्वयेकेमाःगु खँय् बः बियादिल ।

ऊर्जा, जलस्रोत व सिँचाइमन्त्री श्रेष्ठं नं अव्यवस्थित तार व्यवस्थापन व भूमिगत ‘केबलिङ’ निगुलिं ज्यायात प्रभावकारी रुपं न्ह्यःने न्ह्याकेत दक्वं निकाय जवाफदेही जुइमाः धयादिल । वय्कलं न्हूसतक व विशाल बजाः लागाया तार व्यवस्थापन लिपा सहरी सौन्दर्यताय् सुधार वःगु उदाहरणीय जूगु न्ह्यथनादिसें मेमेगु लागाय् नं थ्व हे धंगं ज्या विस्तार याना यंकेगु जानकारी बियादिल ।

उर्जामन्त्री श्रेष्ठं धयादिल, ‘अव्यवस्थित तार चिइकेगु अभियान सरकार वा गुगुं छगू संस्थाया याकः कुतलं जक सफल जुइमखु । नियामक निकाय, सेवा प्रदायक व स्थानीय तह सकसिनं छगू हे लक्ष्ययालिसें ज्या यायेमाः । थ्व नागरिकया सुरक्षालिसे जक मखु, व्यवस्थित व छगू बांलाःगु सहर निर्माणलिसे नं स्वानाच्वंगु विषय खः ।’

अनुगमनया झ्वलय् मन्त्रीद्वयं विद्युत पूर्वाधारया अवस्थातकं अवलोकन यानादीगु खः । सरकां येँया थीथी खुगू लागाय् पाइलट परियोजनाया रुपय् तार व्यवस्थापन अभियान संचालन यानाः उकियापाखें प्राप्त अनुभवया लिधंसाय् मेमेगु लागाय् नं अभियान विस्तार यायेगु तयारी याःगु दु । उकिया निंतिं विषयगत मन्त्रालयं कार्य क्षेत्र दुने लाःगु विषयय् आवश्यक कानुनी सुधारया प्रक्रिया नं न्ह्यःने न्ह्याकाच्वंगु दु ।

नेपाल दूरसंचार प्राधिकरणया अध्यक्ष अर्जुन घिमिरें बर्खां वा वयाच्वनीगुलिं कार्य सम्पादन यायेत छुं भचा लिबानाच्वंगु जानकारी बिसें साउन १५ गते क्वचायेकेगु धयागु थासय् बाःछिया ई थप यानाः क्वःछिनातःगु ईया दुने पूवंकेकथं ज्या जुयाच्वंगु दु धयादिल । वय्कःयाकथं आपालं थासय् लठ्ठाय् च्वंगु तार सुयागु स्वामित्वया खः धइगु म्हसीकेत थाकुयाच्वंगु, गुलिखे तारय् सेवा प्रदायकया म्हसीका खुले जुइगु ट्याग मदुगु व सतक लागाय् न्हिनय् ज्या याये मदइगु व्यवस्थाया कारणं नं ज्या प्रभावित जुयाच्वंगु दु ।

थौंकन्हय् पुलांगु बानेश्वर, गौशाला, चाबही लागाय् तार चिइकेगु ज्या तीव्र रुपय् जुयाच्वंगु दुसा येँ महानगरपालिकां प्राथमिकताय् तयातःगु मेमेगु थासय् नं चरणवद्ध रुपय् व्यवस्थापन यायेगु ज्या जुयाच्वंगु प्राधिकरणं न्ह्यथंगु दु । लिसें दक्वं दूरसंचार व इन्टरनेट सेवा प्रदायकयात थःपिनिगु तारय् संस्थाया स्पष्ट म्हसीका खुले जुइगु ट्याग अनिवार्य तयेत नं निर्देशन बिउगु दु ।

सरकारं वंगु असार ३१ गते नेपाल दूरसंचार प्राधिकरण, नेपाल विद्युत प्राधिकरण, नेपाल टेलिकमक, एनसेल, व इन्टरनेट सेवा प्रदायकतय्गु मंकाः संस्था आइस्पानयात एकीकृत कार्ययोजना दयेकाः साउनया निगूगु वाःया दुने न्हापांगु चरणया ज्या क्वचायेकेत निर्देशन बिउगु खः । व स्वयां न्ह्यः जेठ २८ गते दूरसंचार प्राधिकरणं सार्वजनिक सूचं जारी यासें थीथी खुगू लागाय् चरणवद्ध रुपय् अव्यवस्थित व छ्यलाबुलाय् मवयाच्वंगु तार चिइकेत निर्देशन बिउगु खः ।

अव्यवस्थित तारया कारणं नागरिकया सुरक्षाय् जोखिम अप्वःगुया लिसें सहरी सौन्दर्यतकं प्रभावित जूगु दु । थ्व समस्या ज्यंकेत सरकारं अभियानया हे रुपय् घोषणा यानाः इलय्, समन्वित व लिच्वः खने दइकथं राजधानीयात सुरक्षित, व्यवस्थित व सुन्दर दयेकेगु लक्ष्य काःगु दु ।