ट्रम्पया प्रस्ताव नेतान्याहुपाखें अस्वीकार
वाशिंगटन – अमेरिकी राष्ट्रपति ट्रम्पं गाजायात कयाः न्ह्यःने छगू प्रस्तावयात इजरायलया प्रधानमन्त्री बेन्जामिन नेतान्याहुं अस्वीकार याःगु दु । अमेरिकी राष्ट्रपति ट्रम्प प्रशासनं गाजायात निःशस्त्रीकरण यायेगु व इजरयाली सेनां उगु लागां लित यंकेगु निंतिं मस्यौदाया रुपय् न्ह्यःने हःगु प्रस्तावयात इजरायली प्रधानमन्त्री नेतान्याहुं सार्वजनिक रुपं अस्वीकार याःगु खः ।
प्रधानमन्त्री नेतान्याहुं प्यालेष्टिनी लडाकू समूह हमास पूर्णरुपय् निःशस्त्र मजूतले उगु लागां इजरायली सेना लिमचिलीगु नं स्पष्ट याःगु दु । सामाजिक संजाल एक्सय् छगू भिडियो सार्वजनिक यासें नेतान्याहुं गाजापट्टी लागाय् राष्ट्रिय सुरक्षा व सैन्य उपस्थिति इजरायल यथास्थितिइ दइगु खँय् नं बः बिउगु दु । थःपिनिगु सुरक्षा सुनिश्चिताय् अडिग नेतान्याहुं हमास पूर्णरुपय् निःशस्त्र मजूतले इजरायल आः अवस्थां गुगुं हालतय् नं लिमचलीगु स्पष्ट याःगु दु ।
नेतान्याहुं सेनायात थःगु देय् व आम नागरिकया रक्षाया निंतिं माःगु सकतां ज्या यायेत निर्देशन बियागु धासें इजरायली सेनायात बियातयागु जनादेशया नं पुनःपुष्टि याःगु दु ।
थ्व स्वयां न्ह्यः गाजाय् संक्रमण ढाँचा कार्यान्वयनया सम्बन्धय् छगू प्रमुख स्पष्टीकरणय् गाजाय् दक्वं ल्वाभः पूर्णरुपं विघटन मजूतले इजरयाली सुरक्षा बल (आईडीएफ) ‘म्हासुगु ध्वलं’ लिहां मवयेगु पुष्टि यानातःगु दु । म्हासुगु ध्वः दक्षिण लेबनानया सीमापाखें थ्यंमथ्यं १० किलोमिटर उत्तरपाखे न्यना वनाच्वंगु सैन्य क्षेत्र खः ।
अलजजिरायाकथं इजरायली अधिकारीतय्सं हिजबुल्लाहया उन्मूलन यायेगु कुतः यानाच्वंगु व आक्रमण यायेगु थःपिनिगु अधिकार सुरक्षित यासें इजरायलं उगु लागाय् नियन्त्रण कायम यानातयेत स्वयाच्वंगु दु ।
उच्च प्रतिनिधि निकोले म्लादेनोभ, इजरायली शान्ति बोर्डया प्रतिनिधिमण्डल, प्रधानमन्त्री नेतान्याहु व वय्कःया वरिष्ठ उच्चस्तरीया टोली दथुइ रचनात्मक सहलह लिपा उगु घोषणा याःगु खः ।
अमेरिकी राष्ट्रपति ट्रम्पं न्हूगु गाजा सम्झौता अन्तर्गत हमासयात निःशस्त्र यायेगु शान्ति सम्झौताय् बोर्डं प्राप्त याःगु तःधंगु सफलताया रुपय् च्वछायेवं उगु घटनाक्रम विकसित जूगु खः ।
LEAVE YOUR COMMENTS