‘लगानीमैत्री वातावरण मदुगुलिं बैंकय् त्यासाया माग मदु’
येँ (नेपालभाषा टाइम्स) – नेपाल राष्ट्र बैंकया विशिष्ट श्रेणीया कर्मचारीतय्सं लगानीया वातावरण मदुगुलिं बैंकिङ क्षेत्रय् त्यासाया माग म्हो जूगु खँ धाःगु दु । अर्थमन्त्री स्वर्णिम वाग्ले लिसे सहलह यायेगु झ्वलय् कर्मचारीतय्सं बैंकिङ क्षेत्रय् त्यासाया माग अप्वयेकेत लगानी मैत्री वातावरण विकास यायेमाःगु सुझाव नं बिउगु खः ।
अर्थतन्त्रया लिपांगु अवस्था व वित्तिय क्षेत्रया समस्या ज्यंकेगु निंतिं केन्द्रीय बैंकया विभागं गुकथं ज्या यानाच्वन धइगु खँ सिइकत अर्थमन्त्रीं विशिष्ट श्रेणीया कर्मचारीतय्त सःताः सहलह याःगु खः ।
अर्थमन्त्री वाग्लें उद्योगी व्यवसायी व बैंकरत लिसे सहलह यायेधुंकाः राष्ट्र बैंकया कार्यकारी निर्देशकतय्त नापलाःगु खःसा उगु इलय् अर्थमन्त्री वाग्लें अर्थतन्त्रयात गति बीत छु गज्याःगु सुधार यायेमाः धकाः सुझाव नं फ्वंगु खः । अर्थमन्त्रीं वाग्लें उद्योग व्यापारी व बैंकरतय् खँ न्यनेधुंकाः त्यासा मवंगुया कारण व नीतिगत विषययात थुइकेत निर्देशकत लिसे सहलह याःगु खँ बैठकय् सहभागी छम्ह निर्देशकं धयादीगु दु ।
सहलहया झ्वलय् अर्थमन्त्रीं माल धाःसा नीतियात पुनःपरिभाषित यायेमाःगु, नीतिगत स्पष्टता हयेगु, निर्णय क्षमता अप्वयेकेगु, समस्या ज्यंकेगु, समस्याया व्यवस्थापन जक मखुसें समाधान गुकथं यायेगु धइगु खँयात कयाः नं निर्देशकत लिसे सहलह याःगु खः । अर्थमन्त्री वाग्लें आःया परिस्थितिइ माक्व तरलता दु, म्हो नीतिगत दु, चीब्याःगु स्प्रेड दर, पुँजी पर्याप्तता सबल जूसां नं त्यासा छाय् मवंगु धकाः निर्देशकतय्के न्ह्यसः न्यंगु खःसा उगु इलय् निर्देशकतय्सं उद्योग व्यवसायीया मनोबल कमजोर जूगुलिं त्यासाया माग मवःगु खँ धासें उकिया निंतिं नीतिगत तहलय् ज्या यायेमाःगु खँ धाःगु खः ।
सलहलया झ्वलय् अर्थ सचिवं बैंकया सीईओया खँया आधारय् कर्जा नोक्सानी व्यवस्था, हाकूगु धलखय् तयेगु, चालु पुँजी त्यासा सम्पत्ति वर्गीकरण, सेन्ट्रल केवाइसी, एएमएलया बारे स्पष्ट यायेमाःगु सुझाव बिउगु खः । सहलहया झ्वलय् अर्थमन्त्रीं गुगुं नं कथंया निर्देशन मबिउगु खँ धाःगु दु ।
LEAVE YOUR COMMENTS