शान्ति शिक्षा मन्दिरया विद्यार्थीतय् निंतिं खाद्यान्न ग्वाहालि

येँ – थनया थँहितिइ च्वंगु शान्ति शिक्षा मन्दिर स्कुलया विद्यार्थीतय्त न्हिनसिया खाजा नकेत खाद्यान्न ग्वाहालि प्राप्त जूगु दु । इजरायल सरकारं स्कुलया विद्यार्थीतय्त नियमित रुपं खाजा नकेगु व्यवस्था यायेत उकथं खाद्यान्न ग्वाहालि याःगु खः । पोषणयुक्त नसाज्वलंलिसें विद्यार्थीतय्त अध्यापन याकेगु उद्देश्यं विद्यालययात उकथं खाद्यान्न ग्वाहालि याःगु खः ।

स्कुलय् अप्वःथें गरिब व श्रमिक वर्गया विद्यार्थीत अध्ययन यानाच्वंगु दु । नेपाःया निंतिं इजरायली राजदूत बेनी ओमेरं विद्यालयय् अध्ययन यानाच्वंपिं विद्यार्थीतय्त खाद्यान्न ग्वाहालि याये खंगुलिं लसता प्वंकादिसें भावी पुस्ताया उज्ज्वल भविष्यया निंतिं शिक्षा क्षेत्रय् दीर्घकालीन लगानी अपरिहार्य जूगु धयादिल ।

उगु इलय् येँ महानगपालिका वडा नं. १७ या वडाअध्यक्ष नवीन मानन्धरं खाद्यान्न ग्वाहालि प्राप्त जूगुलिं आः द्यां लानाः स्कुलय् आखः ब्वं वयेमाःगु बाध्यतां विद्यार्थीत मुक्त जूगु धासें शैक्षिक उन्नयनया निंतिं इजरायल सरकारपाखें वइगु दिनय् नं थप ग्वाहालि प्राप्त जुयाच्वनीगु विश्वास प्वंकादिल ।